Read Loma 1JƆ̃ 4 Bible Online

1JƆ̃ 4 - Loma bible

1JƆ̃ 4

¹Wõìla veaitiɛ, taitiɛ ɣaazɔ ta bo ga Gala baa ŋinɛgi ɣa é kɛɛzu tiɛ faa ta ɣɛ, a mɛ lɛ te maʋaa ziɣi ga gaama. Kɛ̀ a te wɔ̃ɔ‐kɔ̃ɔ wo wɛlɛ na va ga ani ta ɣi‐gaa‐ziɛi wulovɛ Gala zeea. Ƃɔvɛlaale zɛɛ ʋaa Ɣala daa woo‐wo bea lamaa te wulovɛ sa te vile zui zu.

²Nii ɣa wa ki‐gaa‐ziɛi nii wɛ̃ɛ da é ga Gala baa ŋinɛgi ɣɛɛ ʋaa. Ki‐gaa‐ziɛi nɛpɛ yá kɛ nu laa wu ziɣi ma é bo ga Ziizɛ Kolai vaani nu ƃuse lɔtɔ zu, maɣi‐gaa‐ziɛi wulovɛ Gala zeea.

³Ki‐gaa‐ziɛi‐nɛpɛ ɛ́ lɛ kɛɛ nu ɔ́ laa wu ziɣi Ziizɛ maʋai ma ɛ́ lɛ wuloni Gala zeea. Ki‐gaa‐ziɛi na ɣa é ga Kolai wɔɔ yɔ̃wɔi na ki‐gaa‐ziɛi nii wo mɛnini ga tɔ vaazu. Tɔwɔ tɔ sa ʋɔlɔ ŋeteai nii zu.

⁴Dèa woloitiɛ, wa ga Gala na dɔa, tɔwɔ fɔlɔ wo yee levega sa zɛɛ ʋaa Ɣala daa woo‐wo beai niitiɛ va. Ƃɔvɛ‐laale nui nii é wo yii zu gwala levega nui va é ŋeteai nii zu.

⁵Ta ŋeteai nii ʋaa ma. Na ma nii ta bo tɔ ŋeteai nii ʋaa ma. Tɔwɔ ŋeteai nii zu veaitiɛ ta wui to te woo ma.

⁶A da ga Gala na dɔa. Nui nɛpɛ é Gala kwɛ̃ni manui ɣa wui to de woi ma. Nii wɔgi lɛ ga Gala na dɔ ɛ́ lɛ wui toga de woi ma. Vele wɔ ka na a da gaama ɣi‐gaa‐ziɛi wɛ̃ɛ da ta ki‐gaa‐ziɛi nii lɛ pele ma.

⁷Wõìla veaitiɛ, a de wõi ga ɣiini, ƃɔvɛlaale wõila wulovɛ Gala zeea. Na ɣa ɣɛɛ na nui yá wõi ga baa tɔ ga Gala duu, Gala kwɛ̃ɛgɛi bɛ́.

⁸Nui ɛ́ lɛ wõiya ga baa, ɛ́ lɛ Gala kwɛ̃ni, ƃɔvɛlaale Gala ka ga wõila.

⁹Nii ɣa é Gala na wõilai wuloa kɛnɛ ma. Na ɣa ga é duu ɣilekpugi leveni zui zu, kɛɛ ʋaa ma zɛʋu ɣɛ de ya saala zu.

¹⁰Nii ɣa é ga wõila. Ɛ́ lɛ ga de wõi ɣa de boni ga Gala, kɛ̀ to mu Gala ka é de wõini ɣɛ é dúi leve ga é ɣɛ ga da ʋaa yowũitiɛ zu‐ƃɛtɛ ŋɛni.

¹¹Wõìla veaitiɛ, tei tɔwɔ Gala ge nà ɣavele wõi woga ga diɛ, tɔ de ma ga kui ga de wõi ga ɣiini ƃalaa pɛ.

¹²Nu ta lɛ dɛ wɔlɔ Gala pɛtɛni. Kɛ̀ ani da wõi na ga ɣiini, Gala ka yɛ de yii zu, na ɣa ɣɛɛ na ná wõilai yá ɣɛ de yii zu máʋai ɣa wolo wulu ma.

¹³Nii ɣa da kwɛ̃ɛ da ga de ɣatagɛ ɣɛɛ va su ɣilekpu da tiɛni, tɔ wɔ é de yii zu. Mazaƃui ɣa ga é ƃɔɔ vaa ŋinɛgi levega de wɔ vɛ.

¹⁴De wɛlɛɛ na va de mazeele woo ʋe ga de ɣeea Gala ge dúi levega ga zui‐wulo‐faa‐zu nu.

¹⁵Nui nɛpɛ yá laa wu ziɣi ma é bo ga Ziizɛ ɣa ga Gala duu, Gala ka yɛ manui yii zu ta tɔ te ɣɛ su ɣilekpu.

¹⁶Na ma wõilai nii é Gala zeea de ʋaa ma de kwɛ̃ni, síɣiai de vɛ ga gaama. Gala ka ga wõila. Nui wõila zíi zu wɔ towaa ɣata ta Gala te ɣɛɛ va su ɣilekpu, Gala pɔ ge yɛ zíi zu.

¹⁷Tei tɔwɔ velei Kolai la de ŋɛ na zui zu, na ɣa kɛ de wolo wulu ma wõila ʋaa ma é de ya, kɛɛ ʋaa ma de mɛ lɛ luo faa‐wo gaa‐leve ʋoloi ʋaa ma.

¹⁸Duo lɛ wõila zu. Kɛ̀ wõilai máʋaa woloai wulu ma towaa duo wulo nu yii zu. Ƃɔvɛlaale duo ƃɔga tɔ‐kpɛ‐ma ta ɣa te la. Na ɣa ɣɛɛ na nui yá ɣɛ luozu, maa‐wulo‐zu ɣa ɣɛ ná wõilai va.

¹⁹Zɔi é kɛɛ wõila ɣɛ de ya tɔ ga é ɣaʋuni é wõi ga diɛ.

²⁰Ani nu nɛpɛ ka ɣɛ na tea, “Gè Gala wõini,” tɔwɔ é zili ga bɔɔ nui, a kɛ tii tɔ ga zɛɛ ʋaa nu. Ƃɔvɛlaale nui ɛ́ lɛ wõiya ga bɔɔ nui nii é wɛlɛɛ bá, ɛ́ lɛ zooga ɔ́ wõi ga Gala nii ɛ́ dɛ pɛtɛni.

²¹Tɔgi nii ɣa Kolai daa de ya. Na ɣa ga nui nɛpɛ é Gala wõini kɛni yá bɔɔ nu wõi ƃalaa pɛ.