Read Loma JUU 1 Bible Online

JUU 1 - Loma bible

JUU 1

¹Nài gè ga Juu, gà ga Ziizɛ Kolai na tii‐ɣɛɛ nui ta gè ga Jĩi deɣe. Gà kɔlɔi nii wonɛzu numaitiɛ wɔ te liligɛi. Na ɣa ga niitiɛ te ŋeteai ɣɛɛzu de ɣeea Gala na wõilai zu tiɛ kɛ Ziizɛ Kolai na kpaa‐maazui mavele ma.

²Gaazu‐maa‐wõi‐ɣaa, zii‐laa é vɛɛ wõila va te zu ɣa wɔɔlɔ ma wo ya fãa.

³Wõìla veaitiɛ, kɛ́ɛ vele ma gàazu ga faa ga gè kɔlɔ wonɛ wo wɔ é vile da valola ɣilekpugi nɔ va, gè wɛlɛni na va ga tɔ pele ma ga gè kɔlɔ wonɛ gìɛ da wo vɛ ga fai nii de siɣia ga gaama wo maŋapi wɔ. Na ɣa ga nii te daani Gala na dɔ numaitiɛ ya ná ɣɛ nɔ ɣile, nà wɔ ge kulo‐ɣɛɛ wo.

⁴Su‐wulo‐zu ɣa ga nui taniga te pele maa zɔlɔ woga doowu zu te vili de zaama. Ta ga niitiɛ te wuloai wɔlɔ su wooza ga faa yɛ te ma. Ta ga Gala tuo‐wo tala veai niitiɛ te da Ɣalagi na maa‐wõi‐ɣaa ƃɔ‐bai maa wotega ga wũfe tala luo‐woga. Na ɣa ɣɛɛ na da nu keea nu ɣilekpugi nii é ga de maliɣii Ziizɛ Kolai, ta nà maʋaa zakpesu.

⁵Tɔwɔ gà wõi ɣɛɛzu ga gè wo ɣi too fai nii zu, velei ƃalaa la wo looni la wɔlɔ ɣi su máʋai zu ná ɣɛ ɣile, nà wɔ ge kulo‐ɣɛɛ wo. Na ɣa ga de maliɣii nii é numaitiɛ valoni é te wulo Iije yui va, niitiɛ tɛ lɛ máʋaa ziɣini ga gaama é te zu ŋala‐ŋalani ga ná yee luo vele.

⁶Gala ta ɣeelaitiɛ tɛ lɛ yɛni lo‐suvɛ kɛ̀ to mu te ziɣi te ɣɛɛ‐zu ƃɔɔƃɔɔgi zu, te zogɛ bɛ́ te yɔ̃wɔi nii ɣa máʋaa wɛ̃ɛ gɛ lɛ ba te zeɣe zu‐ƃidiai zu ga te yɛ na é yɛsu folo walai nii é ga faa‐wo gaa‐leve ʋoloi é ziiti.

⁷È ɣɛ velei nɔ é ɣɛni la ga Saadɔ̃ ƃɔga Gɔmɔɔla é vɛɛ te wukũi‐ba laitiɛ va, tai natiɛ zu veaitiɛ ta ƃalaa te ƃaa‐wulo‐ma luo woni te viligɛi ŋɛni‐wõi‐leve‐ma luoi nii zu mawoo lɛ ŋetea. Te ɣɛɛ vele ɣa na sa ɣɛ ga po‐kɔ̃ɔ te ɣɛɛ vele ma tɔ‐kpɛ‐mai nii yee wu é ga ŋabui maʋaa wɛ̃ɛ gɛ lɛ ba.

⁸Pele zii ɣilagi nii nɔ zu numai niitiɛ te Ziizɛ maʋaa zakpesu ta nu ƃuse lɔtɔi maa woolasu ta ze‐su luo‐wogai zu, tiɛ ɣɛlɛ nii va gaa‐ƃaa zéea te maazu, ƃaa‐la‐ma ʋulu ŋɛniitiɛ te gee wɔlɔgi zu tiɛ natiɛ laa woo zu loo ga yowũa.

⁹Kɛ̀ tei Gala ta ɣeela walai Maikɔ ɣɛni losu dɛvele la tiɛ daazaa wulo Mooze mawomai maazu, ɛ́ lɛ masani nà ma ɔ́ faa vɛɛ bá daa‐woo‐zu‐loo yowũ zu. Kɛ̀ é ɣɛni dɛvele ma, “Gé maliɣii ɣa yii ɣaa wãla yìɛ fãa.”

¹⁰Kɛ̀ numai niitiɛ ta daa‐woo‐zu‐loo yowũ wo fai nɛpɛ su tɛ lɛ gaa ɣaa. Tɔwɔ faitiɛ ta te wɛ̃ɛ wũ‐su woo ma, è ɣɛ velei nɔ suoitiɛ te la ki‐gaa‐ziɛ lɛ te ya, te zu ɣa ŋala‐ŋala na mavelei ma.

¹¹Kpalo veavɛ tiɛ! Ƃɔvɛlaale ta luozu ga Kĩi luo velei. Ta laa wulozu ƃɔɔ ʋaa zu ga te ŋɛni zɔlɔ wo su tiɛ kɛ ga Beelɔ̃ na pele‐ma lala luoi‐wo pele. Te zu ɣa ƃɔnɔ wo è ɣɛ velei nɔ é ɣɛɛni la Koola na to‐da luoi zu.

¹²Numai niitiɛ ɣa te ga kawɔ‐zuvɛ wa wõila wuu‐ɣaa ʋai zu ga velei ta ɣɛ zɔɔ‐zɔɔgi wosu la ga duo lala vele te ɣaazu nɔ ƃɔɔ ʋaa zu. Te maʋaa wulovɛ ga tine ƃiligi nii tine lɛ zéea ɔ́ pu é nɔ fãgai ya yíɛ lii la. Te wulovɛ ga gului niitiɛ te mavaa ʋaa lɛ ɣɛɛ bá siɛgi nii zu pagɛi te vaa la. Te zaavɛ te wote ta za te lɔɔ wuloai zuu ma.

¹³Te maʋaa wulovɛ ga yuwu maɣiligi nii kée ɣaa ƃai nu zosu lɛ maʋaa va tiɛ ta wũfe tala ʋai lɛ è ɣɛ velei yuwu maɣiligi ɣa ɣɛ maʋũi lɛɛzu la. Te maʋaa wulovɛ ga teve‐teve sɔmɔ dekai niitiɛ zeɣe zu‐ƃidiai yɛgɛi na te laa ma wɔlɔ‐wɔlɔ ta wɔlɔ‐wɔlɔ.

¹⁴Tiɛ ɣa Iinɔ ɣɛni Gala daa woo wosu é vile te va. Na ɣa ga Iinɔ nii é ɣɛni nu zuwui zei‐zu dɔfela kelei zu é ziɣi Adã na dɔ ziɛgi zu ma. É ɣɛni tea, “A wɛlɛ. De maliɣii vaani ga wulu puugɔ na keelaitiɛ zu te wuloai su leelaa maʋaa ma.

¹⁵É nii ɣɛɛni ga é nu pɛ maʋaa‐wogi ɣaa leve. Na ɣa ɣɛɛ na taitiɛ ɣaazɔ te ga Gala tuo‐wo tala vea towaa ta Ɣala tuo‐wo tala zɔgitiɛ vɛɛ te va ga faa. Na ɣa ga te ɣɛɛ‐zɔgi niitiɛ te te ɣɛɛ ga Gala tuo‐wo tala vele ta faa yowũ woitiɛ ɣaazɔ Gala tuo‐wo tala ʋaa yowũ‐ɣɛɛ veaitiɛ te boga ga Gala daa.”

¹⁶Numai niitiɛ ta ga zili‐zaɣa vea te ga numaitiɛ te weli gɛ lɛ te yii zoga te vilegɛi ta ŋɛni‐wõi‐leve‐ma luoi wulu. Ta ga yoka‐teve vea ga laa wala, tiɛ daa‐maa‐lɛɛ yãka wo ga numaa ŋɛni zɔlɔ‐wo faa ma natiɛ ya.

¹⁷Kɛ̀ ẁõila veaitiɛ, kɛni wa ɣi zɛ nii zu. Na ɣa ga faitiɛ de maliɣii Ziizɛ Kolai na keelaitiɛ te zɛni ná luo te bo.

¹⁸Te ɣɛni wo ma, “Gaa‐ƃela‐suvɛ ŋɛɛ‐wulo‐su vea ta vaazu ɣɛɛzu na te vilegɛi ta ƃɔɔ Ɣala tuo‐wo tala ŋɛni‐wõi‐leve‐mai wulu.”

¹⁹Niitiɛ ɣa te vaazu ga gaa‐wɛɛ ʋai. Ta ga ŋeteai nii zu vea te valagɛi Gala baa ŋinɛgi ma.

²⁰Kɛ̀ wa dɛi, wai wo ga ẁõila veaitiɛ, a wiɛ li ga yee luo vele wa yee‐la‐mai mavele ma nii maa wuai. A Gala feli, wa Ɣala‐feliai yìɛ ɣɛ Gala baa ŋinɛgi zaala zu.

²¹A ƃɔɔ ɣata Gala na wõila luoi zu. A ɣaazu kɛ de maliɣii Ziizɛ Kolai na gaazu‐maa‐wõi‐ɣai luo é yɛsu wo zɛʋui nii zɔlɔ wo kwɛ̃ɛ gɛ lɛ ba.

²²A maa‐wõi‐ɣaa wo ga numai niitiɛ sakpe ge te yii zu.

²³A te valo te ƃolo pele ma wiɛ ŋabui zu. A maa‐wõi‐ɣai wo ƃalaa pɛ ga zɔitiɛ, wa maa‐wõi‐ɣai zupuai ga duo. Kɛ̀ seɣei ƃalaa é te ma a zili ga natiɛ. Na ɣa ga seɣei niitiɛ ta ʋaa‐yowũ‐ɣɛɛ ŋɛni‐wõi‐leve‐mai vilegɛi su te ya ga ŋɛni wo.

²⁴Tɔwɔ zobo ka Gala bɛ ga é ƃaa wo maazu wo mɛ lɛ loo. Towaa va ga wiɛ ná saala‐malai zu wo ɣɛ ga nui kawɔ‐zu lɛ ɣɛɛ maʋaa va yíɛ kɛ kuu‐zu‐nɛɛ‐wuloa maazu.

²⁵Tɔ ɣilekpu kpẽi ka é ga Galagi é ga de valo nui. De maliɣii Ziizɛ Kolai zaala zu tɔ ɣa saala‐mala, nu walala, maazu‐ʋaa‐wo‐bo faa é vɛɛ gaa‐ƃaa va te yɛga máʋaa ma wɔlɔ, te wɔnɔ máʋaa ma zai ŋɛ ni ƃalaa, tɔ nɔ ɣa ta yɛ wɔnɔ máʋaa ma wɔlɔ‐wɔlɔ ta wɔlɔ‐wɔlɔ. Towaa ɣɛ ŋɛ na.