Read Loma FAA WULOAI KƐNƐ MA 10 Bible Online

FAA WULOAI KƐNƐ MA 10 - Loma bible

FAA WULOAI KƐNƐ MA 10

¹Na ɣɛɛzu gìɛ wɛlɛ na wulu Gala ta ɣeela va kée ɣaa ƃai. É wuloni gee‐zuvɛ yíɛ yii. Máa ƃitigɛi ɣɛ ga tine ƃili, kpalanana ge wũ ba. Gáazuvɛ wuloai ɣɛ è ɣɛ folo, kɔ́wɔitiɛ wuloai è ɣɛ ŋabu‐zo ka ɣɛ ƃeƃezu.

²Kpiti kɔlɔ wolo ta ɣɛni zéea dáa laogɛi. Na ɣa ɣɛɛ na é yee‐za kɔwɔi vileni yuwu ɣa, kɔ́wɔ‐yee kɔwɔi wɔ ge kake ɣa.

³É zɛba sa é loba è ɣɛ zala ɣa ɣɛ zukɛsu. Tei é lobani, gee ƃɛdɛ lɔfelaitiɛ woo lɛɛni.

⁴Tei sa gee ƃɛdɛ lɔfelai woo lɛɛni, gè ɣɛni gè te woi wu kɔlɔ ma. Kɛ̀ gè woo ta mɛnini é wulo gee wɔlɔgi zu yíɛ ɣɛ mà, “Nii gee ƃɛdɛ lɔfelai boga, laa wulu ma. Mɛ lɛ ponɛ kɔlɔ ma.”

⁵Na ɣa ɣɛɛ na Gala ta ɣeelai nii gè pɛtɛni loni yuwu ɣa ta zui, é yee‐zagi wu ziɣini é tete gee wɔlɔgi ma.

⁶É wonani Galagi nii na daa‐zeigi zu yá yɛ ŋetea wɔlɔ‐wɔlɔ ta wɔlɔ‐wɔlɔ. Na ɣa ga nii é gee‐zuvɛ ƃɛtɛni é vɛɛ su ŋɛnia va, é zui ƃɛtɛ wɔnɔ é vɛɛ su ŋɛnia va, é yuwu ƃɛtɛ wɔnɔ é vɛɛ bu ŋɛnia va. Towa Gala ta ɣeelai nii wonani ná daa‐zeigi zu ga ɛ́ lɛ sa ga too‐pulu ʋaa.

⁷Kɛ̀ siɛgi ɣa ziiti na ga Gala ta ɣeelai dɔfela kelei na dɔ wui woo lɛ, Gala zeea ʋai nii doowugɛi, pagɛ é leve ma, è ɣɛ velei é boni la ná tii‐ɣɛɛ veai niitiɛ ma te ga dáa woo‐wo beaitiɛ.

⁸Na ɣa ɣɛɛ na woi nii é wuloni gee wɔlɔgi zu gè mɛni, é boni wɔnɔ mà yíɛ ɣɛ mà, “Li, è kpiti kɔlɔi nii ziɣi dáa laogɛi Gala ta ɣeelai ya é loni yuwu ɣa ta zui.”

⁹Na ma gè liini gè bo Gala ta ɣeelai ma ga é kpiti kɔlɔ woloi ʋe zèea. Tɔwɔ é ɣɛni mà, “Siɣi è mi. Towaa wãla è wuu‐zuvɛ, kɛ̀ towaa yɛmi è laavɛ è ɣɛ kõei.”

¹⁰Kpiti kɔlɔ woloi zo pele ɣa na ɣɛ bɛ̀ Gala ta ɣeelai ya gè mi. É yɛmini dàavɛ è ɣɛ kõei. Kɛ̀ tei gè miini, é kɛɛni kògi zu ɣɛ ga ŋɛnii wãlai.

¹¹Na ɣa ɣɛɛ na te boni mà te ɣɛ mà, “Kɛni kɔnɔ yà Gala daa woi wo é vile nu lamaa va ta zii lamaa é vɛɛ zii woo lamaa‐wo bea va ta ɣalaso tamaa.”