Read Loma FAA WULOAI KƐNƐ MA 11 Bible Online

FAA WULOAI KƐNƐ MA 11 - Loma bible

FAA WULOAI KƐNƐ MA 11

¹Tei sa na wuloni ba, te ŋɛni‐wɔ̃ɔ gulu ta ʋeeni zèea ɔ̀ ka ga tukpo. Te bo sa mà te ɣɛ mà, “Wu ziɣi è Gala‐feli wɔta walai wɔ̃ɔ é vɛɛ Gala‐zeke‐kɛɛ vanagi va. Na ɣa ɣɛɛ na niitiɛ te Gala felizu na, è te lodo.

²Kɛ̀ siɣigi é Gala‐feli wɔta walai ma, mɛ lɛ nà wɔ̃ɔ. Ƃe na va. Ƃɔvɛlaale féevɛ zii ƃalaa‐gitiɛ ya. Ta taa maa wuai nii ɣizi wɔwɔ wu ɣalo zee naagɔ kai felegɔ yee wu.

³Na ɣa ɣɛɛ na gà gaa‐ƃaa ʋe nà seele felegɔitiɛ ya ga te Gala daa woi wo folo wulu gila wũ felegɔ zee lɔzitai nii yee wu, te maa ɣiliai ga seɣe yaŋala yíɛ dɛ ga te maa wõivɛ.

⁴Seele felegɔi niitiɛ ɣa te ga “ale” wulu felegɔitiɛ ta labo‐zei ŋɛni felegɔitiɛ te vileni zui maliɣii laa wu.

⁵Tɔwɔ ani nu nɛpɛ ka ɣɛ na é ŋada zei te va, ŋabu ɣa wulo te la é te wɔɔ yɔ̃wɔitiɛ ƃɔɔ ɣala ʋũa. Ani nu nɛpɛ ka ɣɛ na é ŋada zei te va, vele ɣa na maa nɛɛ manui zaa la.

⁶Gaa‐ƃaa ɣa te ya ga te gee wɔlɔgi laa wulu, kɛɛ ʋaa ma tine nɛpɛ ge mɛ lɛ pu siɛgi na zu ta ɣɛ Gala daa woi wosu la. Gaa‐ƃaa ɣa wɔnɔ te ya ziɛitiɛ maazu ga te te wote ga ŋama. Na ɣa ɣɛɛ na tiɛ va ga faa ƃoei zii ɣaazɔ zui zu ga siɛgi nɛpɛ yá nɛɛ la te vɛ.

⁷Tɔwɔ ta wolo na ta yekegi ma, suoi nii yá wulo ƃɛkpɛ zeɣei zu towaa kɔɔ loo te ma zée leve te va é te vaa.

⁸Te mawomaitiɛ wɔ ta ɣɛ laani kui yɔɔzu taa walai nii ʋaa va ta tili ga Saadɔ̃ ta Iije sakpe goo zu. Ná ɣa te te maliɣii ƃakoni na gului ma.

⁹Numaa ta wulo zii ɣaazɔ zu te wulo zii woo‐wo bea ɣaazɔ zu ta zuu ɣaazɔ tiɛ wɛlɛ te mawomaitiɛ va folo saagɔ ta tikpe zee wu. Tɛ lɛ ƃega te va tɔ te loowu.

¹⁰Na ɣa ɣɛɛ na taitiɛ ta ɣɛ zui ɣa ta te mawuu‐zu‐nɛɛ wulo tiɛ kuu ɣa tiɛ ɣiini maa wu. Ƃɔvɛlaale Gala daa woo‐wo bea felegɔi niitiɛ te ɣɛni te va ga taƃa.

¹¹Kɛ̀ tei sa folo saagɔ ta tikpegi leveni, ʋululai mayɛʋui wuloni Gala zeea é loo te zu te wu ziɣi sa te lo. Tɔwɔ taitiɛ ɣaazɔ te wɛlɛni te va, duo ƃakpa vilini te ma.

¹²Na ɣɛɛzu nu felegɔi niitiɛ te woo ta mɛni sa é wulo Gala ta yíɛ ɣɛ te ma, “A va!” Te ɣɛ sa tine ƃiligi zu te lɛ gee wɔlɔgi zu te wɔɔ yɔ̃wɔitiɛ ɣaazu ma.

¹³Tei ƃɔɔ nɔ na ɣɛɛni, zui ƃelini yíɛ wu su. Taa walai ɣaa wɛi su puu mazɛvɛ gila ge woloni é vɛɛ su. Nu wulu dɔfela ɣa é zaani zuu‐ƃeli ʋai nii zu yíɛ wu su. Nui mataitiɛ te zuwuni te va te Galagi nii laa maa lɛ é gee‐zuvɛ.

¹⁴Kpaloi fele kelei levega ɣa na a ɣɛ. Sava kelei wɔ maa lɛ sa woozaa ga é va.

¹⁵Na ɣɛɛzu Gala ta ɣeelai dɔfela kelei yíɛ ná pui ʋɛ. Doba gooni te ɣɛni sa lɛɛzu gee wɔlɔgi zu tiɛ ɣɛ tea, “Zui mamasadai ɣɛɛ sa ga de maliɣii Gala na masada ta nuí nii é yee ƃadoga bá. Towaa masadai ɣɛ wɔlɔ‐wɔlɔ ta wɔlɔ‐wɔlɔ.”

¹⁶Nuwuti yee felegɔ kai naagɔi sa é ɣɛni zeini masa kpɔkpɔgitiɛ ɣa Gala daa wu te vɛɛni te Gala feli.

¹⁷Te ɣɛni ɣɛɛzu tea, “Yài è ga gé maliɣii, gaa‐ƃaa pɛ maƔalagi, yài è na, yà wɔ nɔ ɣa wɔnɔ è ɣɛni na, è mama ga tei è yà ɣaa‐ƃaa walai ziɣia è yà masada‐ɣɛi lɔɔ zei.

¹⁸Ziitiɛ te woei leveni. Kɛ̀ yà yii‐ɣaa‐wãlai vaani ta siɛgi saa vea ta ʋaa‐wogi ɣaa levezu la. Siɛgi ziitia yà lii‐ɣɛɛ veaitiɛ‐wulo ʋaa ma ta lii zu‐lɔnɔ ma. Natiɛ ta ga è laa woo‐wo beaitiɛ, ta niitiɛ te wuloai su leelaa ga yà dɔa, é vɛɛ niitiɛ va ta luo yà laa‐zeigi va, manu vɛlɛ‐vɛlɛga vɛɛ maƃaazaga va. Na ɣa ɣɛɛ na siɛgi ziitia wɔnɔ niitiɛ zu― ŋala‐ŋala faa ma te ga zui‐zu‐ŋala‐ŋala beaitiɛ.”

¹⁹Tei sa na ɣɛɛni, Gala‐feli wɔta walai é Gala ta dáa laoni nu yìɛ wɛlɛ kãla‐ŋalagi nii va na deʋei mawɔlɔi su. Na ɣa ɣɛɛ na mea‐mea ɣɛni kulozu, ná woi ƃaazagɛi. Gee ƃɛdɛ ɣɛni toozu, zui ɣìɛ ƃeli yíɛ wu su, sakwɔti ƃaazaga tiɛ wu.