Read Loma FAA WULOAI KƐNƐ MA 13 Bible Online

FAA WULOAI KƐNƐ MA 13 - Loma bible

FAA WULOAI KƐNƐ MA 13

¹Gè wɛlɛni wɔnɔ file zuo ta va yíɛ wulo yuwu wu. Wũgi ɣɛni gá lɔfela, melai puu, masa bɔɔlɔ puugɔ wɔ ge melaitiɛ ɣa. Na ɣa ɣɛɛ na Gala daa‐ŋala‐ŋala daa‐zei ponɛi ɣɛ wũgi ɣile‐giledai ma.

²Tɔwɔ file zuoi na gè pɛtɛni kpɛtɛ velei wuloai ɣɛ è ɣɛ koei, kɔ́wɔitiɛ wuloai ga suo ƃakpai nii ta tili ga “bɛɛ” nà wɔwɔi ɣavele. Na ɣa ɣɛɛ na dáavɛ wuloai ɣɛ è ɣɛ zala laa ɣavele. Tɔ wɔ ka ŋɛni maa‐yiki‐yikigi na gaa‐ƃai ʋeeni zéea ta ná masa kpɔkpɔgi é vɛɛ maazu‐ʋaa‐wo‐bo gaa‐ƃaa walai va.

³Ŋada zeiyai ɣɛ wũgitiɛ te ɣila ba ƃɔɔ ga nii yá zoo é nu vaa. Kɛ̀ ŋada ƃakpai seiyai ɣɛ wũgi va minɛ valoni. Zuu pɛ ge vileni sa file zuoi wulu máʋai te ɣaazu ga faa maa‐wɔlɔ‐wɔlɔ.

⁴Nu ƃusea te ɣɛni ŋɛni maa‐yiki‐yikigi ʋelizu, toku ge zei ga é ná gaa‐ƃai ʋeeni file zuoi ya. Na ɣa ɣɛɛ na te ɣɛni file zuoi ʋelizu tiɛ ɣɛ tea, “Ƃɛ ɣa é ga file zuoi ɣavele? Ƃɛ ɣa a zoo é ŋapi wɔ pɔ́?”

⁵Te ʋaani bu file zuoi ya ga é ƃɔɛ ga laa wala yíɛ Gala daa‐ŋala‐ŋala kpɔɛi wo. Te ʋaani wɔnɔ bu zéea ga é tii ɣɛ ga maazu‐ʋaa‐wo‐bo gaa‐ƃai ɣalo zee naagɔ kai felegɔ yee wu.

⁶É laa ziɣini ma ga é Gala daa‐ŋala‐ŋala kpɔɛi wo yíɛ nà ná daa‐zeigi ŋala‐ŋala é vɛɛ nà ɣɛɛ‐zuvɛ va. Na ɣa sa ga taitiɛ te ɣɛɛ‐zuvɛ ga Gala ta.

⁷Te ʋaani ƃalaa bu zéea pɛ ga é kɔɔ loo Gala na dɔ numaitiɛ ma zée leve te va. Gaa‐ƃaa ʋeeni zéea zii pɛ maazu é ʋe zéea nu pɛ maazu é ʋe zéea zii woo‐wo bea ɣaazɔ maazu é ʋe zéea zuu ɣaazɔ maazu.

⁸Na ɣa ɣɛɛ na taitiɛ ɣaazɔ te zui ɣa ta feli. Na ɣa ga taitiɛ ɣaazɔ ta laa‐zeigi lɛ ŋɛni wonɛni ʋululai mawɔlɔi zu ŋeteai maʋaa lɔɔ é vɛɛ zeizu. Tɔ ga Baala Zuwui nii te paani nà na kɔlɔi.

⁹Nui nɛpɛ faa‐mɛni gui wũ ba, pagɛ é nii mɛni. Na ɣa ga,

¹⁰Ani tɔ ga nu ta nɛpɛ na sei tuo ga te so kɔɔ zu, kɔɔ‐zo nɔ ɣa yá wo ga manui. Ani nu nɛpɛ ka nu vaa na ga boa zɔkpɔ, boa zɔkpɔ nɔ ɣa maa nɛi te manui vaa la. Nii ɣa é zaƃu ɣɛɛ Gala na dɔ numaitiɛ ta yii‐lɔɔ‐wulo ʋai va ta zee‐la‐ma ɣɛɛ ʋai te ya.

¹¹Kwɛ̀lɛ vele ɣa na wɔnɔ é ɣɛ file zuo ta ƃɔnɔ ba é wulo zui wu. Melai ɣɛni bá fele è ɣɛ velei baala zuwu la. Tɔwɔ é ƃɔɛni è ɣɛ ŋɛni maa‐yiki‐yikigi.

¹²Towa é file zuo maa wũgi na maazu‐ʋaa‐wo‐bo gaa‐ƃai malii ɣaazɔ ɣɛɛni nà ɣaazu ma. Na ɣa ɣɛɛ na towaa kɛ zui vɛɛ gáa vea ɣaazɔ va te file zuo maa wũgi ʋeli. Na ɣa ga nii ŋada ƃakpai zeiyai ɣɛ ba, tɔwɔ é valo.

¹³File zuoi fele kelei ɣa faa ƃaazaga ɣɛ. Towaa kɛ ƃalaa ŋabu yìɛ wulo gee wɔlɔgi zu yíɛ wu zui ma numaa ɣaazu ma.

¹⁴Faa ƃaazagitiɛ te ʋai bu ga yíɛ te ɣɛ file zuo maa wũgi ɣaazu ma, fai niitiɛ te mavele ma, towaa numaitiɛ ɣaa wɔlɔ te zui ɣa yíɛ te leʋe ga te po‐kɔ̃ɔ kpɛtɛ file zuoi nii ʋaa ma ŋada zeiyai ɣɛ ba ga boa zɔkpɔ, tɔwɔ zɛʋui yɛ zéea.

¹⁵Te ʋaani bu file zuoi fele kelei ya ga é zɛʋu loo ƃalaa file zuo maa wũgi mawo‐kɔ̃ɔgi zu yíɛ ƃɔɛ. Na ɣa ɣɛɛ na é ɣɛ ga zaƃu taitiɛ tɛ lɛ file zuo maa wũgi mawo‐kɔ̃ɔgi ʋelia te te vaa.

¹⁶Na ɣa ɣɛ kɔnɔ ga zaƃu nu pɛ, mavɛlɛ‐vɛlɛ ge vɛɛ maƃaaza ba, kpɛtɛ vea vɛɛ mɔɔlɛ vea va, wɔɔlɔa te vɛɛ dua va, ŋɛni ɣɛ te yee‐zagitiɛ ɣa ga nu yee‐wo ɔɔ é ɣɛ te lodala‐vɛtiɛ.

¹⁷Nii ɣa ɣɛ, kɛɛ ʋaa ma nu ta nɛpɛ ge mɛ lɛ ŋɛni ɣeea ɔ́ nɔ ɣɛ ga é ŋɛni zɔ̃wɔ wulo, ani nu yee‐wogi lɛ manui va. Na ɣa ga file zuoi na daa‐zeigi ɔɔ ná daa‐zeigi manaƃai.

¹⁸Maa nɛɛvɛ nu ɣele‐ɣele fai nii zu. Nui nɛpɛ yá faa ɣaa ɣa, pagɛ é file zuoi manaƃai zu zei. Toku ge zei ga naƃai na zu‐wulo‐zu ɣa ga nu ƃuse na daa‐zei. Naƃai ƃɔɔ ɣa ga wũ dɔzita zee lɔzita kai lɔzita.