Read Loma FAA WULOAI KƐNƐ MA 14 Bible Online

FAA WULOAI KƐNƐ MA 14 - Loma bible

FAA WULOAI KƐNƐ MA 14

¹Kwɛ̀lɛzu gìɛ Baala Zuwui ɣa loni gizi gwalai Zaayã ma, nu wulu wũ gila zee naagɔ kai naagɔ loni kóba. Na ɣa ga niitiɛ ta ƃɔga kéea Gala ta laa‐zeigi wonɛi ɣɛ te lodalavɛtiɛ.

²Tei sa na ɣɛɛni, gè woo ta mɛnini gee wɔlɔgi zu è ɣɛ ziɛ lamaa zulu ti. Tigi wuloai ɣɛ ga gee ƃɛdɛ li kpakpa. Woi gè mɛnini kúloai ɣɛ è ɣɛ kweni‐gãi bea ta ɣɛ ta wenigitiɛ ŋaisu te woo yìɛ lɛ.

³Na ɣa ɣɛɛ na te ɣɛni gui niinɛ loozu masa kpɔkpɔgi laa wu tiɛ too ʋulu ŋɛni naagɔitiɛ laa wu tiɛ too wɔnɔ nuwutiitiɛ laa wu. Nu ta nɛpɛ gɛ lɛ ƃega gui na maa woli é wulo nu wulu wũ gila zee naagɔ kai naagɔi natiɛ wulu wũ‐maa‐wogi woni ga tiɛ ga te wulo zui va.

⁴Ta ga numai niitiɛ tɛ lɛ ƃɔɔ maa woolani ga ŋaza nu yeke‐kɛɛ. Ƃɔvɛlaale tɛ dɛ ŋaza nu yeke kɛɛni. Ta ga numai niitiɛ ta vile Baala Zuwui wulu tiɛ li vɛ nɛpɛ nà ɣa ɣɛ liizu na. Numai niitiɛ ɣa te wuloa nu ƃusea zu wũ‐maa‐wogi wo ga tiɛ ga te ɣɛ ga Gala kpɔga Baala Zuwui ta lɔnɔ‐ba ŋɛni maa wũga.

⁵Tɔwɔ nu lɛ zɛɛ ʋaa nɛpɛ pɛtɛni te la. Toku ge zei ga kawɔ‐zu wolo ƃalaa lɛ te maʋai va.

⁶Gè wɛlɛni na wulu Gala ta ɣeela va tɛ́i ƃɔɔ yíɛ wove. Woo niinɛ vagɔi nii yá yɛ na wɔlɔ‐wɔlɔ ta wɔlɔ‐wɔlɔ nà zéea yíɛ mawoi wo ga woo maa zeezea taitiɛ ma te zui ɣa. É ɣɛni bosu zuu pɛ ma yíɛ bo zii pɛ ma yíɛ bo nu pɛ ma.

⁷É ɣɛni bosu ga woo wala yíɛ ɣɛ tea, “A luo Gala ba wo dáa maa lɛ, ƃɔvɛlaale faa‐wo gaa‐leve ziɛgi ziitia. A nui nii ʋeli é zui ƃɛtɛni ta gee é yuwu ƃɛtɛ é vɛɛ ziɛ ɣaigitiɛ va.”

⁸Na wulu Ɣala ta ɣeelai nii é ɣɛni ga fele kelei é vileni púlu yíɛ ɣɛ tea, “Golovɛ, golovɛ, Babelɔ̃ laa ƃakpa walai wolovɛ! Towa é kɛɛ zii pɛ ge ŋasa vai mayiɛi nii ƃoale é ga ná maa‐wuo lalai maŋɛni‐wõi‐leve‐mai.”

⁹Na ɣa ɣɛɛ na Gala ta ɣeelai zɔi é ɣɛni ga te zava kelei nà vileni te wulu yíɛ bo ga woo wala yíɛ ɣɛ tea, “Ani nu nɛpɛ ka file zuoi ʋeli na é vɛɛ mawo‐kɔ̃ɔgi va, na ɣa ɣɛɛ na nà yee‐wo ge ɣɛ tódalavɛ ɔɔ zée va,

¹⁰manui tɔ ƃalaa towaa Gala na zii‐ɣaa‐wãlai maŋasa vai mayiɛi ƃoale. Towaa wu ná zii‐ɣaa‐wãlai mawɔpui zu, tɔwɔ ɛ́ lɛ zupua ga ŋɛni ta. Na ɣa ɣɛɛ na taƃa ɣa wo da ga ŋabu ta fukɛ. Nii ɣa ɣɛɛ la Gala ta ɣeelaitiɛ ɣaazu te maa wuai é vɛɛ Baala Zuwui va.

¹¹Ŋabui yá ɣɛ te ɣalazu tiɛ laƃa máluulii ɣa ɣɛ lɛɛzu gee‐zuvɛ wɔlɔ‐wɔlɔ ta wɔlɔ‐wɔlɔ. Doowo nɛpɛ gɛ lɛ ɣɛɛ te ya kpidi vɛɛ folo va. Natiɛ ta ga numai niitiɛ ta ɣɛ file zuoi ʋelizu ta mawo‐kɔ̃ɔgi ɔɔ nui nɛpɛ ná daa‐zeigi ɣa ɣɛ bá ga zée‐wo.”

¹²Nii ɣa é ga Gala na dɔ numaitiɛ ta yii‐lɔɔ‐wulo zaƃui ta. Na ɣa ga niitiɛ te ziɛzu ga Gala na tɔgitiɛ tiɛ ɣata laa va ga Ziizɛ.

¹³Gè woo ta mɛnini wɔnɔ é wulo Gala ta yíɛ ɣɛ tea, “Nii wonɛ: Tuuyiɛ ɣa saa veai niitiɛ ma ta za te ɣɛɛ vele ma su ɣilekpu ta de maliɣiini é ziɣi zai ŋɛ ni ma é li ga túo.” Gala baa ŋinɛgi ɣa ɣɛɛzu tea, “Nà ɣa ɣɛ kai! Na ɣa ɣɛ ga te ta mɔɔlɛi maloowo bo, ƃɔvɛlaale te ɣɛɛ ʋai mawulo‐nu‐mai ɣa ɣɛ te wulu te lii la.”

¹⁴Kwɛ̀lɛzu wɔnɔ gìɛ tine ƃili kwele pɛtɛ. Ŋɛni ɣɛni zeini tine ƃiligi maazu kúloai ga nu ƃuse. Zɛni masa bɔɔlɔ ge ɣɛni wũmɔ boa ƃili gaa‐liɛ‐liɛ ge zéea.

¹⁵Gala ta ɣeelai ta wuloni sa Gala‐feli wɔta walai wu, nui nii é ɣɛni zeini tine ƃiligi maazu yíɛ nà lili ga woo wala yíɛ ɣɛ má, “Yà woai wulo na è mɔlɔi leve. Ƃɔvɛlaale mɔlɔ‐leve ziɛgi ziitia. Toku ge zei ga zui‐ɣa mɔlɔi ƃoeivɛ sa ga daa ʋega.”

¹⁶Nui nii é ɣɛni zeini tine ƃiligi maazu, kapa vele ɣa na ɣɛ ga ná boai é pili zui ma. Zui‐ɣa mɔlɔ ƃoei leve sa.

¹⁷Na wulu Ɣala ta ɣeela wuloni wɔnɔ Gala‐feli wɔta walai wu Gala ta. Tɔ ƃalaa boa ƃili gaa‐liɛ‐liɛ ge ɣɛni zéea.

¹⁸Keelai ta ƃɔnɔ ge wuloni Gala‐zeke‐kɛɛ vanagi ɣalamavɛ, na ɣa ga keelai nii gaa‐ƃaa zéea ŋabu maazu. Nui nii boa ƃili gaa‐liɛ‐liɛgi ɣɛni zéea, é ɣɛni nà lilisu ga woo wala yíɛ ɣɛ tea, “Yà woai wulo ga è ŋasa vaa ƃufɔ‐ƃufɔgi ɣaa lɛ ba zui ɣa. Ƃɔvɛlaale zui‐ɣa ŋasa vaitiɛ te ƃoeivɛ sa.”

¹⁹Gala ta ɣeelai ɣapa vele ɣa na ɣɛ ga ná boa ƃiligi é pili zui ma. É zɛba sa é ŋasa vaitiɛ ɣaa lɛ ba zui ɣa é te wu ŋasa‐vaa‐ɣizi kɔɔwɔi nii zu é ga Gala na zii‐ɣaa‐wãlai.

²⁰Tei sa na ɣɛɛni, te ŋasa vai ɣizini kɔɔwɔi zu taa wuluvɛ vele. Ŋama wuloni ŋasa vai va maƃĩigi la é ziiti maali wũ felegɔ ziɛ‐wo‐su zeligo. Ŋamai é wuloni su súwuai ɣɛ ga ɔ́ zoo é nu zo kwɔda.