Read Loma FAA WULOAI KƐNƐ MA 15 Bible Online

FAA WULOAI KƐNƐ MA 15 - Loma bible

FAA WULOAI KƐNƐ MA 15

¹Gè wɛlɛni wɔnɔ po‐kɔ̃ɔ ta va gee‐zuvɛ yíɛ dɛ ga seele ga faa ƃoei ɣa vaazu vaazu, é ga fai gwala ƃakpai maa‐wɔlɔ‐wɔlɔgɛi. Faa ƃoei lɔfela ɣɛni Gala ta ɣeela lɔfela ya. Na ɣa ga faa ƃoei niitiɛ te ga maɣaa‐ƃelagitiɛ. Toku ge zei ga ta ɣa Gala na zii‐ɣaa‐wãlai maʋaa wɛ̃ɛgɛi te va.

²Gè wɛlɛni ŋɛni ta va kuloai è ɣɛ pɛtɛ gáa yìɛ li sɛŋɛ̃i sú puai ga ŋabu. Gè wɛlɛ wɔnɔ numai niitiɛ va te yee leveni file zuoi va ta mawo‐kɔ̃ɔgi é vɛɛ ná daa‐zeigi manaƃai va. Gè te vɛtɛni loni pɛtɛgi nii woba gáa ɣɛni liízu sɛŋɛ̃i Gala na kwenigitiɛ te te ya.

³Te ɣɛni sa Mooze laa wui loozu. Na ɣa ga Mooze nii é ga Gala na tii‐ɣɛɛ nui. Gui nii ɣa ga Baala Zuwui na gui. Te ɣɛni toozu tiɛ ɣɛ tea, “Ee, yài è ga gé maliɣii è ga gaa‐ƃaa pɛ ma Ɣalagi, è ɣɛɛ ʋaitiɛ wala ƃakpavɛ te maa wɔlɔ‐wɔlɔgɛi! Yài è ga zii pɛ ta ɣalasogi, è luo velei ɣa pele ma é ga gaama!

⁴Ƃɛɛ ƃɔ pa ka ɛ́ lɛ lua ɔ́ ƃaa la yà laa‐ziegi ma, yài è ga gé maliɣii? Ƃɔvɛlaale yà ɣilekpu kpẽi nɔ ɣa è maa wuai. Zii ɣaazɔ ɣa va é è ʋeli, toku ge zei ga yà ʋaa‐wo gaa‐leve ʋai maʋaa wuloa kɛnɛ ma.”

⁵Tei na wuloni ba, gè wɛlɛni gè Gala‐feli wɔta walai vɛtɛ Gala ta dáa laogɛi. Seɣe vɛlɛi nii é Gala‐feli wɔta walai ʋaa va yá dɛ ga Gala ge vaa na, nà ɣɛni na ƃalaa pɛ.

⁶Na ɣɛɛzu Gala ta ɣeela lɔfelaitiɛ te wulo sa Gala‐feli wɔta walai wu te va faa ƃoei lɔfelai te ya. Te maa ɣiliai ɣɛ ga seɣe wele yíɛ ʋolo. Na ɣa ɣɛɛ na te ɣeke‐suvɛtiɛ ɣiliai ɣɛ ga zɛni saama‐ɣiliga.

⁷Ʋulu ŋɛni naagɔitiɛ te ɣila ge zɛni koko lɔfela ʋeeni Gala ta ɣeela lɔfelaitiɛ ya. Kokoi natiɛ laa ʋegɛi ɣɛ ga Gala na zii‐ɣaa‐wãlai. Na ɣa ga Galagi nii yá yɛ na wɔlɔ‐wɔlɔ ta wɔlɔ‐wɔlɔ.

⁸Gala‐feli wɔta walai laa ʋegɛi ɣɛ ga duuli Gala na saala‐malai mavele ma ta ná gaa‐ƃai. Nu ta nɛpɛ gɛ lɛ ƃega zoo ɔ́ lɔ Gala‐feli wɔta walai wu é yɛsu Gala ta ɣeela lɔfelaitiɛ ta ʋaa ƃoei lɔfelaitiɛ te wɛ̃ɛ.