Read Loma FAA WULOAI KƐNƐ MA 16 Bible Online

FAA WULOAI KƐNƐ MA 16 - Loma bible

FAA WULOAI KƐNƐ MA 16

¹Tei na ɣɛɛni, gè woo ta mɛnini Gala‐feli wɔta walai wu tiɛ bo ga woo wala Gala ta ɣɛɛla lɔfelaitiɛ ma tiɛ ɣɛ te ma, “A li na wo Gala na zii‐ɣaa‐wãlai mawoko lɔfelaitiɛ zu wo zui zu.”

²Na mavele ma Gala ta ɣeela maa wũgi liini é ná dɔ wokoi zu wo zui zu. Na ɣɛɛzu, pala maa‐yɛ̃ɛlɛ‐yɛ̃ɛlɛgi nii é ɣɛ ƃɔɔ ga palai gwala ɣa nu laƃa é looni numai niitiɛ va file zuoi yee‐wo ge ɣɛni te va te ga numaitiɛ te file zuoi mawo‐kɔ̃ɔgi ʋelini.

³Gala ta ɣeelai fele kelei wɔ ge zɛba do é ná dɔ wokoi zu wo yuwu wu, nà ɣɛ ga nu woma maŋama ɣavele. Na ɣa ɣɛɛ na ʋulu ŋɛnii nɛpɛ é ɣɛni yuwu wu te zaani.

⁴Gala ta ɣeelai sava kelei ná dɔ wokoi zu woni ziɛ walaitiɛ wu ta ziɛ ɣaigi zɔitiɛ. Natiɛ wɔ te ɣɛ ga ŋama.

⁵Na ɣɛɛzu gìɛ Gala ta ɣeelai nii woo mɛni é ɣɛni ziɛi ʋaa ma yíɛ ɣɛ tea, “Yà dɛi ɣa pele ma yà ʋaa‐vɛɛ ʋai zu numai niitiɛ va. Yài è maa wuai, yà ɣa è na yà wɔnɔ ɣa è ɣɛni na.

⁶Ƃɔvɛlaale nu ƃusea te kɛɛni yà dɔ numai zɔitiɛ vɛɛ è laa woo‐wo beaitiɛ va te maŋamai wu. Tɔwɔ è ŋama ʋeea te ya ga te kpoale. Nà zolowogɛ te ma ga te kɛ!”

⁷Gè woo ta mɛnini é wulo Gala‐zeke‐kɛɛ vanagi ɣalama yíɛ ɣɛ tea, “Ooi, gé maliɣii Gala, yài gaa‐ƃaa pɛ é è ya, yà ʋaa‐vɛɛ ʋai nu va tɔ pele ma é ga gaama!”

⁸Gala ta ɣeelai naa kelei ná kokoi zu woni foloi ma. Tɔwɔ gaa‐ƃaa ʋeeni zéea ga é nu ƃuse ɣala ga ŋabu.

⁹Nu ƃusea wɔ te ɣalani sa ga maƃadi maa‐yiki‐yikigi. Tei na ɣɛɛni te Gala daa ŋala‐ŋalani. Na ɣa ga Galagi nii gaa‐ƃaa zéea faa ƃoei niitiɛ maazu. To mu tɛ lɛ wulu ɣaa ʋeni ta ʋaa yowũi va tɔ ƃaa la Gala ma.

¹⁰Gala ta ɣeelai doolu kelei ná dɔ wokoi zu woni file zuoi na masa kpɔkpɔgi ma. Ná masadai wɔ ge vilini sa kpidi zu. Nu ƃuse ɣɛni sa yĩ gaa miizu taƃa ƃakpa maazu.

¹¹Te gee wɔlɔ Gala laa ŋala‐ŋalani sa ta laƃai ʋaa ma ta palai é ɣɛni te va. To mu tɛ lɛ wulu ɣaa ʋeni te ɣɛɛ‐zɔgitiɛ va.

¹²Gala ta ɣeelai dɔzita kelei ná dɔ wokoi zu woni ziɛ ƃakpa walai wu dáa ga Yuufileiti. Nà wɔ ge ʋɔɔni su kɛɛ ʋaa ma pelei ƃɛtɛ folo wulo‐zu vele ɣalasogitiɛ luo.

¹³Gè wɛlɛni gɔʋɛ yowũ maa‐yɛ̃ɛlɛ saagɔ va te wuloai ga zɔlɔga tiɛ wulo ŋɛni maa‐yiki‐yikigi la ta file zuoi é vɛɛ zɛɛ ʋaa Ɣala daa woo‐wo nui va.

¹⁴Ta ɣa te ga gɔʋɛ yowũitiɛ tiɛ faaniga ɣɛ tiɛ dɛ ga seelea. Ta li woozala zui wɔlɔ‐kɔlɔ ma ɣaali ɣalaso gwalaitiɛ wɔ vɛ ga te te ɣaa lɛ ba kɔɔ‐wɔɔ ʋaa ma gaa‐ƃaa pɛ maƔalagi na kui ma.

¹⁵Bogɛ Gala bɛ yíɛ ɣɛ tea, “Gà vaazu è ɣɛ wũmɔ nu ɣa ɣɛ vaazu. Tuuyiɛ ɣa nui nii ma é ɣi su, ná seɣeitiɛ te ma, kɛɛ ʋaa ma é mɛ lɛ va ɣɛɛzu ga ƃumɛ numaa tɔ va wɛlɛzu tete va.”

¹⁶Gɔʋɛ yowũitiɛ te ɣalasogi niitiɛ ɣaa lɛɛni sa ba ŋadavɛ vɛ ta ná lili Hiiƃulu woi zu ga Amagɛdɔ̃.

¹⁷Gala ta ɣeelai dɔfela kelei é ná dɔ wokoi zu woni gee‐zuvɛ. Tei na ɣɛɛni, woo ta wuloni Gala‐feli wɔta walai wu é wulo masa kpɔkpɔgi ɣalamavɛ yíɛ ɣɛ tea, “É ɣɛɛ!”

¹⁸Tɔwɔ mea‐mea ge ɣɛni sa kulozu gee ƃɛdɛ yìɛ too. Ná woi wala ƃakpai ɣɛ. Na ɣa ɣɛɛ na zui wala ɣɛni ƃelizu yíɛ wu su ga tiigo lɛ dɛ wɔlɔ ɣɛɛni tei ƃɔɔ nu ƃuse wuloni ŋetea. Vele ɣa na zui wala ɣɛni ƃelizu la yíɛ wu su.

¹⁹Taa ƃakpa walai velini su ga sei‐zu saagɔ. Ziitiɛ ta laa walaitiɛ te woloni te vɛɛ su. Gala kigi yɛni taa walai Babelɔ̃ maʋai zu ga é kɛ nà ná goei‐leve ƃakpai ƃoale mawɔpui zu.

²⁰Ziɛ ligitiɛ zu ɣaazɔ te yɛ̃ɛlɛni. Nu lɛ ŋɛni ɣaazu laa gizi gwalaitiɛ te ta nɛpɛ ma.

²¹Sakwɔtii natiɛ te gila na bii ɔ́ zoo é ziiti mɔlɔ ƃeki gila su te ɣɛni wulozu gee‐zuvɛ tiɛ loo nu ƃuse ma é yɛsu natiɛ te Gala daa ŋala‐ŋala sakwɔtii maʋaa ƃoei ʋaa ma. Vele ɣa na faa ƃoei na maa yikigɛi ɣɛ la.