Read Loma FAA WULOAI KƐNƐ MA 21 Bible Online

FAA WULOAI KƐNƐ MA 21 - Loma bible

FAA WULOAI KƐNƐ MA 21

¹Na ɣɛɛzu gìɛ wɛlɛ gee wɔlɔ niinɛ va ta zuu niinɛ. Ƃɔvɛlaale gee wɔlɔ maa wũgi vɛɛ zuu maa wũgi va te maʋaa ƃeani sa gá, yuwu wɔ gɛ lɛ ŋɛni sa na wɔlɔ‐wɔlɔ.

²Tei sa na ɣɛɛni, gè wɛlɛni taa wala maa wuai va. Na ɣa ga Yɛlusulɛɛ maniinɛi kuloai ɣɛ Gala zeea gee wɔlɔgi zu yíɛ yii. Maʋai ɣavele ƃɛtɛi ɣɛ è ɣɛ ŋaza nui te vaazu kulozu ga ŋaza máa ɣa ɣili pɔɔ nu ʋaa ma.

³Gè woo wala ta mɛnini sa é wulo masa kpɔkpɔgi ɣalamavɛ yíɛ ɣɛ tea, “Wɛlɛ! Gala kɛɛ‐zuvɛ ɣa sa nu ƃuse zaama. Towaa yɛ sa te zaama. Na ɣa ɣɛɛ na ta sa ta ɣɛ ga ná numaa. Gala kagi ɣa sa a ɣɛ te zaama é ɣɛ ga ta Ɣala.

⁴Towaa te ɣaazu maa yiɛi ɣaazɔ ƃale te ɣaazu. Saa lɛ sa wɔlɔ‐wɔlɔ ɣɛɛ na ɔ́ nɔ ɣɛ ga te yii zuuli te wɔlɔ, ɔɔ taƃa maʋaa ta nɛpɛ ge ɣɛ sa na. Ƃɔvɛlaale faa wɔlɔ‐zaɣagitiɛ te maʋaa ƃea ɣa na a ɣɛ gá.”

⁵Nui wɔgi sa é ɣɛni zeini masa kpɔkpɔgi ɣa é ɣɛni tea, “Wɛlɛ! Gè fai pɛ kɛɛ ga maniinɛ.” É ɣɛni wɔnɔ tea, “Nii wonɛ, ƃɔvɛlaale kulovɛ bu woi niitiɛ vɛ ga nu la ga tiɛ te ga gaama woo.”

⁶É ɣɛni mà, “É ɣɛɛ! Nà ɣa gè ga Afa ta Womeega. Na zu‐wulo‐zu ɣa ga tɔɔ‐zei‐zu ƃɔga daa‐wulo‐zu. Taitiɛ kpoale‐wõi te ma, gà ziɛ ʋe te ya sɔ̃wɔ ʋaa lɛ ɣɛɛ ba. Towaa wulo ʋululai mayiɛ ɣaigi zu.

⁷Nui nii zée ɣa ziɛ ná wu, towa kwèligi nii ɣa ɣɛ ga pó. Gà ɣɛ ga manui na Gala, tɔ wɔ é ɣɛ ga dùu.

⁸Kɛ̀ niitiɛ te ga duo vea ta niitiɛ nu lɛ laa ga tiɛ, niitiɛ te wɔtɔgɛi, nu‐vaa vea, kui‐yɔɔzu wɛ̃ɛ‐ziɛ‐bo bea, maa‐wɔlɔ‐wɔlɔ sale yeke‐kɛɛ vea, maa‐niini gala zeke‐kɛɛ vea, te vɛɛ zɛɛ ʋaa vea ɣaazɔ va, ta dɛi yá ziiti te ma tɔ ga ŋabu yɛkɛ‐yɛkɛgi yá ɣɛ zosu fukɛ va. Na ɣa é ga sai fele kele.”

⁹Tei sa na wuloni ba, Gala ta ɣeela lɔfelaitiɛ koko lɔfelai ɣɛni te ya daa ʋegɛi ga faa ƃoei ɣaa‐ƃela dɔfelaitiɛ te ɣila ge vaani é ƃɔɛ pɔ̀. É ɣɛni mà, “Va. Gà ŋaza nui nii lɛɛzu ga yìɛ te vaazu kulozu, nii é ga Baala Zuwui ŋazai.”

¹⁰Gala baa ŋinɛgi ná wuuni gàazu Gala ta ɣeelai li sa gàazu gizi kooza kpakpa wala ma. É taa wala maa wuai lɛɛni sa gàazu nii é ga Yɛlusulɛɛ nii é wuloni Gala zeea gee‐zuvɛ yíɛ yii.

¹¹Gala na saala‐malai ɣɛni ʋolozu è ɣɛ tɔnɔ‐ba wɔtii nii maʋaa ƃai, kuloai ga tɔnɔ‐ba wɔtii nii daa ga “jɛsipɛ” é yele‐kele è ɣɛ kwɔtii nii nu ɣaazu ɣa folo.

¹²Siɣigi titigɛi ɣɛ tai nii ma gwala ƃakpai ɣɛ gáa woozai dáa vele‐zuvɛ puu kai fele. Gala ta ɣeela puugɔ kai felegɔ ɣa é ɣɛni siɣigi laavɛtiɛ. Yezɔi dea zinaa puugɔ kai felegɔi manu zuwu zei‐zu puugɔ kai felegɔitiɛ ta laa‐zeigi wonɛi ɣɛ siɣigi laavɛtiɛ.

¹³Siɣigi laa vele‐zuvɛ ɣɛni ba sava ga folo wulo‐zu vele, é ba sava ga nu yee za‐su vele folo wulo‐zu vele ʋaa va, é ba sava ga nu wɔwɔ yee‐su vele folo wulo‐zu vele ʋaa va, é wɔnɔ ba sava ga folo lii‐zu vele.

¹⁴Siɣigi lɔɔ‐vile kwɔtiitiɛ te ɣɛni puu kai fele. Na ɣa ɣɛɛ na Baala Zuwui na keela puugɔ kai felegɔitiɛ ta laa‐zeigi wonɛi ɣɛ kwɔti puugɔ kai felegɔi niitiɛ ma.

¹⁵Gala ta ɣeelai nii é ɣɛni ƃɔɛzu pɔ̀, ŋɛni‐wɔ̃ɔ ŋɛni ɣɛni zéea kpɛtɛi ga zɛni. É ɣɛni zéea ga é taa walai wɔ̃ɔ da ta maziɣigi é vɛɛ maziɣi zeɣeitiɛ laavɛ va.

¹⁶Tai ɣakama naagɔitiɛ te ɣɛni ga lii‐tii. Yãkpa‐zuvɛ ƃɔga kogi zu te ɣɛni nɔ ga tii. É tai wɔ̃ɔni ga nɛni‐wɔ̃ɔ ŋɛnii nii. Ɔ́ zoo é ɣɛ ga maali wulu ɣila wũ dooluo. Yãkpa‐zuvɛ, kogi zu é vɛɛ gaavɛ zeligoi va te ɣɛni nɔ ga lii‐tii.

¹⁷É maziɣigi wɔ̃ɔni ƃalaa wɔnɔ. É ɣɛ ga kɔwɔ lo‐su wũ felegɔ maazu puugɔ kai lɔzita nu ƃuse ŋɛni‐wɔ̃ɔgai zu. Nu ƃuse ŋɛni‐wɔ̃ɔgai wɔ nɔ ɣa Gala ta ɣeelai kɔ̃ɔni la.

¹⁸Siɣigi logɛi ɣɛ ga tɔnɔ‐ba wɔtii nii daa ga “jɛsipɛ”. Tai wɔ togɛi ga zɛni kpɔɔƃɔɔ é yele‐kele è ɣɛ gelasi.

¹⁹Tai maziɣigi lɔɔ‐vile‐suvɛ ƃɛtɛi ɣɛ ga tɔnɔ‐ba wɔti mazii ɣaazɔ. Mamaa wũgi ɣɛni ga tɔnɔ‐ba wɔtii nii da ga “jɛsipɛ”, fele kelei laa ga “safai”, sava kelei laa ga “eigɛ”, naa kelei laa ga “ɛmɛlɔ”,

²⁰doolu kelei laa ga “wɔnikisi”, dɔzita kelei laa ga “kaniilĩa”, dɔfela kelei laa ga “kelesolai”, dɔsava kelei laa ga “bɛɛlɔi”, taawu kelei laa ga “topɛɛ”, puu kelei laa ga “kelesopee”, puugɔ kai ɣile kelei laa ga “jeesĩ”, puugɔ kai fele kelei laa ga “ɛmɛse.”

²¹Siɣi zeɣe puugɔ kai felegɔi maƃogitiɛ te ɣɛni ga ʋolo‐ʋolo puugɔ kai fele. Kpo ɣile‐giledai ƃɛtɛi ɣɛ ga ʋolo‐ʋolo kpume ɣile‐gile. Pele‐vɛɛgi é ɣɛni tai zu kpɛtɛi ɣɛ ga zɛni kpɔɔƃɔɔ. Nu ɣaazu ɔ́ folo nɔ, è ɣɛ velei gelasi la.

²²Tɔwɔ gɛ̀ lɛ ŋɛni wɛlɛni Gala‐feli wɔta walai va tai zu. Toku ge zei ga maƔala‐feli wɔta walai ɣa ga de maliɣii Gala nii gaa‐ƃai ƃɔgɔpɛ ge zeéa. Gala‐feli wɔta walai ɣa ƃalaa nɔ wɔnɔ ga Baala Zuwui.

²³Folo maƃala lɛ tai nii ma ga é too su ɔ́ nɔ ɣɛ ga ɣalo maƃala ɣɛ ma ga é ʋolo su. Toku ge zei ga Gala na saala‐malai ɣa é ga maŋada wodoai. Laboi wɔgi é na tɔ ga Baala Zuwui.

²⁴Máʋoloi ɣa ziitiɛ ta ziɛ ma. Na ɣa ɣɛɛ na zui‐ɣa ɣalasogitiɛ ta va ga ta zaala‐mala zɔɔlai.

²⁵Máziɣi zeɣeitiɛ laa lɛ wɔlɔ‐wɔlɔ wuluga ga gela‐boga. Kpidi lɛ ʋɔlɔ vɛɛ na.

²⁶Ziitiɛ ta zaala‐ma zɔɔlai vɛɛ ta ƃaa‐la‐mai va, ta va ga tiɛ tai nii zu.

²⁷Kɛ̀ ŋɛnii nɛpɛ maa lɛ ziɣini ɛ́ lɛ lɛɛ na. Ɔ́ nɔ ɣɛ ga nui yá ɣɛ tuoi nii wosu bɛlɛ lɛ nu vɛ ɔɔ yíɛ zɛɛ ʋaa luo wo. Kɛni nɔ numai niitiɛ te laa wonɛi Baala Zuwui na ʋululai mawɔlɔi zu.