Read Loma FAA WULOAI KƐNƐ MA 3 Bible Online

FAA WULOAI KƐNƐ MA 3 - Loma bible

FAA WULOAI KƐNƐ MA 3

¹É ɣɛni mà, “Niitiɛ wonɛ Gala ta ɣɛɛlai wɔ é Saadi Ɣala pɛlɛi ʋaa ma. “Bo má ga nui Gala na gaa‐ƃaa ŋɛni lɔfelaitiɛ te zéea ta sɔmɔ deka lɔfelai, dáa woo ɣa ga nii. Tɔ ɣɛɛzu tea, ‘Gè wa liitiɛ wɛ̃ni. Daa‐zeigi ɣa wo va ga wa fáa ma, tɔwɔ wo maʋaa wũ bu zai.

²Nii wo yɛga ma maʋaa ɣɛ é ƃea gá, nii sa é yɛga na wulu a ɣaazu lao na wo maʋaa wũ bu ziɣi. Ƃɔvɛlaale gɛ̀ dɛ wɛlɛni wa liitiɛ va tɔ ɣɛ ga ŋɛnii nii maa‐wulo‐zu lɛ maʋaa va nà Galagi ɣaazu.

³Na ma nii wo maa zɔlɔ woga ta nii wo mɛniga, a ɣi zɛ su. A ɣata nà va wo wulu ɣaa ʋe wa ʋaa yowũi va. Wɛ lɛ ɣɛni ɣɛɛni ɣi su, gà va è ɣɛ wũmɔ nu ɣa ɣɛ vaazu. Tɔwɔ wɛ lɛ sa kwɛ̃ɛga ga siɛgi gà wulo la wo maazu.

⁴Na pɛ ge ɣɛɛvɛ nu ɣile‐gilega ta wo zaama Saadi te ga numaitiɛ tɛ lɛ ta zeɣeitiɛ zu ƃabalani. Ta vɛɛ bà gá tiɛni gíɛ ziɛ seɣe wele ge gé ma, ƃɔvɛlaale kulovɛ bu te vɛ.

⁵Nui zée ɣa ziɛ ná wu, manui maa ɣa ɣili ŋɛ na ga seɣe wele. Na ɣa ɣɛɛ na gɛ̀ lɛ ná daa‐zeigi wuloa ʋululai mawɔlɔi zu. Gà máʋaa wulo la gè bo kèea Gala gaazu ta ná keelaitiɛ.

⁶Nui faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma.’ ”

⁷É ɣɛni mà, “Niitiɛ wonɛ Gala ta ɣeelai wɔ é Filadɛɛfia Ɣala pɛlɛi ʋaa ma. “Bo má ga nui kuloai su leelaa Gala faa ma é ga gaama nui nii Deeve vɛlɛi mayiliɣii zéea é ga nui nii yá daa lao nu nɛpɛ gɛ lɛ daa wuluga, yá daa wulu wɔnɔ nu nɛpɛ gɛ lɛ daa laoga, dáa woo ɣa ga nii.

⁸Tɔ ɣɛɛzu tea, ‘Gè wa liitiɛ wɛ̃ni. A wɛlɛ, gè kpo daa laoga wo luo nii zobo gɛ lɛ nu nɛpɛ bɛ ɔ́ daa wulu. Gè kwɛ̃ni ga gaa‐ƃaa wolo nɔ ɣa é wo ya. Na pɛ ge ɣɛɛvɛ wo ɣɛɛvɛ ziɛzu ga gòi, wɛ lɛ nà daa‐zeigi maʋaa zakpeni.

⁹A wɛlɛ! Niitiɛ te nɔ ga numaitiɛ te ɣaa kpɔgɛi Seeta ma tiɛ bo ga ta ga Dusia tɔwɔ tɛ lɛ le kɛ̀ tiɛ nɔ zɛɛ ʋaa wo, gà kɛ te va te vɛɛ wo wɔwɔ wu te kwɛ̃ ga gè wo wõiya.

¹⁰Tei tɔwɔ wo zia ga gòi gè boga wiɛ ga wo yii la, su‐wɔ̃ɔ siɛgi é vaazu zuu pɛ su ga su‐wɔ̃ɔ ge wo ga numaitiɛ te zui ɣa, gà wo wuo maʋai zu.

¹¹Su lɛ woozasu gè va. A ɣata nii va wo kɛɛzu, kɛɛ ʋaa ma nu ta mɛ lɛ va wa ƃaa‐la‐ma wɔɔlɔgi ziɣizu.

¹²Nui nii zée ɣa ziɛ ná wu, gà kɛ manui ɣɛ ga nà Galagi‐ʋeli wɔtai mazei‐bui ta. Manui lɛ wɔlɔ‐wɔlɔ wuloa bu. Gà nà Galagi na daa‐zeigi wonɛ manui ma ta nà Galagi na taa walai na daa‐zeigi. Na ɣa ga Yɛlusulɛɛ niinɛi nii é vaazu wulozu gee‐zuvɛ nà Galagi ya. Gè nà ƃɔɔ nà daa‐zeigi wonɛ wɔnɔ manui ma.

¹³Nui faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma.’ ”

¹⁴É ɣɛni wɔnɔ mà, “Niitiɛ wonɛ Gala ta ɣeelai wɔ é Laodisia Ɣala pɛlɛi ʋaa ma. “Bo má ga nui dáa ga “É ɣɛɛ la” é ga seele ƃɔɔƃɔɔgi nii nu ɣa laa la, é wɔnɔ ga Gala kpɛtɛ ŋɛniitiɛ te maʋaa lɔɔ‐zei‐zuvɛ, dáa woo ɣa ga nii.

¹⁵Tɔ ɣɛɛzu tea, ‘Gè wa liitiɛ wɛ̃ni. Wo ɣaa lɛ leini, wo ɣaa wɔ gɛ lɛ wɔnɔ wui‐wuini. Kùu zu ɔ́ nɛɛ ga ani wo ɣaa ɔ́ lei na ɔɔ ani wo ɣaa ɔ́ wui‐wui na!

¹⁶Na ma tei tɔwɔ wɛ lɛ leini ɔ́ nɔ ɣɛ ga wo ʋile wo nɔ dɔ̃‐dɔ̃, gà laa lifesu ga wiɛ.

¹⁷Ƃɔvɛlaale wa ɣɛɛzu tea, gé ƃɛtɛvɛ, ŋetea nɛi gé ma, ŋɛni ta nɛpɛ maƃala lɛ gé ma. Tɔwɔ wɛ lɛ kwɛ̃ni ga wo yii zuulivɛ wo maa wõiyai wo mɔɔlɛi wo ɣaazu wuai tete loai wiɛ.

¹⁸Na ma gà wo lɛnɛsu ga wo zɛnigi ɣeea mà nii maa ziɣiai ŋabu vɛ, kɛɛ ʋaa ma wo ɣɛ ga kpɛtɛ vea. A seɣe wele geea mà ga wo ɣabei nii é ga wũfe faa wo máa loowu nu mɛ lɛ pɛtɛ. A gulo ƃadi ɣeea mà nii wa pu ɣaazu ga wo wɛlɛ.

¹⁹Numai niitiɛ gè te wõini gà yii ɣaa wãla te ma gè te ɣɛɛ‐zɔ kulo te yee ma. Na ma a wɔɔlɔ màʋai zu wo wulu ɣaa ʋe faa yowũ va.

²⁰A wɛlɛ! Gà loni kpo zeɣei la gìɛ tuƃo. Ani nu nɛpɛ ka gòi mɛni na, towaa kpogi laa lao gè lɛ pɛlɛi wu gè li pɔ́ vɛ gé laa mi gá tɔ.

²¹Nui zée ɣa ziɛ ná wu, gà ʋa bu zéea ga gá tɔ gé zei nà masa kpɔkpɔgi ɣa, è ɣɛ velei nɔ zèe ziɛni la ná wu gá kèea Gala gé zei ná masa kpɔkpɔgi ɣa.

²²Nui faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma.’ ”