Read Loma FAA WULOAI KƐNƐ MA 4 Bible Online

FAA WULOAI KƐNƐ MA 4 - Loma bible

FAA WULOAI KƐNƐ MA 4

¹Tei sa nii wuloni ba, nài gè ga Jɔ̃, gè ɣɛni gè kɛ gè wɛlɛ kpo ba daa laogɛi Gala ta! Woo maa wũgi gè mɛnini yíɛ ƃɔɛ pɔ̀ ɔ̀ ka è ɣɛ puu woo. É ɣɛni mà, “Va vɛ. Fai nii ɣa wulo na ba, nii é vaazu ɣɛɛzu ƃɔɔ ti gà sa gà dɛ ga yìɛ.”

²Gala baa ŋinɛgi kɛɛni fai nii ɣalama wu gàazu ga maa ʋilea. Masa kpɔkpɔ ge ɣɛni loni Gala ta, nu ta zeini gá.

³Nui wɔgi é ɣɛni zeini gá é ɣɛni ʋolozu è ɣɛ tɔnɔ‐ba wɔti mazii zei‐zu felegɔi niitiɛ ta ƃoei. Na ɣa ɣɛɛ na kpalanana titegɛi ɣɛ masa kpɔkpɔgi ma kuloai è ɣɛ tɔnɔ‐ba wɔti ƃoi‐ƃoi.

⁴Masa kpɔkpɔ zee felegɔ kai naagɔ ɣa masa kpɔkpɔgi nii maa litigɛi ɣɛ bɛ. Nuwuti zee felegɔ kai naagɔ wɔ ge ɣɛni zeini kpɔkpɔgi niitiɛ ɣa, te maa ɣiliai ga seɣe wele, zɛni masa bɔɔlɔ ge te wũmɔ.

⁵Mea‐mea ɣa kulozu masa kpɔkpɔgi nii ɣalamavɛ, wooniga tiɛ wulo na, gee ƃɛdɛ li giɛ lɛ na. Na ɣa ɣɛɛ na ŋabu ɣa sɔmɔ gili lɔfela ɣalazu masa kpɔkpɔgi laa wu. Natiɛ wɔ ka te ga Gala na gaa‐ƃaa ŋɛni lɔfelaitiɛ.

⁶Masa kpɔkpɔgi laa‐wuvɛ yà wɛlɛ ná ɣavelei va è ɣɛ pɛtɛgi nu ɣa vɛtɛ su gáa yiɛ li sɛŋɛi. Tɔwɔ masa kpɔkpɔgi ɣakama ɣile‐gilegi é yɛsu é lite da ʋulu ŋɛni naa‐naa ka natiɛ te ɣaazu ɣɛzɛ siai te va ti‐li. Tɔ ga te wulu vele ta te luo vele.

⁷Ʋulu ŋɛni maa wũgi ɣa ga zala ɣavele, fele kelei wɔ ge ga nikɛ zinɛ ɣavele. Nu ƃuse ɣaazu ɣa é ʋulu ŋɛni sava kelei va. Naa kelei wulovɛ è ɣɛ kooɣɛi é wovesu.

⁸Tɔwɔ ʋulu ŋɛni naagɔitiɛ te ɣile‐giledai wovɛ ka te va ga dɔzita‐dɔzita te maa litegɛi te ɣaazu ɣɛzɛgitiɛ vɛ, ta pɛ ga te wuu zu vele. Na ɣa ɣɛɛ na tɛ lɛ wɔlɔ ƃɔlɔga gui‐loa va kpidi vɛɛ folo va. Ta ɣɛɛzu tea, “Gaa‐ƃaa pɛ maƔalagi, gé maliɣii maa wuovɛ, máa wuovɛ, máa wuovɛ! Towa é ɣɛni na, é wɔnɔ na yíɛ va wɔnɔ vaazu!”

⁹Nui nii é zeini masa kpɔkpɔgi ɣa é ga nui yá yɛ na wɔlɔ‐wɔlɔ ta wɔlɔ‐wɔlɔ, siɛ nɛpɛ ʋulu ŋɛni naagɔitiɛ ta ƃaa‐la‐ma wui loo na nui na ma ta wũfe‐ma wui ta mama‐feea bɛ́,

¹⁰nuwuti yee felegɔ kai naagɔitiɛ ta vɛɛ zuwãvɛ nui nii laa wu é zeini masa kpɔkpɔgi ɣa te féli. Na ɣa ga nui nii yá yɛ na wɔlɔ‐wɔlɔ ta wɔlɔ‐wɔlɔ. Ta ta wɔɔlɔgitiɛ la masa kpɔkpɔgi laa wu tiɛ gui loo tiɛ ɣɛ tea,

¹¹“Kulovɛ bu yìɛ, yài è ga gé maliɣii è ga gá Ɣalagi, ga saala la yìɛ, wũfe‐ma wo ga yìɛ, è gaa‐ƃaa maa zɔlɔ wo. Toku ge zei ga yà ɣa è ŋɛni pɛ kpɛtɛni. È yii‐mai mavele ma ɣa te ɣɛɛ la ŋetea, è yii‐mai mazaƃui nɔ te ƃɛtɛi la.”