Read Loma FAA WULOAI KƐNƐ MA 7 Bible Online

FAA WULOAI KƐNƐ MA 7 - Loma bible

FAA WULOAI KƐNƐ MA 7

¹Tei sa nii wuloni ba, gè wɛlɛni Gala ta ɣeela naagɔ va te loni zui mazoku naagɔitiɛ zu te yee zui maʋãga zei‐zu naagɔitiɛ va, kɛɛ ʋaa ma fãga nɛpɛ ge mɛ lɛ va zui ɣa ɔɔ yuwu ɔ́ nɔ ɣɛ ga te va te zei gului ta nɛpɛ su paalii.

²Kwɛ̀lɛ vele ɣa na Gala ta ɣeelai ta ƃɔnɔ ba é wulo ga folo wulo‐zu vele ʋululai maƔalagi na kɔlɔ‐laa‐ƃakpa ŋɛnii zéea. Gala ta ɣeela naagɔi niitiɛ gaa‐ƃaa ʋeeai ɣɛ te ya ga te ŋada zei zui va ta yuwu, é natiɛ lilini ga woo wala

³yíɛ ɣɛ tea, “A mɛ lɛ ŋada zei zui va ta yuwu é vɛɛ guluitiɛ va é yɛsu gé kɔlɔ‐laa‐ƃakpa ŋɛnii vɛɛ da Ɣalagi na tii‐ɣɛɛ veaitiɛ lodala ga zée‐wo.”

⁴Nu liigoi wɔgi kɔlɔ‐laa‐ƃakpa ŋɛnii vɛɛni todala te tiigoi laa woni gè mɛni. É ɣɛni ga wulu puugɔ kai felegɔ zei‐zu puu kai fele. Nu wuloni Yezɔi nu zuwui mazii ɣile‐giledai ɣaazɔ zu te kɔlɔ‐laa‐ƃakpa ŋɛnii vɛɛ te lodala.

⁵Wulu puugɔ kai felegɔ wuloni Juda manu zuwui zu te pɛɛ te lodala. Wulu puugɔ kai felegɔ wulo Luibɛ̃ manu zuwui zu. Gaa manu zuwui, nu wulu puugɔ kai felegɔ wulo na zu.

⁶Wulu puugɔ kai felegɔ wulo Asɛ manu zuwui zu, wulu puugɔ kai felegɔ wulo Nafetali manu zuwui zu, wulu puugɔ kai felegɔ wulo Manasa manu zuwui zu,

⁷wulu puugɔ kai felegɔ wulo Simiã manu zuwui zu, wulu puugɔ kai felegɔ wulo Liiʋai manu zuwui zu, wulu puugɔ kai felegɔ wulo Isaka manu zuwui zu,

⁸wulu puugɔ kai felegɔ wulo Zɛbulɔ̃ manu zuwui zu, wulu puugɔ kai felegɔ wulo Zoosɛ manu zuwui zu, na ɣa ɣɛɛ na wulu puugɔ kai felegɔ wulo Bɛ̃jemɛɛ manu zuwui zu te pɛɛ te lodala.

⁹Tei sa na wuloni ba, gè wɛlɛni gè kpɔ kpakpa vɛtɛ nii nu nɛpɛ gɛ lɛ ƃega zoo ɔ́ gaa lu. Te wuloni zui ɣaazɔ zu, te wulo zii ɣaazɔ zu, te wulo zii woo‐wo bea ɣaazɔ zu. Te ɣɛni loni masa kpɔkpɔgi laa wu te loni Baala Zuwui laa wu, te maa ɣiliai ga seɣe welega dɔɔ laɣaga te te ya.

¹⁰Te ɣɛni bosu ga woo wala tiɛ ɣɛ tea, “Balolai ɣa ga gá Ɣalagi nii wo é zeini masa kpɔkpɔgi ɣa é wɔnɔ ga Baala Zuwui wo.”

¹¹Gala ta ɣeelaitiɛ ɣaazɔ te loni sa te masa kpɔkpɔgi maa lite te nuwutiitiɛ maa lite é vɛɛ ʋulu ŋɛni naagɔitiɛ va. Te vɛɛni masa kpɔkpɔgi laa wu tiɛ Gala feli

¹²tiɛ ɣɛ tea, “Towaa ɣɛ ŋɛ na! Tuuyiɛ, saala‐ma, kele‐ɣele, mama‐feea, wũfe‐ma é vɛɛ zee‐zu‐ƃaa va ta gá Ɣalagi ʋaa ma wɔlɔ‐wɔlɔ ta wɔlɔ‐wɔlɔ! Towaa ɣɛ ŋɛ na!”

¹³Na ɣɛɛzu nuwutiitiɛ te ɣila ge tìli sa yíɛ ɣɛ tea, “Ƃɛ ɣa ga niitiɛ te maa ɣiliai ga seɣe welega? Minɛ ɣa te ziɣia na?”

¹⁴Gè ɣɛ má, “Kèea, yà ɣa è kwɛ̃ni.” É ɣɛ sa mà, “Niitiɛ ɣa te wuloa faa ƃoei walai zu. Te ta zeɣeitiɛ wua Baala Zuwui maŋamai zu te wele.

¹⁵Na ma ta sa Gala na masa kpɔkpɔgi laa wu tiɛ tii ɣɛ bɛ́ féli wɔta walai wu kpidi vɛɛ folo va. Nui wɔgi é zeini masa kpɔkpɔgi ɣa máa niinigi ɣa ɣɛ te maazu kɛ́ɛ vele ma te woba.

¹⁶Pulu lɛ sa wɔlɔ‐wɔlɔ te zoga ɔ́ nɔ ɣɛ ga kpoale‐wõi. Folo lɛ sa te lowaa ɔ́ nɔ ɣɛ ga ŋɛni ƃadii nɛpɛ yá nu maa ɣala.

¹⁷Ƃɔvɛlaale Baala Zuwui é zaama‐zuvɛ masa kpɔkpɔgi ʋaa va towaa ɣɛ ga te maazu‐vɛtɛ nu. Na ɣa ɣɛɛ na towaa zɛʋu‐ʋee yiɛ ɣaigi maa vele wulo ga tiɛ, Gala pɔ ge gwɔlɔ yiɛi ɣaazɔ ƃale te ɣaazu.”