Read MUKANDA WANZAMBI Genese 12 Bible Online

Genese 12 - MUKANDA WANZAMBI bible

Genese 12

¹Henohu Yehova wamwila dehi Abarama, nindi, Nyamukaku mwituŋa denu, nikudi antaŋa jeyi nikumutaŋa watata yeyi, wuyimwituŋa dinakakuleja;

²nakakwila muza weneni, nakakukiswila nkisu, ijina deyi nakaditohesha, antu akakoolekela kudeyi.

³Ana akakukiswilankisu, ami nakayikiswila nkisu; ona wakakushiŋa, ami nakamushiŋa; yisaka yaheseki yejima yakakoolekela kudeyi.

⁴Abarama yonyamuka nikunyamuka, mwomwamulejeliyi Yehova, Loti wayili nindi. Hanyamukiliyi Abarama muHarana washi kili munya kamakumi atanu nayedi nanyaka yitanu.

⁵Abarama wasendeli niŋodindi Sarayi, ni mwana kamana kwindi Loti, nimahetawu ejima apompesheluwu, niantu aheteluwu muHarana; anyamuka nikunyamuka nawu ayi mwituŋa daKenani, ni mwituŋa daKenani dimu mwashikiluwu.

⁶Abarama wahitili mwituŋa nichashikiliyi kwaShekemi, kumukula wakuMore. AKenani mwituŋa mwomwadiŋuwu.

⁷Yehova wadi mwekesheli kudi Abarama, wamwilili nindi, Anyaneyi nakayinka ituŋidi. Kwenoku hakutuŋa kameŋa kakunamutuŋila Yehova wadi mwekesheli kudi yena.

⁸Wafumini kwenoku hakuya kumpidi yekala hambadi yaBeteli yakumusela, yopopelaku niitenti dindi, Beteli kumujika, Ayi kumusela, yena hakachi; kwenoku hakunamutuŋila Yehova kameŋa, liakutambika niijina daYehova.

⁹Abarama hakwenda, yoyaŋa tuhu nakutalisha kukabetaka kuchidiilu.

¹⁰Mwituŋa mwaholokeli nzala. Abarama hakuya muEjipitu nakusha kamaku, muloŋa nzala yaswejeli mwituŋa.

¹¹Cheliliyi hakuya nakushika mwituŋa daEjipitu hakumwila Iŋodindi Sarayi, nindi, Ami neluka dehi eyi wumumbanda muwahi walubanji;

¹²chaka kumonawu aEjipitu, akela nawu, Yeniwu diyi Iŋodindi; akanjaha, hakwila eyikweyi akakuleka mumi.

¹³Wuhoshaŋa mwani, neyi, nimuhelindi; kulondani shakami chachiwahi nibuli kumona kukala hadeyi, nakahandani kuhanda, kulonda akabuli kunjahila hamujimba weyi.

¹⁴Woho, chashikayi Abarama muEjipitu, aEjipitu amutala nimumbanda nawu waswejalubanji.

¹⁵Atulamba twaFwaro niwena amumweni, hiyakumuhameka kudi Fwaro; mumbanda amutwala nikumutwala mwitala daFwaro lwe.

¹⁶Yena hakumwila Abarama chachiwahi nanowu mumbanda; yohetani anyikoku, ni aŋombi, niayimbulu amayala, nianduŋu amayala, nianduŋu awambanda, niayimbulu awambanda, nianŋameli.

¹⁷Yehova wakatishili niFwaro niakwitala dindi chipupu chacheni, nanowu Sarayi iŋodambala daAbarama atambwiliyi.

¹⁸Fwaro wamu tambikili Abarama, nindi, Indi ichi hichumanyi chiwunaŋili? Walekelelidi kinleja neyi hiŋodami?

¹⁹Indi eyi wahoshelelidi neyi himuhelami, mwaka nimusumbulami; iŋodeyi owu, mutambuli, wudiyili kweyi.

²⁰Fwaro wayilejeli antu indi amayala hansaŋu yindi; amutwalaku nimunjila yindi, niŋodindi niyuma yindi yejima.