Read MUKANDA WANZAMBI Genese 14 Bible Online

Genese 14 - MUKANDA WANZAMBI bible

Genese 14

¹Hanyaka hadiŋi niAmirafweli mwanta wakuShinari, niAriyoki mwanta wakuElasari, niKedolawoma mwanta wakuElami, niTidali mwanta wakuGoyimi,

²hiyakudasa njita naBera mwanta wakuSodoma, naBirisha mwanta wakuGomora, naShinabi mwanta wakuAdima, naShemebi mwanta wakuZeboyimi, namwanta wakuBela diyi Zowari.

³Wenawa wejima wawu adibombeleli muchinekineki chakuSidimi, doduŋiya Damuŋwa.

⁴Amulambwili Kedolawoma nyaka ikumi nayiyedi, hamwaka wekumi namuchisatu adikaŋili.

⁵Mwaka wekumi namuchiwana Kedolawoma hakushika, nianyanta adibombeliyi nawu, hakutapani aRefwa muAsheteroti Karanayimi, niaZuzi muHami, niaEmi muShave Kiriyatayimi,

⁶niaHori kumpidi yawu yakuSeyiri, tapee nikuEliparani, kwakwihi nesaŋa.

⁷Afunta nikufunta, ashika nikuEnimishipati, kwoku kuKadeshi, atapa niituŋa dejima dawaAmaleki, atapa niaAmori, ashakamini muHazazoni Tamari.

⁸Nimwanta wakuSodoma, nimwantawa kuGomora, nimwanta wakuAdima, nimwanta wakuZeboyimi, nimwanta wakuBela diwu Zowari, anyamuka nikunyamuka; ayitanjika ninyikankayanjita muchinekineki chakuSidimi;

⁹njita yakudasa naKedola woma mwanta wakuElami, naTidali mwanta wakuGoyimi, naAmira fweli mwanta wakuShinari, naAriyoki mwanta wakuElasari; anyanta awanahiyakulwa nawanyanta atanu.

¹⁰Hakwila ochu chinekineki chakuSidimi chadiŋi chejima kwamachiŋi chiŋi hohu; anyanta akuSodoma nakuGomora hiyakutemuka, hiyakudimbukila kwenoku, anashali hiyakutemukila kumpidi.

¹¹Apupa niyuma yejima yamuSodoma niya muGomora, niyakudya yawuyejima, hiyakudiyila kwawu.

¹²Akwata niLoti mwana kamana kwaAbarama niyuma yindi, aya nikuya.

¹³Kwayili muntu wumu wapulukih, hakuya nakuleja Abarama kaHeberu; yena dinu wadiŋi nakushakama kunyikula yakaAmori Mamiri, mana kwaEshikoli, mana kwaAneri; wenawa adiŋi adikwata wubwambu naAbarama.

¹⁴Abarama chachitiyiliyi nawu mukwawu anamukwati, hakutwala antu indi amayala afundishayi dehi njita, avwalikili hamukala windi, amayala makulakaji asatu namayala ikumi natanu nasatu, hakuyilondela lufuchi nikuDani.

¹⁵Niyena ni ambuŋindi adambwili nawufuku nakuyilotokela, ayitapa nikuyitapa, hiyakuyihaŋa hape-e nikuHoba, wekala hambadi yaDamakasa yachikasa chachimunswa.

¹⁶Waleteli cheŋi yuma yejima, waleteli cheŋi nimana kwindi Loti, niyuma yindi, niambanda niantu.

¹⁷Mwanta wakuSodoma wayili nakumukinkilila chafuntiliyi kwayili yinakutapa niKedolawoma nawanyanta adiŋiyi nawu, kuchinekineki chakuShave, dichi chinekineki chaMwanta.

¹⁸Melekizedeki mwanta wakuSalema wedishili nidinkendi nivinyu; yena diyi wadiŋi kapristu kaNzambi, Nzambi Wabadika Kwiwulu.

¹⁹Yena wamukiswilili Abarama nkisu, nindi, Abarama amukiswili kudi Nzambi Wabadika Kwiwulu, diyi wahetani mawulu nimaseki;

²⁰Kisu kisu Nzambi Wabadika Kwiwulu, nahanikudeyi akwankunyi neyi. Niyena wa ambwili yuma yejima mumaseka ikumi, wamwinkeluku iseka dimu.

²¹Mwanta wakuSodoma wamwilili Abarama, nindi, Nyinkami antu, hakwila eyi wutambuluku yuma.

²²Abarama wamwilili mwanta wakuSodoma, nindi, Ami nololi chikasachami kwiwulu nenyiki kudi Yehova, diyi Nzambi Wabadika Kwiwulu, diyi waheta nimawulu nimaseki,

²³nami, Ami hinukutambula hela kawanda, hela kamwonji kakunkwabilu, hela kachuma keyi kamuku, wakandakela neyi, Ami yami namuhetesheli Abarama;

²⁴chiŋa yoyina yanaduwu anyikwenzi, niyakwinkahu amayala inayili nawu, wowu aAneri naEshikoli naMamiri, wena atambuli mwaka yanzaŋenawu.