Read MUKANDA WANZAMBI Genese 2 Bible Online

Genese 2 - MUKANDA WANZAMBI bible

Genese 2

¹Nimawulu nimaseki ayimanishili ejima, niyuma yekalamu yejima.

²Hefuku damu chitanu nachiyedi Nzambi wakumishili mudimuwindi weliliyi; hefuku damu chitanu nachiyedi walekeli mudimu windi wejima weliliyi.

³Nzambi wakiswilili ifuku damu chitanu nachiyedi nkisu, yodiŋilika nikudiŋilika; muloŋa hefuku odu hohalekeliyi mudimuwindi wakuleŋa wejima weliliyi.

⁴Jendi deŋi nsaŋu jakulepa nimawulu nimaseki hayileŋeluwu, miwifuku deliliyi Yehova Nzambi nimaseki nimawulu.

⁵Henohu hamaseki kanda dehi hekali nyitondu yamumpataku, niyisakola yamumpata kanda yibalukuku; muloŋa Yehova Nzambi henohu kanda anokeshi nvula hamasekuku, hikwadiŋi nimuntu wakudima hesekuku;

⁶ilaŋa mbundu yadini nakuka kumu kahamaseki, nakuzowesha hejima hahita iseki.

⁷Yehova Nzambi wawumbili muntu nalunkuŋu lwamaseki, woneni mumazulu indi munyawawumi, muntu hakwikala mumi.

⁸Yehova Nzambi watumbili itempa kumusela, muEdeni; mwomwashiliyi muntu wawumbiliyi.

⁹Yehova Nzambi wabalwishili hamaseki nyitondu yeyima yikweti lubanji kuyitala, yayiwahi nikuyida; nimutondu wawumi mukachi ketempa, nimutondu wakwiluka nachu niyayi wahi niyatama.

¹⁰MuEdeni mwafumini kaloŋa kakutwala meji mwitempa; kweno kuka ambukili hikakwila tuloŋa tuwana.

¹¹Kakusambila ijina dindi Pishoni, yowu wahita nakunyeŋumuka mpata yejima yaHavila, diku kwekala wuru;

¹²wuru wampata yina wawuwahi; kwekala nibe dolachi nishohama.

¹³Kaloŋa kamuchiyedi ijina dindi Giboni, yowu wahita nakunye pumukampata yaKushi yejima.

¹⁴Kaloŋa kamuchisatu ijina dindi Hidekeli, yowu wahita kumbadi yaAshuri yakumusela. Kaŋa kamuchiwana diyi Yufurati.

¹⁵Yehova Nzambi watweli muntu, yomusha nimwitempa daEdeni, nindi, Kadidimi, kadihembi chachiwahi.

¹⁶Yehova Nzambi wamulejeli muntu, nindi, Nyitondu yamwitempa yejima wukudya tuhu;

¹⁷ilaŋa mutondu wakwiluka nachu niyayiwahi niyatama eyi bayi wakawidyaku; muloŋa ifuku diwakadya chalala wakafwa.

¹⁸Yehova Nzambi welili nindi, Hichinawahi iyala kushakama kankawinduku; nukumwilila nkwashi wamutelela.

¹⁹Yehova Nzambi wawumbi linamaseki nianyama amumpata ejima, niatujila ahaluzwizu ejima, wayitweli nikudi muntu, atali mwakuyitumbayi majina; yuma yejima yikweti wumi majina ejima ayitumbiliyi muntu wowu majinawu.

²⁰Muntu yoyitumba nikuyitumba majina, ni ayimuna ejima, niatujila ahaluzwizu, nianyama amumpata ejima; ilaŋa hikwamwekeni nkwashi yamuntu wamutelelaku.

²¹Yehova Nzambi wamukamikili muntu tulu twatweni, wakaminitulu; hakumunona lubavu lwindi lumu, yowayakeshamu nicheŋi musunyi mulwadiŋi, la-a;

²²lubavu olu lwafumishiliyi Yehova Nzambi mudi muntu watuŋili nachu mumbanda, hakumutwala nikudi muntu.

²³Kuchinka muntu nindi, Iwu neli dehi ifwaha dami, neli dehi mujimba wami; akamutena nawu mumbanda, nanichi chanamu fumishiyi mudiiyala.

²⁴Dichi chakushiyilayi iyala nitata yindi nimama yindi nakumukakela ipodindi; niwena akela mujimba wumu.

²⁵Mwayedi wawuadiŋi nzekesi, nimuntu niŋodindi, hiyatiyili nsonyuku.