Read MUKANDA WANZAMBI Genese 22 Bible Online

Genese 22 - MUKANDA WANZAMBI bible

Genese 22

¹Chimwahitili yumiyi, Nzambi wamwesekeli Abarahama, wamwililinindi, Abarahama. Yena nindi, Vude.

²Welili nindi, Tambulakumwaneyi, weyi wumu hohu wakeŋa, yowu Isaka, wuyi mwituŋa dakuMoriya, kwenoku kudi mpidi yimu yinakakuleja, wakahimulambu li Nzambi akeli himulambu wakushita.

³Abarahama wamenekesheli budidi yayeni, nakulema sadi hachimbulu chindi, hakusenda anyikwenzi indi ayedi, nimwanindi Isaka. Wabalwiliyibalu yahimulambu wakushita, hakunyamuka, hakuya kwamulejeliyi Nzambi.

⁴Ifuku damu chisatu Abarahama wafumbwili mesu indi wamweni kwamulejeliyi Nzambi kwenda kumwekena kwakulehi.

⁵Abarahama hakuyila anyikwenzi indi, nindi, Shalenu kunu nachimbulu, ninami nimukwenzitukuya kwenohu, twakadifukuli kudi Nzambi, twakenza cheŋi, twakayiwana.

⁶Abarahama wanoneni yibalu yahimulambu wakushita, watwikili mwanindi Isaka; wasendeli muchikasa ni kesi, nimpoku; hiyakuya hamu mwayediwawu.

⁷Isaka hakumwila tata yindi Abarahama, nindi, Tata. Yena nindi, Yamonu mwanami. Nindi, Kesi aka, niyibalu iyi, indi mwana kamukoku wamulambu wakushita hayodihi?

⁸Kuchinka Abarahama nindi, Mwanami, Nzambi wukudikeŋela kwindi mwana kamukoku wamulambu wakushita; hiyakuya hamu mwayedi wawu.

⁹Ashika nikushika kwamulejeliyi Nzambi, Abarahama hakutuŋa kamepakwenoku, hakufwikilaku nchawa chachiwahi, hakukasa mwanindi Isaka, hakumukamika hakameŋa hanchawa.

¹⁰Abarahama wolweli chi kasachindi hakunona mpoku, nindi ajahi mwanindi.

¹¹Kaŋelu kaYehova mwiwulu hakumutambika, nindi, Abarahama, Abarahama. Yena nindi, Vude.

¹²Nindi, Bayi wukwata hadi mukwenzuku, bayi wumwila chumaku; ichi dinu neluka dehi nami eyi wamwakamaŋa Nzambi, nanichi chiwunabuli kuŋu mina mwaneyi, yowu weyi wumu hohu.

¹³Abarahama yofumbulani kufumbula mesu indi, nindi atali, chizambowu nakakeli dehi nsepujindi kuchiputa chadipi kunyima yindi. Abarahama hakuyaku nakumukwata, hakuhimulambu la hihimulambu wakushita, wakuhipisha mudi mwanindi.

¹⁴Abarahama henahana watumbiluhu ijina, nindi dihu haYehova Yire; mwomwelaŋawu nilelu, nawu, Hampidi yaYehova akayimwenachu.

¹⁵Kaŋelu kaYehova mwiwulu watambikili Abarahama ipampa dikwawuda muchiyedi,

¹⁶nindi, Yehova nahoshi nindi, Nanochu chiwuneli chumichi, chiwunabuli kuŋumina mwaneyi, weyi wumu hohu, nadisanyikiami aweni,

¹⁷nami, kukukiswila nkisu nakakukiswila, nikuvulisha nakakuvulishila anya neyi, akavula neyi tutumbwa twamwiwulu, neyi wusekululawekala hachi kumu chakaluŋalwiji. Anyaneyi akaheta chisu chawayilumbujawu.

¹⁸Kudi anyaneyi nyuza yejima yahamaseki yakawenaku kukooleka, nanochu chiwunovwahili mwizu dami.

¹⁹Abarahama wafuntili cheŋi kudi anyikwenzi indi, anyamuka nikunyamuka, hiyakuya chimu kuBerisheba. Abarahama hakushakama kuBerisheba.

²⁰Chimwahitili yumiyi, amulejeli Abarahama, nawu, Milika niyenanavweli mana kweyi Nahori anyana;

²¹niwedi windi Uzi, nimana kwindi Buzi, niKemuweli tata yaArami,

²²niChesedi, niHazo, niPilidashi, niYidilafwi, niBetuweli.

²³Betuweli wavweli Rebeka. Wenawa atanu nasatu wowamuvweleliyi Milika Nahori, diyi mana kwaAbarahama.

²⁴Mumbanda windi wanduŋu, ijina dindi Rewuma, niyena wavweli niTeba, niGahami, niTahashi, niMayaka.