Read MUKANDA WANZAMBI Genese 28 Bible Online

Genese 28 - MUKANDA WANZAMBI bible

Genese 28

¹Isaka wamutambi kili Yakoba, wamukiswilili nkisu, wamulejelinindi, Bayi wakasumbula mumbanda wamunu muKenanuku.

²Nyamukaku, wuyi kuPadani Arama, kwaBetuweli, nkaka yeyi wavwelimama yeyi, wusumbwiluku mwana kamandumi yeyi Labani.

³Nzambi Chinaweji akakukiswili nkisu, akakukwilishi nsemi, akakuvulishi, wakeli mukanka waweni wanyichidi yawantu.

⁴Akakukiswili nkisu yaAbarahama, akakwinkichu nineyi nianyaneyi hamu, kulonda wakaswani ituŋa diwashakama, damwinkeluwu Abarahama kudi Nzambi.

⁵Isaka wamwilili Yakobanindi, Yaŋa; hakuya kwindi kuPadani Arama, kudi Labani, mwana kaka-Siriya Betuweli, yowu mana kwaRebeka, mama yaYakoba naEsawu.

⁶Esawu wamweni Isaka namukiswili dehi Yakoba nkisu, namutemeshi dehi nindi yaŋa kuPadani Arama wakasumbwiluku mumbanda; wamweni chamukiswilayi Isaka, hakumuleja nindi bayi wakasumbula mumbanda wamunu muKenanuku;

⁷wamweni Yakoba niyena novwahili dehi mamatindi natata yindi, nayi dehi nikuPadani Arama.

⁸Esawu wamweni komana tata yindi Isaka hayi keŋeli ambanda akuKenanuku,

⁹niyenaEsawu hakuya kwindi kudi Ishimeli, hakusumbwilaku Mahalati, mwanaka Ishimeli mwana kaAbarahama, muhela Nebayoti, alunjiki hadi aŋodi ŋindi adiŋiyi nawu.

¹⁰Yakoba wafumini kuBerisheba, hakuya kuHarana.

¹¹Washikiliha kadisaŋa kamu, wakamini kwenoku wufuku wejima, muloŋa itaŋwadina humi dehi; wanoneni ilola dimu dakwenoku, wasachililuhu namutuwindi, wakambamini kwokwenoku.

¹²Waloteli ndalu yakwimika heseki, insa yayu yashika nimwiwulu; aŋelu jaNzambi hiyakukandaminahu, hiyakusulukilahu.

¹³Kutala Yehova nemani hewulu, hakwila nindi, Yami Yehova, Nzambi yatata yeyi Abarahama, Nzambi yaIsaka; ituŋa diwunakambami nakakwinkadu nineyi nianyaneyi.

¹⁴Anyaneyi akekala neyilunkuŋu lwahamaseki kuvula, eyi wakasambaŋena nikumujika nikumusela, nikukabeta nikukabeta; mudeyi nimudi anyaneyi, yisaka yejima yahamaseki yakamwenawu kukooleka.

¹⁵Tala, ami nidi neyi, nakakuhembaŋa kwejima kuwakaya, nakakufuntisha cheŋi mwituŋidi; hinamba kakushiyaku, chiŋa nakela mwejima munakuleji to-o.

¹⁶Yakoba watoneni, welili nindi, Komana chalala Yehova wudi kunu, ami kwami hinachilukaku.

¹⁷Watiyiliwoma, nindi, Hanu hafwana kwaamu. Komana kunu kwokwitala daNzambihohu, komana kwokuchisu chamwiwulu.

¹⁸Yakoba wahindukili ntetemena yayeni, hakunona ilola dasachililiyi namutu windi, hakudiimika kaposhi, yohuŋununa manji hewulu dadu.

¹⁹Kwenoku watumbiluku ijina, nindi kuBeteli; ilaŋa hakusambila ijinadamukala dadiŋi Luzi.

²⁰Yakoba hakushiika, nindi, Neyi Nzambi wakekalaŋa nanami, neyi wakanhembaŋa munjila yinukwenda, neyi wakanyinkaŋani yakudya nimahina akuvwala,

²¹mwaka nakafunti cheŋi chachiwahi kwitala datata, Yehova wakekala Nzambi yami,

²²niilolidi dinemikikaposhi dakekala itala daNzambi; yuma yejima yiwakanyinka nakabalulayibalu ikumi nakanonamu chimu nakukwinkachu.