Read MUKANDA WANZAMBI Genese 3 Bible Online

Genese 3 - MUKANDA WANZAMBI bible

Genese 3

¹Hakwila kapela diyi wadiŋi wasweja kubabala hadi anyama lamumpata ejima eliliyi Yehova. Yena hakumwihula mumbanda, nindi, Chalala Nzambi nahoshi nindi, Nyitondu yejima yemwitempa bayi mwakayi dyaku, tahindi?

²Mumbanda hakumwila kapela, nindi, Nyikabu yanyitondu yamwitempa tukutwesha kudya tuhu,

³hakwinza nyikabu yamutondu wekala mukachi ketempa, Nzambi nahoshi nindi, Bayi mwakayi dyaku, hela kukwataku nehi, mwakenda kafwa.

⁴Kapela hakumwila mumbanda, nindi, Chalala, himwakafwaku;

⁵muŋa Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.

⁶Mumbanda chamweniyi mutondu wunawahi wakudya, kuwutala wakutiyisha kuwaha, mutondu owu wunawahi dehi wakuheta nachu maana, hakukumunaku ninyikabu, hakudya, yomwinkaku ninfumwindi adiŋiyi nindi, niyena hakudya.

⁷Mesu awu mwayedi wawu atona nikutona, eluka nikwiluka nawu tudinzekesi; hiya kuchima mafu achikuyu, atuŋi yuma yakuvwala.

⁸Chida wundili itaŋwa, atiyili izu daYehova Nzambi, owu wukwenda mwitempa owu, iyala namumbanda hiya kubatama kumesu aYehova Nzambi mukachi kanyitondu yamwitempa.

⁹Yehova Nzambi haku mutambika iyala, nindi, Wudi kudihi?

¹⁰Kutiya yena nindi, Natiyi izu deyi mwitempa, natiyi woma, muŋa nidi nzekesi, nibatama nikubatama.

¹¹Nzambi nindi, Indi wakulejeli nindi wudi nzekesi hinyi? Wadya dehi mutondu wunakulekesheli nami bayi wakadyaku, tahindi?

¹²Kuchinka iyalanindi, Mumbanda wanyinkeli kushakama nindi diyi wanyinkahu wenamutondu owu, hinukudya.

¹³Yehova Nzambi hakumwila mumbanda, nindi, Ichichuma chiwunelihi chumanyi? Mumbanda nindi, Kapela diyi wandimba dichi nadya.

¹⁴Yehova Nzambi hakumwila kapela, nindi, Chiwuneli chumichi, mukachi kawayi muna ejima, nimukachi kawanyama amumpata ejima, eyi anakushiŋi tu-u; wakendela mwivumu deyi, Wakadyaŋa lunkuŋu mafuku ejima wuchidi mumi.

¹⁵Nukusha nkunyi mukachi keyeyi namumbanda, nimukachi kawanyaneyi nawanyanindi; akakuchika kunamutu, nineyi wakamuchika kukatutu.

¹⁶Hakumwila mumbanda, nindi, Nakakuvuli shilanankashi yihuŋu yiwakamona, nikuba aba kuwakaba abaŋa mavumu eyi; wakavwalapa anyana nakukabakana hohu; wakata muchima hadi nfumweyi, diyi wakela mwanta weyi.

¹⁷Hakumwila Adama, nindi, Chiwunatiyi mwizu daŋodeyi nakudya mutondu wunakulekesheli nami bayi wuwidyaku, iseki anadishipili dehini hamujimba weyi; mafuku ejima wuchidi wamumi wakadyaŋa chaku kabakanahohu;

¹⁸daka kusoŋe laŋa ninyipa ninyi sonsonyi; wakadya ŋayisakola yamumaha;

¹⁹kudya yakudya chiŋa wunasulwili kumesu eyi, nichiwamba kafunta cheŋi mumaseki; muŋa dihu hakufumi shiluwu; muloŋa eyi wulunkuŋu, nochu wakafunta cheŋi mwomulunkuŋu.

²⁰Iyala wanamutumbili ipodindi ijina dindi, nindi, Evu, muloŋa diyimama yawakwakuhanda ejima.

²¹Yehova Nzambi wayitupilili Adama na ŋodindi yi kovwelu yayitembi, hakuyivwika.

²²Yehova Nzambi welili nindi, iyala neli neyi chitwekaletu, weluka dehi nikuwaha nikutama; wakenza kolola chikasa chindi, atambuli mutondu wawumi, adiyi, ahandi haya nyaka.

²³Dichi Yehova Nzambi wamwilili nindi, Fumaku mwitempa daEdeni wakadimi heseki hakufumishiluwu.

²⁴Nochu wamute mwinumu iyala. Kwitempa daEdeni, mbadi yadu yamusela, hakwimikaku akerubi nimulaŋu wakesi wampoku yakabali wenda wubalumuka niniku niniku, kulonda kuhembaŋa njila yamutondu wawumi.