Read MUKANDA WANZAMBI Genese 32 Bible Online

Genese 32 - MUKANDA WANZAMBI bible

Genese 32

¹Yakoba niyena hakuya munjila yindi, aŋelu jaNzambi hiyá kubulakana nindi.

²Yakoba chayimweniyi, wahosheli nindi, Dichi chimba chaNzambi; henohu yotumbahu ni ijina nindi, HaMahanayimi.

³Yakoba watemeshelaŋahu dehi antemesha jindi kudi mana kwindi Esawu, kwituŋa dakuSeyiri, mpata yaEdomi.

⁴Wayilejeli nindi, Mwaka mwila mwanta wami Esawu, nenu, Kambuŋeyi Yakoba nahoshi nindi, Ami nayili nakushakama chawenyi naLabani, nashakami nindi shakame-e, chochinu kufumaku ichi;

⁵naheti ni aŋombi, niayimbulu, nianyikokuna wampembi, nianduŋu jami amayala nawambanda. Natumishi naminimuleji mwanta wami, kulonda yena akantiyili luwi.

⁶Antemesha afuntili cheŋi kudi Yakoba nakumwila nawu, Kudi manakweyi Esawu tunashi ki, hakwinza nakukukinkilila, nasendi mayala makulakaji awana.

⁷Yakoba watiyili woma waweni, nimuchima mwivumula-ku; antu adiŋiyi nawu, niyimuna yanyanya, niyimuna yamaneni, nianŋameli, wa ambwili nyikanka yiyedi.

⁸Nindi, Neyi Esawu wakawana mukankawumu nakuyitapa, mukanka wukwawu wukushalahu wukutemuka.

⁹Yakoba welili nindi, Eyi Nzambi yatata yami Abarahama, Nzambi yatata yami Isaka, eyi Yehova, yeyi wapilili neyi, Funtaku kwituŋa denu, nikudi antaŋa jeyi, nukukwila mwamuwahi.

¹⁰Luwi lweyi lweji mani nsaŋu yeyi yalala yejima yiwunani mwekesheli ami kambuŋeyi, ami hina telukukushikila munehi; ami nazambukili Yodana iwu kwanamutondu wami, hakwila ichi nela dehi niyendu yiyedi.

¹¹Aŋamwini mwani, kudi manakwami, kudi Esawu, namutiyi woma nami wukwinza nakuntapa, nimumbandani anyanindi.

¹²Eyi wapilili neyi, Chalala nukukwila mwamuwahi; neyi, Anyaneyi nakayivulisha neyi wusekulula wakukaluŋalwiji wakaŋanyaŋa kuchindawu nanochu chiwasweja kuvula.

¹³Wufuku wuna wakamini kwenoku; kuyuma yindi yadiŋiyi nayuwa ambwiluku yi kwawu yakwinka mana kwindi yamukunkulu;

¹⁴mpembi nyikaji makulakaji ayedi, jayizamba makumi ayedi, nyikoku yanyikaji makulakaji ayedi, yayizamba makumi ayedi,

¹⁵anŋameli achidi kwamwisha makumi asatu, ni anyanawu, aŋombi anyikaji makumi awana, amayala ikumi, ayimbulu anyikaji makumi ayedi, nianyana ikumi.

¹⁶Wayinkeli apamba jindi, hachendu hachendu, wayilili apamba jindi, nindi, Yenuŋahu dehi kumbidi, shenu kachintampu hakachi kachendu nachendu.

¹⁷Wamulejeli watwamininuku, nindi, Chakukubula kanayi mana kwami Esawu chakakwihulayi nindi, Indeyi wumuntu wanyi? Wukuyahi? Indi awa ayimuna wudi nawu anyi?

¹⁸eyi kweyi wakela neyi, Akambuŋeyi Yakoba; hiyuma yanakutemesheliyi eyi, yakukwinka chamukunkulu, eyi mwanta Esawu, yemwenindi wudi nakwinza munyima.

¹⁹Walejeliwa muchiyedi, niwamuchisatu, niwejima wawu abiŋili yendu yayimuna, nindi, Chimuku mubulakana Esawu mwakamulejapa choche nochu.

²⁰Mwakamwilaŋa nenu, Niyemwenindi kambuŋeyi Yakoba wudi nakwinza munyima, nindi, Nayumoyu yamukunkulu yikuyaŋahu dehi nasumi nachukumpoku, hakukumininaku twakadimona nindi kumesu; kwiji wakaŋitŋia.

²¹Nochu yuma yamukunkulu yayilaŋahu dehi kumbidi, hakwilayena yemwenindi wufuku wuna wakamini hachilombu.

²²Wanyamukili wufuku wuna, wasendeli ni aŋodi jindi muyayedi wawu, nianduŋu jindi awambanda muyayedi wawu, ni anyanindi ikumi nawumu, hakuzambuka hamwaba waYaboki.

²³Wayitweluku nakuyizambwishaka kaloŋoku, wazambwishili niyuma yadiŋiyi nayu.

²⁴Yakoba yoshala nikanka windi; muntu hakudikwata nindi nakulwishanindi lwishe-e, nichikwachili.

²⁵Chamonayi namukaŋanvi, hakumukwata mulukuma lwindi; chakulwishayi nindi mulukuma lwaYakoba himukuchiŋumuka.

²⁶Mukwawu nindi, O umbuku, hikukucha. Mukwawu nindi, Ami kukuumbaku nehi, chiŋa wunkiswila nkisu.

²⁷Mukwawu wamwililinindi, ijina deyi, yeyinyi? Mukwawu nindi, Yami Yakoba.

²⁸Mukwawunindi, ijina deyi hiyakaditena cheŋi nawu Yakobaku, chiŋa nawu Isarela; nanochu chiwunalwishi naNzambi nawantu, hiwukwimika nimushindu.

²⁹Yakoba wamwihwili nindi, Anleji mwani ijina deyi. Mukwawu nindi, Wukwihwiladi ijina dami? Hakumukiswila ninkisu kwokwenoku.

³⁰Yakoba kwenakuna watumbiluku ijina, nindi kuPenieli; nindi, Nanochu chinadimoni naNzambi kumesu, niwumi wami anawuhandishi.

³¹Chazambukiliyi Penuweli kutala itaŋwa hidikusela, yena hakubalakata kulukumalwindi.

³²Anyana kaIsarela dichi chabulilaŋawu kudya mujila wakulukuma, nilelu tuhu chochu; nanochu chakwatiliyi mulutuŋiu lwekata daYakoba mumujila wamulukuma.