Read MUKANDA WANZAMBI Genese 41 Bible Online

Genese 41 - MUKANDA WANZAMBI bible

Genese 41

¹Chimwahitili nyaka yiyedi chikupu, Fwaro waloteli nindi nemani kuKaloŋa.

²Kutala, muKaloŋa himukuzambuka aŋombi anyikaji amawahi atoha atanu nayedi, hiyakudya nimatahu akumeji.

³Kutala, aŋombi amakwawu anyikaji atanu nayedi, hiyakuzambuka muKaloŋa, hiyakulondashana hadi wena, aŋombi atama akosa, hiyakwimana kuchikumu chaKaloŋa kwadiŋuwu ana aŋombi amakwawu.

⁴Aŋombi atamaakosa, adiili aŋombi amawahi atoha atanu nayedi. Fwaro wahindukili namutulu.

⁵Wakamini tulu, waloteli kamuchiyedi. Kutala, nyitu yatidiku yitanu nayiyedi, hiyikumena ishina dawu dimu, nyitu yamaneni yayiwahi.

⁶Kutala nyitu yanyanya, yababika dehi nampepela yakumusela, yitanu nayiyedi, hiyikulondashana hadi yenoyu.

⁷Nyitu yanyanya yaminyini nyitu yamaneni yakola yitanu nayiyedi. Fwaro wahindukili namutulu, komana naloti.

⁸Hantetemena wadishishimokeli muspiritu yindi hama, watemeshelinindi, Tambikenu atutepa ejima amuEjipitu niakwamaana ejima. Fwaro wayawilili mwaloteliyi, ilaŋa kwosi watwesheli kumulumbulwilamu Fwaruku.

⁹Kutiya mukulumpi wawakwakutwala lupasa hakuhosha naFwaro, nindi, Lelu ami na anuki nyiloŋa yami.

¹⁰Fwaro wazuwili nanetu ambuŋindi, ami anshili mwakasilaŋawu antu mwitala damukulumpi wawatulama, ninami nimukulumpi wawakwakutuŋa mankendi.

¹¹Twaloteli wufukuwetu wumu, ninami nimukwetu; iwu waloteli nimwakumulumbulwilawu, iwu waloteli nimwakumulumbulwilawu.

¹²Twadiŋi nakaHeberu wamukwenziwumu, ŋamba yamukulumpi wawatulama; twamwawilililu muyena, niyena watulumbulwili mutwaloteli; walumbulwili mutwaloteli, iwuna mwindi, iwu namwindi.

¹³Mwomwalumbulwiliyi yena dimu twamweni, ami anfuntishili kumudimu wami, hakwila mukwetu amukudikili.

¹⁴Fwaro watemesheli nindi, Tambikenu Yosefu. Amwidishili lufuchihohu muwina mwadiŋi yi; hakutewula, hakuvwala mahina acheŋi, hakuyamwadiŋiyi Fwaro.

¹⁵Fwaro wamwilili Yosefu, nindi, Naloti, kwosinatweshi kulumbulula mwoku. Nakutiyi dehi nawu, neyi eyi wukutiya mwanalotiyi muntu, wukutwesha kulumbululamu.

¹⁶Yosefu wamwakwili Fwaro, nindi, Hiyamuku; Nzambi diyi wukumuleja Fwaro nsaŋuyawunda.

¹⁷Fwaro wahosheli naYosefu, nindi, Nalota ami nemani kuchikumu chaKaloŋa.

¹⁸Kutala, muKaloŋa himukuzambuka aŋombi anyikaji atoha amawahi atanu nayedi, hiyakudya nimatahu akumeji.

¹⁹Kutala aŋombi anyikaji amakwawu atanu nayedi, hiyakuzambuka nakulondashana hadiwena, azeya atama nankashi akosa, mwituŋa dejima daEjipitu kanda nimonaŋahu dehi aŋombi atama chi kuma hochuku.

²⁰Aŋombi akosa atama, hiyakudya ana aŋombi asambila adiŋi amaneni atanu nayedi.

²¹Chayidiiluwuto-o, kutwesha kwiluka neyi anayidyi nehi, sapa ataminawu neyichadiŋuwu hakusambila. Nihinduka ninamutulu.

²²Nalota nyitu yatidikuyitanu nayiyedi hiyikumena ishina dawu dimu, yakola, yayiwahi,

²³kutalaninyitu yominina, yanyanya, yababika dehi nampepela yakumusela yitanu nayiyedi, hiyikulondashana hadi yenoyu.

²⁴Nyitu yanyanya yaminyini yina nyitu yayiwahi yitanu nayiyedi. Ami nayilejumu atutepa ilaŋa kwosinatweshi kunlumbulwila mwokuku.

²⁵Yosefu wamwilili Fwaro, nindi, Mwanalotiyi Fwaro mwomumu, Nzambi namuleji Fwaro mwakukeŋa kwilayi.

²⁶Ana aŋombi amawahi atanu nayedi hinyaka yitanu nayiyedi, ninyitu yayiwahi yitanu nayiyedi hinyaka yitanu nayiyedi; muwunaloti mwomumu.

²⁷Ana aŋombi akosa atama atanu nayedi, azambukili munyima jawu, hinyaka yitanu nayiyedi, niyina nyitu yamukunkulu, yababika dehi nampepela yakumusela yitanu nayiyedi, yakekala nyaka yanzala yitanu nayiyedi.

²⁸Mwomuna hoshami naFwaro, Nzambi namuleji Fwaro mwakukeŋa kwilayi.

²⁹Hikukwinzanyaka yakusweja nankashi kudya yitanu nayiyedi mwituŋa daEjipitu mwejima.

³⁰Hakulondashana hanyakiyi kwakenza nyaka yanzala yitanu nayiyedi, nikudya kwakuvulu kwejima hiyakakwanuka nawa cheŋi mwituŋa daEjipituku; ituŋa dakajila ji-i nanzala.

³¹Nikudya kwakuvulu hiyakakwilukacheŋi mwituŋaku muloŋa wanzala yakenzaku, muloŋa yakatoha nankashi.

³²Chana muloteshuwu Fwaro kayedi chinafumi hakwila anachikoleshi kudi Nzambi, Nzambi keŋa achikoŋi.

³³Dichi dinu Fwaro atalatali muntu washinshika wukweti maana, amwinki wulopu wetuŋa daEjipitu.

³⁴Fwaroeli mwenimu, akwati tupita twamwituŋa hanyaka yakasweja kudya yitanu nayiyedi, akahitaŋa nakwambula maseka amwituŋa daEjipitu atanu, anonumudimu.

³⁵Akapompeshi kudya kwejima kwanyakoyu yayiwahi yakenza, akamulumbikili Fwaro tidiku, kulonda yakeli yakudya yamunyikala yejima, akayihembi chachiwahi.

³⁶Yakudyoyu yakela yakuswekela antu amwituŋa, nanyaka yanzala yakaholoka mwituŋa daEjipiti, kulonda ituŋa dakabuli kujilumuka antu nanzala.

³⁷NiFwaro ni ambuŋindi ejima amweni mwenomu nawu munawahi.

³⁸Fwaro wayilili ambuŋindi, nindi, Indi muntu wakufwana neyi yeniwu mwekala niSpiritu yaNzambi, tukumuwana kudihi?

³⁹Fwaro wamwilili Yosefu, nindi, Chanaku mwekesheluwu yumiyi yejima kudi Nzambi, komana kwosi muntu washinshika wukweti maana wakweseka naneyuku.

⁴⁰Yeyi wukwi kala mulopu wamukala wami, mwonsu muwukuhosheyi, dimu mukwovwahila antu ami ejima. Kwokwikubu dawanta hohu kwoku nukukubadikila.

⁴¹Fwaro wamwilili Yosefu, nindi, Tala, nakwinkiwulopu wetuŋa daEjipitu dejima.

⁴²Fwaro wasubwili kazeya kindi kawantakumunu windi, weŋejili kumunu waYosefu, wamuvwikili mahina amawahi, niilepi dawuru kunshiŋu yindi.

⁴³Wamwinkeli ikalu dindida muchiyedi kulonda endelumu; hiyakubilela kwakuyayi, nawu, Fukamenu. Wamwinkeli wulopu wetuŋa daEjipitu dejima.

⁴⁴Fwaro wamwilili Yosefu, nindi, Yami Fwaro, chakubuleyi kwosi muntu wukwolola helachikasa chindi, hela mwendu windi, mwituŋa daEjipitu dejima.

⁴⁵Fwaro wanamutumbili Yosefu ijina dindi, nindi diyi Zafwenati Paneya; wamwinkeli Asenati mwana kaPoti Fwenaa chikombeji chaOni, asumbuli. Yosefu wayilinakuhitaŋana mwituŋa daEjipitu.

⁴⁶Hemeniyi kumesu aFwaro mwanta wakuEjipitu, Yosefu washikilimunyaka makumi asatu. Yosefu wafumini kudi Fwaro, wayili nakwenda kwejima kwejima kwituŋa daEjipitu.

⁴⁷Hanyaka yaswejeli kudya yitanu nayiyedi maseki asoŋesheli kudya nyikanji nanyikanji.

⁴⁸Wapompesheli kudya kwejima kwadiŋi mwituŋa daEjipitu kwanyaka yitanu nayiyedi, kudyoku wakuswekeli munyikala; kumukala kumukala waswekeluku kudya kwamumaha adiŋi kwakwihi.

⁴⁹Yosefu waswekeli tidiku kuvula neyi wusekulula wakukaluŋalwiji, yayivulu nankashi, yoleka nikuchinda, muloŋa yadiŋi yakadi kuchindewa.

⁵⁰Helili mwaka wanzala wuchidi kanda wushiki, amuvweleli Yosefu anyana amayala ayedi, wowu amuvweleli mwana kachikombeji chaOni Poti Fwenaa.

⁵¹Wawedi Yosefu wanamutumbili ijina dindi, nindi Manase; nindi, Nzambi nanvulamishi mwejima munakabakani, niakumukala watata ejima.

⁵²Wamuchiyedi wanamutumbili ijina dindi, nindi Efweremi, nindi, Nzambi nanyinki lusemu lwami mwituŋa dinamoni lukadi.

⁵³Nyaka yakudya kwakuvulu mwituŋa daEjipitu yitanu nayiyedi yamanini.

⁵⁴Nyaka yanzala yitanu nayiyedi hiyikutachika kwinza, mwahonsheliyi Yosefu; mumatupa ejima mwaholokeli nzala hohu, hakwinza mwituŋa daEjipitu dejima mwadiŋi kudya.

⁵⁵Chatiyiluwu antu nzala mwituŋa daEjipitu dejima, hiyakuya nakudilila kudya kudi Fwaro. Fwaro hakuyila aEjipitu ejima nindi, Yenuŋa kudi Yosefu, mwonsu mwakuyilejayi ilenu.

⁵⁶Nzala yaholokeli hejima hahita iseki. Yosefu wenzulwili matala ejimamwadiŋi yakudya, wayilandishili aEjipitu. Nzala yatoheli mwituŋa daEjipitu.

⁵⁷Antu amumatuŋa ejima ayili muEjipitu kudi Yosefu akalandi tidiku, muloŋa nzala yatoheli hejima hahita iseki.