Read MUKANDA WANZAMBI Genese 45 Bible Online

Genese 45 - MUKANDA WANZAMBI bible

Genese 45

¹Yosefu hatwesheli kuduŋumika kumesu awantu ejima emenuku, i hakubilela nindi, Yilenu antu ejima edikumu. Chadishimwiniyi Yosefu kudi ana kwindi hikwemeni muntuku.

²Yosefu hakudila ikumbu dadeni. AEjipitu achitiyili, niantu akwitala daFwaro achitiyili.

³Yosefu hakuyila ana kwindi, nindi, Yami Yosefu, tata yami wudi kwoku? Anakwindi hiyatwesheli kumwakulaku, muloŋa amutiyili woma kumesu indi.

⁴Yosefu wayilili ana kwindi, nindi, Swilenu mwani kwakwihi. Hiyakuswila kwakwihi. Nindi, Yami mana kwenu Yosefu mwalandili muEjipitu.

⁵Ichi dinu bayi mutiya chikelaku, bayi mudizuwila nachina chimwanlandili ninzi munuku; muloŋa Nzambi diyi wantemeshelaŋahu dehi kulonda nihembi wumi wawantu.

⁶Muloŋa nzala yinaholoki dehi mwituŋa nyaka yiyedi iyi, kunashali nawa nyaka yi kwawu yitanu yakabula kudimawu antu hela kumuna.

⁷Nzambi wantemeshelaŋahu dehi kulonda kuyihemba mushaluhu hamaseki, kulonda kuyihandisha namwini antu amavulu nankashi.

⁸Dichi dinu hiyenu mwantemesheli ninzi kunuku, Nzambi diyi wantemesheli, naŋilishi dehi tata yaFwaro, nimulopu wamukala windi wejima, ninyuli yetuŋa daEjipitu dejima.

⁹Nyakalenu muyikudi tata, mwakamuleji nenu, Mwaneyi Yosefu nahoshi nindi, Nzambi naŋilishi dehi mwanta waEjipitu yejima; twaya kunu kunidami, bayi wakalabaku.

¹⁰Wakashakama mwituŋa daGosheni, wakekali kwakwihinanami, nineyi, nianyaneyi, niezukulu eyi, nimpembi jeyi ninyikoku yeyi, niŋombi jeyi, niyuma yeyi yejima;

¹¹nakakudiishila kwenoku, muloŋa kunashali nyaka yanzala yi kwawu yitanu; kuchina wakenza kamona wuzweŋi, nineyi, niantaŋa jeyi, niantu eyi ejima.

¹²Ichi dinu mesu enu anamoni, nimesu amwanyi kami Benjamini, yami aweni nidi nakuhosha nenu nakanwa kami.

¹³Kamushimwinenu tata yami mpuhu yami yamunu muEjipitu yejima, niyuma yimunamoni yejima. Mwakanyakali kumuleta tata yami kunu.

¹⁴Wamunoŋaminini mwanyikindi Benjamini kunshiŋu, hakudila; niyena Benjamini hakudilila hanshiŋu yindi.

¹⁵Hakupwepujola ana kwindi ejima nakudilila hadi wena. Chanakumishuwu, ana kwindi hiya kuhanjika nindi.

¹⁶Mpuhu yitiyakana nikutiyakana mwitala daFwaro, nawu, Ana kwaYosefu anenzi. Fwaro watiyili kuwaha, ni aŋamba jindi.

¹⁷Fwaro wamwilili Yosefu, nindi, Kayileji ana kweyi, neyi, Tiyenu chimukwila; twikenuanyama jenu yisenda yenu, yenu, funtenu kwituŋa daKenani;

¹⁸mwakatambuli nitata yenu niantaŋa jenu, mwakenzi kunu kunidami; nakayinkayuma yamwituŋa daEjipitu yayiwahi, mwakadya jamanji jidi mwituŋa.

¹⁹Nakuleji dehi kwami, ilenu mwenimu; tambulenu matemba amwituŋa daEjipitu, mwakasendelumu anyanenu anyanya, nawaŋodi jenu, mwakasendi tata yenu, mwakenzi.

²⁰Bayi mwakama yuma yenuku; yumayayiwahi yamwituŋa daEjipitu dejima yenu hohu.

²¹Anyana kaIsarela elili mwenomu. Yosefu wayinkeli matemba mwomwahosheliyi Fwaro, wayinkeli niyakudya yakudiila munjila.

²²Wejima wawu wayinkeli hamuntu hamuntu mahina akuvwala; ilaŋa Benjamini wamwinkeli mali asiliva amuwayawaya makulakaji asatu, nimahina akuvwala atanu.

²³Tiyenu yamutemesheleliyi tata yindi; ikumi dayimbulu asendayuma yakuEjipitu yayiwahi, niikumi dayimbulu yanyikaji asenda nitidiku, nimankendi, niyakudya yakudiila tata yindi munjila.

²⁴Wayitemesheli ana kwindi, nindi, Yenuŋa. Hiyakuya nikuya. Hakuyila nindi, Bayi mwakazuŋa munjilaku.

²⁵Wena afumini kuEjipitu, ashikili kwituŋa daKenani kudi tata yawu Yakoba.

²⁶Amushi mwinini nawu, Yosefu wuchidi mumi, diyi nyuliyetuŋa daEjipitu dejima. Ilaŋa yena wafwili muchishishizo, muloŋa hayiitiyiluku.

²⁷Amulejeli mazu ahosheliyi Yosefu ejima; chamweniyi matemba amutemesheleliyi Yosefu kulonda akamusendelumu, tata yawu Yakoba wahizumukili muspiritu yindi.

²⁸Isarela hakuhosha nindi, Kunahu dehi; komana mwanami Yosefu wuchidi mumi, nukuya nakamumoni hohanu nichidi kanda nifwi.