Read MUKANDA WANZAMBI Genese 46 Bible Online

Genese 46 - MUKANDA WANZAMBI bible

Genese 46

¹Isarela wanyamukili nayuma yindi yejima, washi kili kuBerisheba, wamuketwilili Nzambi yatata yindi Isaka yimuna.

²Nzambi wahosheli naYakoba kuyimwenu yawufuku, nindi, Yakoba, Yakoba. Yena nindi, Vude.

³Nindi, Yami Nzambi, Nzambi yatata yeyi. Bayi wutiyawoma kuya muEjipituku, kwenoku nakakwilisha muchidi weneni.

⁴Ami nakaya neyi muEjipitu, ami nawa nakakuleta cheŋi chalala. Yosefu wakakukwatachikasa chindi hamesu eyi.

⁵Yakoba wanyamukili kuBerisheba. Anyana kaIsarela asendeli tata yawu Yakoba, ni anyanawu anyanya, ni aŋodi jawu, mumatemba atemesheliyi Fwaro kulonda kumusendelamu.

⁶Ayili niyimuna yawu, niyuma yawu, yaheteluwu mwituŋa daKenani, hiyakushika muEjipitu, Yakoba ni anyanindi ejima hamu;

⁷wowu anyanindi amayala, niezukulu indi amayala hamu, ni anyanindi awambanda, niezukulu indi awambanda, anyanindi ejima wayili nawu muEjipitu.

⁸Tiyenu majina awanyana kaIsarela ayili muEjipitu, aYakoba nawanyanindi amayala; iwu Rubeni, wedi waYakoba.

⁹Anyana kaRubeni amayala; iwu Hanoki, iwu Palu, iwu Hezeroni, iwu Karami.

¹⁰Anyanaka Simeyona amayala; iwu Yemuweli, iwu Yamini, iwu Ohadi, iwu Yakini, iwu Zohari, iwu Shawulu mwana kamumbanda wamuKenani.

¹¹Anyana kaLevi amayala; iwu Gerishoni, iwu Kohati, iwu Merari.

¹²Anyana kaYuda amayala; iwu Eri, iwu Onani, iwu Shela, iwu Perezi, iwu Zera. Ilaŋa Eri naOnani afwilili mwituŋa daKenani. Anyana kaPerezi amayala adiŋi iwu Hezeroni, iwu Hamuli.

¹³Anyana kaIsakari amayala; iwu Tola, iwu Puva, iwu Yoba, iwu Shimironi.

¹⁴Anyana kaZebuluni amayala; iwu Seredi, iwu Eloni, iwu Yaheleyeli.

¹⁵Wenawa diwu anyana kaLeya amayala, amuvweleliyi Yakoba muPadani Arama, hamu namwanindi wamumbanda Dina; antu ejima anyanindi, ni amayala niambanda, adiŋi makumi asatu nasatu.

¹⁶Anyana kaGadi amayala; iwu Zifwiyoni, iwu Haŋi, iwu Shuni, iwu Eziboni, iwu Eri, iwu Arodi, iwu Areli.

¹⁷Anyana kaAsheri amayala; iwu Imina, iwu Ishiva, iwu Ishivi, iwu Beriya, nimuhelawu Sera. Anyana kaBeriya amayala, iwu Heberi, iwu Malikiyeli.

¹⁸Wenawa diwu anyana amayala avweliyi Zilipa enkeliyi Labani mwanindi Leya, wenawa diwuamuvweleleliyi Yakoba, antu ikumi natanu nawumu.

¹⁹Anyana amayala avweliyi Racheli iŋoda Yakoba; iwu Yosefu, iwu Benjamini.

²⁰Kudi Yosefu kwituŋa daEjipitu kwavwalikili niManaseni Efweremi, diwu amuvweleleliyi Asenati mwana kaPoti Fwenaa, chikombeji chaOni.

²¹Anyana kaBenjamini amayala; iwu Bela, iwu Bekeri, iwu Ashibeli, iwu Gera, iwu Nayamani, iwu Ehi, iwu Roshi, iwu Mupimi, iwu Hupimi, iwu Aradi.

²²Wenawa diwu anyana kaRacheli amayala avwalikili kudi Yakoba, antu ejima ikumi nawana.

²³Anyana kaDani amayala; Hushimi.

²⁴Anyana kaNafwatali amayala; iwu Yahazeyeli, iwu Guni, iwu Yezeri, iwu Shilemi.

²⁵Wenawa diwu anyana amayala avweliyi Biliha enkeliyi Labani mwanindi Racheli, diwu amuvweleleliyi Yakoba, antu ejima atanu nayedi.

²⁶Antu ejima ayili naYakoba muEjipitu, afumini mumayindi, kubombani aŋodi jawanyana kaYakoba, antu ejima adiŋi makumi atanu nadimunatanu nawumu.

²⁷Anyana kaYosefu, avwalikili kudi yena muEjipitu, adiŋi antu ayedi. Antu ejima akumutaŋa waYakoba ayili muEjipitu adiŋi makumi atanu namakumi ayedi.

²⁸Watemeshelaŋahu dehi Yuda kudi Yosefu kulonda akalomboli njilayakuya kuGosheni, ashika nikushika mwituŋa daGosheni.

²⁹Yosefu waloŋesheli ikalu dindi, wayili nakukinkilila tata yindi Isarela kuGosheni. Wadishikŋili kudi yena, wamunoŋaminini hanshiŋu yindi, nakudila hanshiŋu yindi, dile-e.

³⁰Isarela wamwilili Yosefu, nindi, Ichidinu chinakumoni kumesu eyi chiwuchidi mumi, nidifwili tuhu kwami.

³¹Yosefu hakuyila ana kwindi niantaŋa jatata yindi, nindi, Nukuya nakamuleji Fwaro, nakamwili nami, Ana kwami nantaŋa jatata, adiŋi mwituŋa daKenani, anenzi dehi kunu kunidami.

³²Nami, Wenawa amayala hiyatubiŋa, enjilila dehi kushakama nayimuna; anasendi ninyikoku yawunimpembi jawu, niŋombi jawu, niyuma yawu yejima.

³³Enu nawa, chakayi tambikayi Fwaro, chakayiihulayi nindi, Mwakalakalaŋa mudimwinyi?

³⁴mwakela nenu, Etu ambuŋeyi twenjililili dehi kushakama nayimuna kufumisha kuwansi wetu kushika kwifuku dalelu, ninetu niankaka jetu. Kulonda enu mwakatweshi kushakama mwituŋa daGosheni; muloŋa atubiŋa ejima kudi aEjipitu hikushimana.