Read MUKANDA WANZAMBI Genese 48 Bible Online

Genese 48 - MUKANDA WANZAMBI bible

Genese 48

¹Chimwahitili yumoyu amulejeli Yosefu, nawu, Tata yeyi wakata; hakuya nawanyanindi muyayedi wawu, aManase naEfweremi.

²Amulejeli Yakoba, nawu, Mwaneyi Yosefu nenzi kudeyi. Yakoba hakudikolesha, hakushakama kwadiŋi yi kukadidi.

³Yakoba hakuhosha kudi Yosefu, nindi, Nzambi Chinaweji wadi mwekesheli kudami kuLuzi mwituŋa daKenani, wankiswihli nkisu,

⁴waŋilili nindi, Ami nakakwilisha nsemi, wakasemununa, nakakuvulisha, hadeyi hakafuma nyichidi yayivulu; ituŋidi nakayinkadu anyaneyi akahiŋa mudeyi, dakekali dawu dakudihetela haya nyaka.

⁵Ichi dinu awa anyaneyi ayedi awa, lwavweleli mwituŋa daEjipitu henohu kanda ninzi kudeyi muEjipituku, akwikala amami; aEfweremi na Manase akekala amami neyi chaduwu aRubeni naSimeyona.

⁶Hakwila anyaneyi iwakalunjikaku akekala eyeyi; kuwuswana wawu akayitumbawowu majina awana kwawu.

⁷Hakwila ami kwami chinafumini kuPadani, Racheli wanfwilili mimesu, munjila mwituŋa daKenani, kwasheli kachinta mpunakushika kuEfwarata; namujiikili mwomuna munjila yaya kuEfwarata, diku kuBetelemi.

⁸Isarela chamweniyi anyana kaYosefu, welili nindi, Wenawa hiyanyintahi?

⁹Yosefu wamwilili tata yindi, nindi, Diwu anyanami ananyinkiyi Nzambi kunu. Yena nindi, Yileti kunu kudami mwani, nukuyikiswilankisu.

¹⁰Mesu aIsarela adiŋi ela dehi lwidi nakukula, hatwesheli kwindi kumonaku. Wayishikŋili kwakwihi, yena wayipwepujoleli nakuyikmbata.

¹¹Isarela wamwilili Yosefu, nindi, Ami nehli nami hinamba kakumona cheŋi kumesuku, kwinza ichi Nzambi mwaka napiteji dehi kumona nianyaneyi.

¹²Yosefu wayiidishili mwadiŋuwu munkuma yindi, wabandaminini ihama dindi heseki.

¹³Yosefu wayikwatili mwayedi wawu, Efweremi muchikasa chindi chachidiilu hakumutwala kuchikasa chaIsarela chachimunswa, Manase muchikasa chindi chachimunswa hakumutwala kuchikasa chaIsarela chachidiilu, hakuyishikŋa kwakwihi.

¹⁴Isarela hakwolola chikasa chindi chachidiilu, hakuchinaŋika hanamutu waEfweremi, diyikansi, chikasa chindi chachimunswa hakunapika hanamutu waManase, wachililina kuchiluka kumuchima, muŋa Manase diyi wedi.

¹⁵Wamukiswilili Yosefu nkisu, nindi, Nzambi kumesu indi kwendelaŋa atata jami niAbarahamani Isaka, diyi Nzambi wandiishapa nyaka yami yonsu yinahandina kushika nikwifuku dalelu,

¹⁶diyi kapelu wankuula kukutama kwejima, akiswili awa atwansi nkisu; akayitena nejina damami nimajina awatata jami Abarahama naIsaka; akasemununi hanu heseki akekali izaza.

¹⁷Chamweniyi Yosefu tata yindi hakunaŋika chikasa chindi chachidiiluha namutu waEfweremi, watiyili kutama, wakwatili chikasa chatata yindikwiwulu nindi achifumishi kunamutu waEfweremi achinaŋiki hanamutu waManase.

¹⁸Yosefu hakumwila tata yindi, nindi, Bayi omuku tata, yeniwu diyi wedi, naŋikaku chikasa cheyi chachidiilu hanamutu windi.

¹⁹Tata yindi wakolamini, nindi, Neluki, mwanami, neluki; niyena nawawakela muchidi wawantu, niyena nawa wakela muneni, ilaŋa mwanyikindidiyi wakamubadika, ni anyanindi akela nyuza yayeni yayivulu.

²⁰Wayikiswilili nkisu dodena ifuku odu, nindi, Kudeyi kwokwakakiswilayi Isarela nkisu, nakwila nindi, Nzambi akwili wikah neyi chaduwu aEfweremi na Manase. Washili Efweremi kumbidi, Manase wamukumishili munyima.

²¹Isarela wamwilili Yosefu, nindi, Yami nukufwa onu; ilaŋa Nzambi wakekala nenu, wakayifuntisha cheŋi mwituŋa dawankaka jenu.

²²Hakwila ami nakwinki mukandu wumu wunabuli kwinkahu ana kweyi, diwu nayamukilia Amori nampoku yami yakabali, nawuta wami wamukunji.