Read MUKANDA WANZAMBI 2 Samuele 10 Bible Online

2 Samuele 10 - MUKANDA WANZAMBI bible

2 Samuele 10

¹Kulondela henohu mwanta wawanyana kaAmoni hakufwa, mwanindi Hanuni hakumuswana.

²Davidi nindi, Nimwili mwana kaNahashi Hanuni luwi, neyi chaŋililiyi tata yindi luwi nawa. Davidi hakumutemeshela ambuŋindi nindi akamukundeji nansaŋu yatata yindi. AmbuŋaDavidi hiyakushika mwituŋa dawanyana kaAmoni.

³Ilaŋa atulamba twawanyana kaAmoni hiyakumwila mwanta wawu Hanuni, nawu, Ichi chanakutemesheliyi antu akukukundeja, wunatoŋojoki neyi Davidi wudi nakulemesha tata yeyi tahindi? Komana Davidi hanakutemesheli ambuŋindi kulonda ashinshiki mukala, awendeshi, kulonda wimiki mushi nduku, tahindi?

⁴Dichi Hanuni hakukwata ambuŋaDavidi, hakuyitewula wevu wawu chibalu chimu, hakuyiketola mahinawu hakachi, ndo nikuma handa, hakuyila nindi, Yenu.

⁵Chamulejeluwu Davidi, hakutemeshelaku antu akuyikinkilila, muloŋa amayala atiyili nsonyi nankashi. Mwanta hakuyila nindi, Shakamenu kuYeriku nichakamena cheŋi wevu wenu, mwakafunti cheni.

⁶Anyana kaAmoni chamwenuwu ananunki dehi ivumba datama kudi Davidi, anyana kaAmoni hiyakutemesha antu akukamba aSiriya akuBetire hobi, niaSiriya akuZoba, akwakwenda hamaseki makombakaji makumi ayedi, nimwanta wakuMayaka hamu nawantu ikombakaji, niantu akuTobi makombakaji ikumi nayedi.

⁷Chachitiyiliyi Davidi hakutemeshaku Yowabi hamu nanjita yejima yawayilobu.

⁸Anyana kaAmoni hiyakwidika nakutanjika njita kuwiŋililu wakuchisu chamukala. ASiriya akuZoba, niakuRehobi, niantu akuTobi niakuMayaka, niwena adiŋi hakanka wawu mumpata.

⁹Yowabi chamweniyi anamutanjikili dehi njita nikumbidi nikunyima, hakutonda antu hadi aIsarela ejima atondewa, hakuyitanjika atalaŋani nawaSiriya.

¹⁰Antu asheluku hakuyinka mana kwindi Abishayi, hakuyitanjika kulonda atalaŋani nawanyana kaAmoni.

¹¹Nindi, Neyi aSiriya ananswejeli Ŋovu, wakankwashaku; neyi anyana kaAmoni anaku swejeli Ŋovu ami nawa nakakukwashaku.

¹²Dikwatishi, tudinkenu jawu yala hanyijimba yawantu etu tulwilenu nyikala yaNzambi yetu; Yehova eli mwanamoniyi kuwaha.

¹³Dichi Yowabi nawantu ejima adiŋiyi nawu hiyakuswila kwakwihi nakulwa nawaSiriya; amutemukili.

¹⁴Anyana kaAmoni chamwenuwu aSiriya anatemuki dehi, niwena nawa hiyakumutemuka Abishayi, hiyakwijila mumukala. Yowabi hakufuma kudi anyana kaAmoni, hakufunta, hakwinza kuYerusalema.

¹⁵ASiriya chamwenuwu anayitapi dehi kudi aIsarela, hiyakudipompesha.

¹⁶Hadarezeri hakutemesha antu akuleta aSiriya adiŋi kwishinadi daKaloŋa. Hiyakwinza kuHelami, Shobaki mukulumpi wanjita yaHadarezeri natwaminuku.

¹⁷Hiyakumulejamu Davidi. Hakupompesha aIsarela ejima, hakuzambuka Yodana, hakushika kuHelami. ASiriya hiyakuditanjika nawu alwi naDavidi, hiyakulwa nindi.

¹⁸ASiriya hiyakutemuka aIsarela. Davidi hakujaha aSiriya akwamakálu makulakaji atanu nayedi, niakwakwenda hatuwalu makombakaji makumi awana, hakutapa Shobaki mukulumpi wanjita yawu, hakufwila kwenoku.

¹⁹Anyanta ejima adiŋi ambuŋaHadarezeri chamwenuwu anayitapi dehi kudi aIsarela, hiyakutiyaŋana nawaIsarela, hiyakuyikalakela. Dichi aSiriya atiya niwoma wakukwasha cheŋi anyana kaAmoni.