Read MUKANDA WANZAMBI 2 Samuele 11 Bible Online

2 Samuele 11 - MUKANDA WANZAMBI bible

2 Samuele 11

¹Mwaka walondelumu hachilaaka chayilaŋawu anyanta kumajita, Davidi hakutemesha Yowabi hamu nawambuŋindi nawaIsarela ejima; hiyakuyijilumuna anyana kaAmoni, hiyakukuchika mukala waRaba. Davidi hakulabila kuYerusalema.

²Chikuneli melela Davidi hakuhinduka hakadidi kindi, hakwenda hewulu detala damwanta; kwiwulu detala kwadiŋiyi hakumona mumbanda wudi nakuwela; mumbanda wadiŋi wasweja lubanji.

³Davidi hakutemesha antu nakwihula nindi, Himumbandanyi? Muntu tumu hakumwila nindi, Yeniwu hidiyi Batisheba, mwana kaEliyami, inodakaliti Uriya ku?

⁴Davidi hakutemeshaku antemesha, hakumutambula. Mumbanda hakwijila mwadiŋiyi, yena hakukama nindi, muloŋa henohu mumbanda wadi tookesha dehi majilu indi. Hakufunta cheŋi kwitala dindi.

⁵Mumbanda emita niivumu, hakutemesha mazu akumuleja Davidi, nindi, Nabaabi dehi ivumu.

⁶Davidi hakutemesha mazu kudi Yowabi, nindi, Ntemesheli kaHiti Uriya. Yowabi hakutemesha Uriya kudi Davidi.

⁷Uriya chenjiliyi kudi yena, Davidi hakumwihula mwanashakaminiyi Yowabi, nimwanashakami nuwu antu, nimukuya njita.

⁸Davidi hakumwila Uriya, nindi, Yaku kwitala deyi, wakaweli kunyendu. Uriya hakufuma mwitala damwanta, hiyakumulondesha chamukunkulu chakudi mwanta.

⁹Uriya hakukama kuchisu chetala damwanta hamu nawambuŋamwanta windi ejima, hayili kwitala dinduku.

¹⁰Hiyakumuleja Davidi, nawu, Uriya haya kwitala dinduku. Davidi hakumwila Uriya, nindi, Eyi mwomukufuma munjila yiwayili, netu? Indochu walekeladi kuya kwitala deyi?

¹¹Uriya hakumwila Davidi, nindi, Chimbaŋu, niaIsarela, niaYuda, ashakama kwawu muyisolu. Nimwanta wami Yowabi, niambuŋa mwanta wami, anateeki kwawu hampata hatooka, ami niyi kwitala dami nakudya nakunwa, naku kama naŋodami? Chochiwahandeyi kwaamu, chahanda niwumi weyi, ami kwami hinukutwesha kwila chumichuku.

¹²Davidi hakumwila Uriya, nindi, Jiŋilaku kunu lelu, kumadiki nakakwitŋa kuya. Uriya hakujiŋila muYerusalema denodu ifuku, nidalondelumu.

¹³Davidi hakumutambika, hakudya nakunwa hamu nayena; hakumushetesha walwa. Melela hakwidika, hakuya nakukama hakadidi kindi hamu nawambuŋamwanta windi. Hayili kwitala dinduku.

¹⁴Chikuneli budidi Davidi hakumusonekela Yowabi mukanda, hakuwu temesha naUriya.

¹⁵Wasonekeli mumukanda, nindi, Owu Uriya mushi kumbidi yanjita yasweja Ŋovu, mwakamushiyuku kanka windi, kulonda akamutapi, akafwi.

¹⁶Yowabi chayiliyi nakutala mukala, hakumusha Uriya kwelukiliyi nindi kudi ayilobu.

¹⁷Antu ahamukala hiyakwidika nakulwa naYowabi, antu amakwawu adiŋi ambuŋa Davidi adimbokeli; nikaHiti Uriya wafwili nawa.

¹⁸Yowabi hakutemesha mazu akumuleja Davidi nsaŋu janjita jejima.

¹⁹Hakumwila ntemesha, nindi, Chiwakela wunakumishi dehi kumuleja mwanta nsaŋu janjita jejima,

²⁰neyi wakamona mwanta hakuzuwa, haku kwila nindi, Mwayiladi nakulwa nawu kwakwihi namukala chochochu? Ochu himwelukili nenu akutusowa kumpwembuku?

²¹Ochu mwana kaYerubesheti Abimeleki amujahili kudinyi? Hiyamunatilili ilola dakuhalila kudi mumbanda wadiŋi hewulu dampwembu, hakufwila kuTebezaku? Mwayiladi kwakwihi nampwembu chochochu? eyi wakamwila neyi, Nikambuŋeyi kaHiti Uriya nafwi nawa.

²²Ntemesha hakuya, hakushika, hakumuleja Davidi mazu ejima amutemesheleluwu kudi Yowabi.

²³Ntemesha hakumwila Davidi, nindi, Antu atwimika mushindu, hiyakutulotokela nikumpata, hitukuyishintakeshela kuwiŋililu wakuchisu champwembu.

²⁴Akwakusowa hiyakusowa ambu ŋeyi hewulu dampwembu. Ambuŋamwanta amakwawu anafwi, nikambuŋeyi kaHiti Uriya nafwi nawa.

²⁵Davidi hakumwila ntemesha nindi, Kamwili Yowabi neyi, Bayi wutiya kutama nachumichuku, muloŋa mpoku yakabali yadyaŋa yowu anadyiyi yowu. Koleshaku nankashi njita yeyi yakulwa namukala, wakawutambuli. Eyi nawa kamwinki Ŋovu.

²⁶IŋodaUriya chatiyiliyi nawu nfumwindi Uriya wafwa dehi, hakumudila nfumwindi.

²⁷Chanamanishiyi kudila, Davidi hakutemesha antu, hakumutambula mwitala dindi, yena hakwikala iŋodindi, hakumuvwela mwana weyala. Ilaŋa chumochu cheliliyi Davidi chamutiyishili Yehova kutama.