Read MUKANDA WANZAMBI 2 Samuele 12 Bible Online

2 Samuele 12 - MUKANDA WANZAMBI bible

2 Samuele 12

¹Yehova hakutemesha Natani kudi Davidi. Hakwinza kudi yena, hakumwila nindi, Hamukala wumu hadiŋi amayala ayedi, wumu mukwakuheta, mukwawu kazweŋi.

²Mukwakuheta wadiŋi namayinda nimataŋa amavulu;

³kazweŋi hadiŋi nachumaku, wadiŋi nakana kamukoku kamukaji kamu hohu kakulanda chakulanda, hakukalela. Hikakukulila kudi yena hamu nawanyanindi; kadiili nindi hamu, hikakunwinaŋa mulu pasa lwindi yomweni, hikakukamaŋa hantulu yindi, hikakwikala neyi mwa nindi wamumbanda.

⁴Kweyala waheta kwenjili mukwakwenda. Haku leka kukwata chimuna chamwiyinda dindi, hela chamwitaŋa dindi, adiishi mukwakwcnda nenzi kudi yena, hakukwata kana kamukoku keyala waka zweŋi, hakumudiisha owu iyala wenjili kudi yena.

⁵Davidi hakuzuwa nankashi nansaŋu yayenowu iyala. Hakumwila Natani, nindi, Chahandayi Yehova kwaamu, owu iyala nakoŋi chumichi nateli kufwa,

⁶akafuntishi nyikoku yiwana nanoku kana kamukoku, nanochu chanakoŋiyi chumichi, chanabuliyi niluwi.

⁷Natani hakumwila Davidi, nindi, Iyalowu yeyi. Yehova Nzambi yaIsarela nahoshi nindi, Ami nakuwayishili kwikala mwanta wawaIsarela, ami nakupulwishili kudi Sawulu.

⁸Nakwinkeli mutaŋa wamwanta weyi, nakwinkeli niaŋodi jamwanta weyi akamaŋa kunyima yeyi, nakwinkeli nimutaŋa waIsarela naYuda. Hela neyi yenoyu yakukehela asi nakushiluku mwonsu muwunakeŋeli.

⁹Indi wunadiwilidi izu daYehova mwaka wukoŋi chumichi chatama kumesu indi? Wunatapi dehi kaHiti Uriya nampoku yakabali, wunatambuli dehi niŋodindi hakwikala ujodeyi, wunamujahi dehi nampoku yakabali yawanyana kaAmoni.

¹⁰Ichi dinu mpoku yakabali hiyamba kafuma kumutaŋa weyuku haya nyaka. Muloŋa wunandiwuli dehi, wunatambuli iŋodakaHiti Uriya ekali ipodeyi.

¹¹Yehova nahoshi nindi, Tiya, nukukusaŋumwina yatama kumutaŋa weyi, nukukutambula aŋodi jeyi, eyi aweni wumonaŋa, nukuyinka mukwenu, wakakama nawu mwaana wetenda.

¹²Eyi wachikoŋeleli kumbadi, hakwila ami chumichi nakachila namwaana, aIsarela ejima amonaŋa.

¹³Davidi hakumwila Natani, nindi, Namuvulumuni dehi Yehova. Natani hakumwila Davidi, nindi, Yehova niyena nafumishi dehi nshidi yeyi, hiwakafwaku.

¹⁴Helachochu, ichichiwunaleteshi ayilumbuja Yehova kudi wula nankashi nachumichi chiwunakoŋi, iwu mwana navwaliki kudeyi wakafwa hohu chalala.

¹⁵Natani hakudiyila nikwitala dindi. Yehova hakumweta mwana avweleleluwu Davidi kudi iŋoda Uriya, haku kata nankashi.

¹⁶Davidi hakumulembelela mwana kudi Nzambi. Davidi hakushakama nanzala hohu, hakwijila, hakukama hamaseki wufuku wejima.

¹⁷Akulumpi akwitala dindi hiyakunyamuka, hiyakuya nakwimana kwadirpyi nawu amuhindwishi hamaseki. Yena kwonti kwindi, nikudya nawu nehi.

¹⁸Ifuku damuchitanu nachiyedi mwana yofwa nikufwa. AmbuŋaDavidi hiyakutiya woma wakumuleja chanafwiyi mwana. Hiyakwila nawu, Hadiŋiyi mwana wuchidi mumi etu kuhosha nindi, yena kutiyilila mwizu detu nehi, winzi wumoni kumuleja netu mwana wafwa dehi hakadikati shaku?

¹⁹Davidi chamweniyi ambuŋindi hiyakushawuta shawuta, Davidi eluka nikwiluka nindi mwana wafwa dehi. Davidi hakuyiihula ambuŋindi nindi, Mwana wafwa dehi? Wena nawu, Wafwa dehi.

²⁰Davidi haku hinduka hamaseki, hakuwela, hakuwaya, hakuvwala mahina acheŋi, hakwipila mwitala daYehova, hakudifukula. Hakwinza kwitala dindi, hakuyila nindi, Nyinkenu yakudya; hiyakunamutulila yakudya, hakudya.

²¹Ambuŋindi hiyakumwila nawu, Ichichuma chiwuneli hichumanyi? Hadiŋiyi mwana wuchidi mumi washakamaŋa nanzala nakudila hohu; chaneliyi mwana nafwi dehi, hiwukuhinduka, hiwukudya?

²²Yena nindi, Hadiŋiyi mwana wuchidi mumi nashakamaŋa nanzala nakudila, muloŋa nelapa nami, Neluki hinyi? Hamwaha Yehova wukuntoŋa, mwana wukuhanda.

²³Ichi dinu nafwi dehi, nukushakaminadi nanzala? Nukutwesha kumufuntisha cheŋi, tahindi? Ami yami nakaya kudi yena, yena hamba kafunta cheŋi kudamuku.

²⁴Davidi wamukundejeli iŋodindi Batisheba, weŋilili mwadiŋiyi, wakamini nindi. Wamuvweleli mwana weyala, Davidi wanamutumbili ijina dindi nindi Solomoni. Yehova wamukeŋeli,

²⁵hakutemesha kaprofwetu Natani, hakunamutumba ijina dindi nindi Yedidiya, hansaŋu yaYehova.

²⁶Yowabi walwili naRaba mukala wawanyana kaAmoni, watambwili ŋanda yamwanta.

²⁷Yowabi hakutemesha antemesha kudi Davidi, nindi, Nalwa dehi naRaba, mwalala natambula dehi mukala wamajiya.

²⁸Ichi dinu pompeshaku antu anashali, winzi wuteekeleli mukala, wuwutambuli; kuchina kuwutambula kudami, akenza kawutumba ijina dami.

²⁹Davidi hakupompesha antu ejima, hakuya kuRaba, hakulwa nawu, hakuwutambula.

³⁰Hakufumisha chibaŋula chamwanta wawu kunamutu windi, pezu yachu yashikili muntalenta yawuru yimu, chadiŋi natumalola twalema. Hiya kuchisha kunamutu waDavidi; yena hakwidisha yuma yamumukala yapupiluwu yayivulu nankashi.

³¹Hakwidishamu antu adiŋumu, hakuyisha mwishina dampoku jamazewu, nimwishina dayikuŋu yamajimaji, nimwishina dayizembi yayikuŋu, wayihanwishili nimuyibidi yamatafwali. Dimu mwakoŋeliyi nyikala yawanyana kaAmoni yejima. Davidi nawantu ejima hiyakufunta kuYerusalema.