Read MUKANDA WANZAMBI 2 Samuele 13 Bible Online

2 Samuele 13 - MUKANDA WANZAMBI bible

2 Samuele 13

¹Kulondela henohu mwana kaDavidi Abisalomi wadiŋi namuhelindiwalubanji, ijina dindi Tamari; amukeŋeli kudi Aminoni mwana kaDavidi.

²Aminoni hakusweja kuhilashana, hakukata nikukata nansaŋu yamuhelindi Tamari; muloŋa yena wadiŋi mujiki; Aminoni niyena watiyili kukala kumwila chuma.

³Aminoni wadiŋi nebwambu dindi, ijina dindi Yonadabi, mwana kaShimeya mana kwaDavidi. Yonadabi wadiŋi iyala wasweja kubabala.

⁴Hakumwila nindi, Eyi mwana kamwanta muloŋanyi wudi nakukosa chochichi hefuku hefuku? Kunlejamu nehi? Aminoni hakumwila nindi, Namukeŋi Tamari muhelamana kwami Abisalomi.

⁵Yonadabi hakumwila nindi, Kamaku hakadidi keyi, wudimbani kukata. Chakenzayi tata yeyi nakukutala wakamwili neyi, Amwitŋi muhelami Tamari enzi mwani akanyinkuhu dinkendi dakudya, akanloŋesheli kudya iku nidi nakutala, nidiili kuchikasa chindi.

⁶Dichi Aminoni akama nikukama, hakudimbana kukata. Chenjiliyi mwanta nakumutala, Aminoni hakumwila mwanta, nindi, Amwitŋi mwani muhelami Tamari enzi, antu ŋili tumankendi tuyedi kumesu ami kulonda nitalaŋa, nakadiili kuchikasa chindi.

⁷Davidi hakutemesha muntu kwitala kudi Tamari, nindi, Yaku mwani kwitala damana kweyi Aminoni, wakamuloŋesheli yakudya.

⁸Tamari hakuya kwitala damana kwindi Aminoni, kumuwana nakami. Hakunona wuŋa wakuvuba dehi, hakuwukama, hakutuŋa mankendi kumesu indi, hakwocha mankendi.

⁹Wanoneni meŋa, hakuyisukwila kumesu indi. Ilaŋa yena kwonti kwindi kudya. Aminoni nindi, Yifumishenu antu ejima munu munidi. Hiyakufumamu wejima wawu.

¹⁰Aminoni hakumwila Tamari, nindi, Letaku yakudya munu mukapeka, kulonda nidiili kuchikasa cheyi. Tamari hakunona mankendi atuŋilivi, hakuyitwala kudi mana kwindi Aminoni mukapeka.

¹¹Cheliliyi hakuyishikŋa kwakwihi nayena nindi adyi, hakumukwata, hakumwila nindi, Twaya nikami neyi, eyi muhelami.

¹²Yena hakumwakula nindi, Nehi, eyi mana kwami, bayi wunsawishaku. MuIsarela kwila chenichi chinjila. Bayi wila mwawusupi chochichuku.

¹³Indi ami nakaya mudihi nansonyi yinakatiya? Nineyi aweni wakekala neyi ayisupi amuIsarela. Neyi chochu, hoshaku mwani namwanta; yena hakakulekesha kuntambulaku.

¹⁴Yena kwonti kwindi kutiyilila mwizu dindi. Wamuswejeleli Ŋovu, hakumusawisha, hakukama nindi.

¹⁵Aminoni amuhela nikumuhela nankunyi yabadika nankashi. Nkunyi yamuheleliyi yabadikili kukeŋa kwamukeŋeliyi. Aminoni hakumwila nindi, Nyamukaku, yaku.

¹⁶Mumbanda hakumwila nindi, Chinida! Ichi chiwukunhaŋa, chatama. Chinabadiki dehi kutama kukwawu kuwuna ŋili. Yena kumutiyilila kwonti kwindi.

¹⁷Hakutambika ŋamba yindi wamukalakelelaŋa, hakwila nindi, Muhaŋi iwu mumbanda munu munidi, wumupatilihanzi.

¹⁸Yena mumbanda wadiŋi wavwala chikovwelu chama hina eŋi na eŋi; muloŋa wena makanji owu diwu avwalilaŋa anyana kamwanta achidi ajiki. Ŋamba yindi hakumwidisha, hakumupatila hanzi.

¹⁹Tamari hakudisukwila wuti kunamutu, hakutabula chikovwelu chindi chamahina eŋi na eŋi chavweliyi, hakukwata mbimbanamutu, hakuya, iku wudi nakudila ikumbu, iku wudi nakwenda.

²⁰Mana kwindi Abisalomi hakumwila nindi, Wunadiŋi namana kweyi Aminoni, tahindi? Mwenaku dinu muhelami, yena himana kweyi; bayi wuchisha kumuchima weyuku. Tamari hakushakama kwitala damana kwindi Abisalomi nakaneŋu.

²¹Mwanta Davidi chatiyiliyi yumiyi yejima, wazuwili nankashi.

²²Abisalomi hahosheli naAminoni hela mwamuwahi hela mwatamaku, muloŋa Abisalomi wamuheleli Aminoni nanochu chamusawishiliyi muhelindi Tamari.

²³Chimwahitili nyaka vamana chikupu yiyedi, Abisalomi hakwikala nawakwakutewula nyikoku kuBayali Hazori, wekala kwakwihi naEfweremi. Abisalomi hakutambikaku anyana kamwanta amayala ejima.

²⁴Abisalomi hakwinza kudi mwanta, nindi, Tiya mwani, kambuŋeyi wudi nawakwakutewula nyikoku. Mwanta nawambuŋindi ayi mwani nakambuŋeyi.

²⁵Mwanta hakumwila Abisalomi, nindi, Nehi, mwanami, bayi tuya wejima wetuku, twakenza kakukabisha. Hakumukakeja. Hela chochu, hetŋili kuyaku, wakuminini dakumukiswila nkisu.

²⁶Abisalomi nindi, Neyi nehi, amwitŋi mwani mana kwami Aminoni tuyi nindi. Mwanta hakumwila nindi, Wukuyiladi nindi?

²⁷Abisalomi hakumukakeja, yena hakwitŋa niAminoni nianyana kamwanta amayala ejima kuya nindi.

²⁸Abisalomi waleja dehi aŋamba jindi, nindi, Chimwakamona mwani muchima wa Aminoni hiwukuzaŋajala navinyu, hinakela nami, Mutapenu Aminoni, himwakamujaha, bayi mwakatiya womaku. Netu, yami inayilejuku? Mwakadi kwatishaŋa mwakekalaŋa ayilobu.

²⁹Aŋamba jaAbisalomi hiya kumwila Aminoni mwomwayilejeluwu kudi Abisalomi. Anyana kamwanta ejima hiyakunyamoka, hiyakukandama kandama hayi ngonŋavalu yawu, hiyakutemoka.

³⁰Cheliluwu achidi munjila, nsaŋu hijikushika kudi Davidi jakwila nawu, Abisalomi najahi dehi anyana kamwanta amayala ejima, niwumu wakusha lahu nehi.

³¹Mwanta hakunyamuka hakutabola mahinindi, hakukama niheseki. Ambuŋindi ejima hiyakwimanaku mahinawu akutabola dehi.

³²Yonadabi mwana kaShimeya mana kwaDavidi, hakuhosha nindi, Nkaka yami bayi atoŋojoka nindi anajahi anyana kamwanta anyikwenzi ejimaku. Nafwi Aminoni hohu. Chamukanwa kaAbisalomi chumichi achifuukula dehi kufumisha hefuku damusawishiliyi muhelindi Tamari.

³³Ichi dinu, nkaka yami mwanta, bayi asha muchima kuchumichuku, bayi atoŋojoka nindi anyana kamwanta amayala anafwi ejimaku, nafwi yowu Aminoni hohu.

³⁴Ilaŋa Abisalomi watemukili. Mukwenzi mukwakutalatala nindi afu mbuli mesu atali, hakumona kunyima yindi kudi nakwinza antu amavulu mwivumu dampidi.

³⁵Yonadabi hakumwila mwanta nindi, Tala, anyana kamwanta awa anenzi dehi awa, mwomwanahoshaŋa kambuŋeyi dimu chineli.

³⁶Cheliliyi nindi akumishi kuhosha, kutala anyana kamwanta anenzi dehi, avwakuka nimumakumbu akudila. Nimwanta nawa niambu ŋindi ejima adilili nankashi.

³⁷Ilaŋa Abisalomi watemukili, wayili kudi Talimayi mwana kaAmihuri mwanta wakuGeshuri. Davidi wadilili mwanindi hefuku hefuku.

³⁸Dichi Abisalomi watemukili hakuya kuGeshuri, hakushakamaku nyaka yisatu.

³⁹Mwanta Davidi wafwilili nankashi kumona Abisalomi, muloŋa henohu wadikundeja dehi nansaŋu yaAminoni, nindi wafwa dehi kwindi.