Read MUKANDA WANZAMBI 2 Samuele 14 Bible Online

2 Samuele 14 - MUKANDA WANZAMBI bible

2 Samuele 14

¹Yowabi mwana kaZeruwiya wamweni muchima wamwanta wunayi hadi Abisalomi.

²Yowabi hakutuma antu kuTekowa nakuleta mumbanda wamaana. Hakumwila nindi, Kadimbani mwani kudila, wakavwali wuvwalu wakudila nachu mwani, bayi wakawaya manjuku, chiŋa wikala neyi mumbanda wadila dehi mufu windi dilee hanalehi.

³Wiŋili mwa-mwanta wuhoshi nindi munukukuleja. Yowabi hakumuleja mwakaho shayi.

⁴Mumbanda wakuTekowa chahosheliyi namwanta, hakudimbuka chamesu indi hamaseki, hakudifukula, nindi, Nkwashuku mwanta.

⁵Mwanta hakumwila nindi, Kudidi? Mumbanda hakwakula nindi, Mwalala ami nimumbanda wantuluwa, nfumwami wafwa dehi.

⁶Ami kambuŋeyi nadiŋi nawanyana amayala ayedi, azuŋila mumpata, hikwadiŋi wakuyamu nwinaku, wumu hakutapa mukwawu, hakmnujaha.

⁷Hinukukasumuka chisaka chetu chejima hichikuvwakukila ami kambuŋeyi, nawu, Twinki natapi mana kwindi, tumujahi nawumi wamana kwindi anajahiyi; keŋa akisaŋani kwawu ninswana nawa, enza ajimi ikala dami dinashaluku, chakadi kumushila nfumwami hela ijina hela wakushalahu hanu hewulu deseki.

⁸Mwanta hakumwila mumbanda, nindi, Yaku kwitala deyi, nukuleja antu akaloŋeshi nsaŋu yeyi.

⁹Mumbanda wakuTekowa hakumwila mwanta nindi, Nkaka yami mwanta, kuluwa kwikali kwamami namutaŋa watata i yami; mwanta netanda dindi abuli muloŋa.

¹⁰Mwanta nindi, Muntu wakakuhosha chuma kamuleti kudami, hakakwila nawa cheŋi chumaku.

¹¹Mumbanda nindi, Mwanta aanuki Yehova Nzambi yeyi mwani, kuchina mukwakutenda mashi kukisaŋanaŋa tuhu, akenza kankisaŋena mwanami. Mwanta nindi, Chahandayi Yehova kwaamu, kwosi lusuki lwamwaneyi nilumu lwakaholoka hamasekuku.

¹²Mumbanda nindi, Ami kambuŋeyi nihoshi mwani kadizu nankaka yami mwanta. Nindi, Hoshaŋa kweyi.

¹³Mumbanda nindi, Indi ochu wunafuukwilidi chuma chakutamisha antu aNzambi chidi neyi ichi? Muloŋa chanahoshiyi mwanta izu idi wudi neyi muntu natanyi dehi, nanichi chanabuliyi kufuntisha cheŋi windi anakinjikuwu.

¹⁴Muloŋa chetu yokufwa hohu, tudi neyi meji anamwaŋali heseki, abulaŋa kunonawu cheŋi. Chikaŋa Nzambi hafumishaŋa wumi wamuntuku, ilaŋa yena wafuukulaŋa mwakwila owu anakinjikuwu akabuli kumuhaŋila kwakulehi nayena.

¹⁵Ichi chinenzi nakuhosha kudi nkaka yami mwanta izu idi, chinafumi hakuntiyisha woma kudi antu. Ami kambuŋeyi nela nami, Leka nihoshi namwanta. Nami wamba kela mwanta wukwila mwakumulombayi kambu ŋindi.

¹⁶Ochu mwanta abuli kutiya, abuli kwamwina kambuŋindi kudi muntu nakeŋi kunkisaŋana ninami nimwanami kumu tufumi muwuswana waNzambi?

¹⁷Ami kambuŋeyi nela nami, Izu dankaka yami mwanta diikali mwani dakukundeja. Muloŋa nkaka yami mwanta wudi neyi kaŋelu i kaNzambi, welukaŋa nimwamuwahi nimwatama. Yehova Nzambi yeyi ekali naneyi.

¹⁸Mwanta hakumwakula owu mumbanda, hakumwila nindi, Bayi wunjinda mwani chuma chinukukwihulaku. Mumbanda nindi, Nkaka yami mwanta ahoshi mwani.

¹⁹Mwanta nindi, Yuma yejimiyi yinafumi kudi Yowabi, tahindi? Mumbanda hakwakula nindi, Chiwahanda kwaamu, eyi nkaka yami mwanta, hosi muntu wayaŋa hela kuchikasa chachidiilu hela kuchimunswa chakwambuka mwanahoshiyi nkaka yami mwantaku. Muloŋa kambuŋeyi Yowabi diyi wanleja, diyi washa mazu ejima awa mukanwa kamami kambuŋeyi;

²⁰chaneliyi kambuŋeyi Yowabi chumichi nalondi kubalumuna nsaŋu. Nkaka yami wukweti maana adi neyi akaŋelu kaNzambi, akwiluka nachu yuma yahamaseki yejima.

²¹Mwanta hakumwila Yowabi, nindi, Tiya dinu, ami neli dehi chumichi. Dichi yaku wakaleti cheŋi mukwenzi Abisalomi.

²²Yowabi hakudinata chamesu indi hamaseki, hakudifukula, hakumukiswila mwanta nkisu. Yowabi nindi, Ami kambuŋeyi neluki dehi nami komana nawani dehi wuselewa kumesu eyi, nkaka yami, eyi mwanta, nanichi chaneliyi mwanta munalombi ami kambuŋeyi.

²³Yowabi yonyamuka nikunyamuka, hakuya nikuGeshuri nakuleta Abisalomi enzi kuYerusalema.

²⁴Mwanta hakwila nindi, Ayi kwakwitala dindi yomwenindi, bayi anmona kumesuku. Abisalomi hakuya nikwitala dindi yomwenindi, hamweni kumesu amwantaku.

²⁵MuIsarela mwejima himwadiŋi muntu walubanji wakweseka naAbi salomuku, aswejeli kumuhameka nankashi. Kufumisha kumadachilu indi ndo nihewulu danamutu windi hadiŋi nahataminayuku.

²⁶Watewilaŋa namutu windi hamwaka hamwaka muloŋa nsuki jindi jadiŋi nakumulemena, dichi chajitewililaŋayi. Chatewilaŋayi namutu windi, hakweseka nsuki jakunamutu windi hijikushika mujishekeli makulakaji ayedi, mwomupezu yamwanta.

²⁷Abisalomi amuvweleleli anyana amayala asatu, wamumbanda wumu, ijina dindi Tamari, wadiŋi mumbanda wasweja lubanji kumesu.

²⁸Abisalomi washakamini muYerusalema nyaka yamana chikupu yiyedi chakadi kumumona mwanta kumesu.

²⁹Abisalomi hakutemesha mazu akutambika Yowabi, kulonda kumutemesha kudi mwanta. Yena kwindi kwonti kwindi kwinza kudi yena. Watemesheluku kamuchiyedi, saŋa alekelayi kwinza.

³⁰Hakuyila aŋamba jindi nindi, Talenu, iha daYowabi didi kwakwihi nadami, mudi bali yindi; yenu mwakadochi. Aŋamba jaAbisalomi hiyakwocha iha.

³¹Yowabi hakunyamuka, hakwinza nikwitala daAbisalomi, hakumwila nindi, Aŋamba jeyi anochelidi iha dami?

³²Abisalomi hakumwakula Yowabi nindi, Nakutemesha nami, Twaya nikute meshi kudi mwanta, wihuli neyi, Indi nafuminidi kuGeshuri? Chakeŋa kuwaha neyi diku kunidi kwami nihanu. Dichi dinu aŋitŋi nimumoni mwanta kumesu. Neyi mudami mudi kuluwa, akanjahi tuhu kwindi.

³³Yowabi hakwinza kudi mwanta, hakumuleja. Chamutambikiliyi Abisalomi hakwinza kudi mwanta, hakubandama chamesu indi hamaseki kumesu amwanta. Mwanta hakumupwepula Abisalomi.