Read MUKANDA WANZAMBI 2 Samuele 17 Bible Online

2 Samuele 17 - MUKANDA WANZAMBI bible

2 Samuele 17

¹Ahitofweli hakumwila Abisalomi nawa, nindi, Nleki mwani nitondi amayala makombakaji ikumi nayedi, ninyamuki, nimulondeli Davidi lufuchi wufuku owu.

²Nakamushintakeshi hachidiyi wazeya, hachidiyi wabula Ŋovu nakamufwishi mutentu, niantu ejima adiyi nawu akatemoka, nakatapi kwamwanta hohu.

³Antu ejima nakayifuntishi kudeyi; antu ejima akufunta akweseka neyala wudi nakutondatonda. Antu ejima hiya kashakama chachiwahi.

⁴Chahosheliyi ochu Abisalomi nawawakulumpi awaIsarela ejima elili nawu, Chachiwahi.

⁵Abisalomi hakwila nindi, Mutambikenu Hushayi wakuAraki nawa, tutiyi mwakuhoshayi niyena nawa.

⁶Hushayi chenjiliyi kudi Abisalomi, Abisalomi hakumwila nindi, Tiya mwanahoshiyi Ahitofweli. Twili mwana hoshiyi, tahindi? Neyi nehi, hoshaku.

⁷Hushayi hakumwila Abisalomi nindi, Maana anayilejiyi Ahitofweli lelu hiyamawahuku.

⁸Hushayi hakunuŋaku nindi, Tata yeyi nawantu indi wunayiluki dehi, hiyayilobu kwawu, atiya dehi kunyichima bwi neyi chikwabera anakwatiluwu anya nindi mumpata. Tata yeyi himukwanjita, akami hamu nawantu kwaamu?

⁹Hanu wabatama dehi muwina, indi kwiji kwacheŋi. Neyi hakusambila antu amakwawu akafwa, yowu wakatiya nawu, Antu akulondela Abisalomi anayitapi.

¹⁰Hela womika, hela wukweti muchima wudi neyi mutupa, wakafwomoka zo-o. Muloŋa aIsarela ejima amwiluka dehi tata yeyi hichilobu, niantu adiyi nawu hiyayilobu.

¹¹Dichi ami nukuyileja maana, nami, Akakupompesheli aIsarela ejima, kufumisha kuDani ndo nikuBeri sheba, avula neyi wusekulula wudi kuchikumu chakaluŋalwiji. Wakayi kunjita nineyi aweni.

¹²Twakamushintakeshi kwonsu kwakamwekenayi, twakamuwulami neyi chaholokaŋa wilumi hamaseki. Hela yena, hela antu ejima adiyi nawu, hosi niwumu twakashiyaku.

¹³Neyi twakamuwana neŋili dehi mumukala wampwembu aIsarela ejima akatwala nyonji kumuka lowu, twakawukokela mukaloŋa koke-e, nikadilola kamu kakushalahu nehi.

¹⁴Abisalomi namayala awaIsarela ejima elili nawu, Maana anatulejiyi Hushayi wakuAraki anabadiki maana anatulejiyi Ahitofweli. Muloŋa Yehova nafuukuli dehi kubayisha maana amawahi ayilejeliyi Ahitofweli, kulonda Yehova akamuleteli Abisalomi jatama.

¹⁵Hushayi hakuleja atupristu aZadoki naAbiyatari, nindi, Tiyenu maana alelawu Abisalomi nawawakulumpi awaIsarela kudi Ahitofweli; tiyenu nawa nimaana inayileji ami.

¹⁶Dichi dinu katemeshenu swayi mazu akumuleja Davidi, nenu, Wufuku walelu bayi wukama kunyaba yamwisaŋaku, chiŋa wuzambuka hohu; mwanta nawantu ejima adiyi nawu akenza kayiminyina kumu.

¹⁷Henohu aJonatani naAhimayazi adiŋi ashakama kuEnirogeli. Kwayilaŋa kaŋamba kamumbanda nakuyilejaleja nsaŋu, kulonda wena ayaŋa nakuleja mwanta Davidi kuchina kuyimona kudi antu nakwijila mumukala.

¹⁸Hela chochu, ayimweni kudi mukwenzi wumu, hakuleja Abisalomi. Hiyakuya lufuchi mwayedi wawu, hiyakushika kwitala damuntu wakuBahurimi wadiŋi neshima muchipaŋu chindi, hiyakwijila mu.

¹⁹Mumbanda hakunona chifwiku, hakubuta hewulu deshima, hakwanyikahu nitidiku yakusohola. Antu kwiluka chuma nehi.

²⁰Aŋamba jaAbisalomi ashikili kwitala kudi mumbanda, nawu, Ahimayazi naJonatani adi kudihi? Mumbanda hakuyila nindi, Azambuka dehi kakaloŋa kadi nameji. Cheliluwu keŋe-e, kuyimona nehi, hiyakufunta kuYerusalema.

²¹Cheliluwu anayi dehi, hiyakufuma mwishima, hiyakuya nakuleja mwanta Davidi. Hiyakumwila Davidi, nawu, Nyamukenu, muzambuki swayi kaloŋa. Muloŋa Ahitofweli nayileji dehi maana akuyitamisha.

²²Davidi hakunyamuka, niantu ejima adiŋiyi nawu, hiyakuzambuka Yodana. Chi kwelili hikukwanzakana nakucha hikwasheli hoku muntu niwumu wabulili kuzambuka Yodanaku.

²³Ahitofweli chamweniyi wena kwila mwanayilejiyi nehi, hakulema sadi hachimbulu chindi, hakunyamuka, hakuya kwawu, kumukala wawu, haku loŋesha loŋesha nsaŋu jakwitala dindi, adikudika nikudikudika. Wafwilili, amujiikili mwŋamu datata yindi.

²⁴Davidi washikili kuMahanayimi. Abisalomi wazambukili Yodana, niyena niamayala awaIsarela ejima adiŋiyi nawu.

²⁵Abisalomi wakunjikili Amasa kwikala mwanta wanjita, ahiŋi mudi Yowabi. Amasa wadiŋi mwana keyala wumu, ijina dindi Itira kaIsarela, weŋihli mudi Abigayili mwana kaNahashi, mana kwaZeruwiya, Zeruwiya mama yaYowabi.

²⁶AIsarela niAbisalomi atuŋili chilombu chawu mwituŋa daGileyadi.

²⁷Davidi chashikiliyi kuMahanayimi, Shobi mwana kaNahashi waku Raba wawanyana kaAmoni, niMakiri mwana kaAmiyeli wakuLodebari, niBazilayi mukwaGileyadi wakuRoŋelimi,

²⁸hiyakuleta tudidi, nŋimbashila, niyuma yamawumba, nitidiku, nibali, niwuŋa, nitidiku yakwocha dehi, nimakundi, nikambolokonyi, niyisakola yakwocha dehi,

²⁹niwuchi, nima nteka, ninyikoku, nichizi yaŋombi, yaDavidi nawantu adiŋiyi nawu, kulonda adyi. Muloŋa wena elili nawu, Antu adi nanzala, anazeyi, adi nampwila mwisaŋa.