Read MUKANDA WANZAMBI 2 Samuele 18 Bible Online

2 Samuele 18 - MUKANDA WANZAMBI bible

2 Samuele 18

¹Davidi wachindili antu adiŋiyi nawu, wayikunjikilili awakulumpi amakombakaji, niakulumpi amakulakaji.

²Davidi hakutemesha chibalu chawantu chimu naYowabi, chibalu chikwawu naAbishayi, mwana kaZeruwiya, mana kwaYowabi, chibalu chikwawu naItayi mukwaGati, yibalu yisatu yesekana. Mwanta hakuyila antu nindi, Chalala ninami aweni nukuya nenu.

³Antu nawu, Eyi bayi wuya kwoku. Muloŋa hela neyi etu tukutemuka hiyakachisha kumuchimaku, hela neyi twakafwa amavulu, hiyakachisha kwawu kumuchimaku. Eyi wuneseki mumakombakaji etwetu ikumi. Komana chachiwahi wushali hamukala nakutukwasha.

⁴Mwanta hakuyila nindi, Nukwila mwejima mumunakeŋi. Mwanta hakwimana kwakwihi nachisu champwembu, antu ejima hiyakwidika yendu yamakulakaji niyendu yamakombakaji.

⁵Mwanta hakuleja aYowabi niAbishayi niItayi nindi, Mwakamwilaŋa mukwenzi Abisalomi chachiwahi hamujimba wamami. Chadiŋi nakuyi lejayi mwanta awakulumpi anjita ejima nsaŋu yaAbisalomi, antu ejima adiŋi nakuchitiya.

⁶Antu hiyakuya nakulwa nawaIsarela mwisaŋa. Njita yadiŋi muma humbu akuEfweremi.

⁷AIsarela ayitapili kudi ambuŋaDavidi. Denodu ifuku kwadiŋi kutapana kwakweni kwenoku, kwafwili antu makombakaji makumi ayedi.

⁸Muloŋa njita yatandamini mwahita ituŋa dejima; mahumbu adiili antu amavulu, adiiluwu kudi mpoku yakabali akeheli.

⁹Abisalomi hakukasumuka nabulakani dehi nawaŋamba jaDavidi. Abisalomi wadiŋi nakwendela hachiniŋonŋavalu chindi. Chingongavalu hakuhitila mwishina danyitayi yamukula yajika, namutu windi hiwukukakela kumukula, hakwikala haneli iwulu iku, iseki iku, yena hakachi. Chingongavalu chadiŋi mwishina hakudiyila.

¹⁰Muntu wumu hakuchimona, hakuleja Yowabi nindi, Namukasumuki Abisalomi wudi nakuyekela kumukula.

¹¹Yowabi hakumwila muntu wamulejeli nindi, Indi eyi wachimona wale keladi kumutapila kwenoku ipanda dimu niheseki? Mutenowu nakwinki mali asiliva ikumi, nimuya weyi.

¹²Owu muntu hakumwila Yowabi, nindi, Hela neyi akunyinka muchikasa chami mali asiliva ikombakaji, hinukutwesha kumwolwela mwana kamwanta chikasaku. Muloŋa chadiŋi nakuyilejayi mwanta nineyi niAbishayi niItayi, nindi, Babalenu, bayi mwakamwila mukwenzi Abisalomi chumaku, etu twadiŋi nakuchitiya.

¹³Hela neyi neli wumi windi chatama, kudi mwanta hikwajindewaŋa chumaku, nineyi aweni wadi kuŋimena hahalehi.

¹⁴Yowabi nindi, Hinukutwesha kulaba naneyuku. Hakusenda tumayoŋa tusatu muchikasa chindi, hakutuhanwisha haluduŋu lwaAbisalomi, hadiŋiyi wamumi mukachi kamukula.

¹⁵Anyikwenzi ikumi asendelaŋa yitwa yaYowabi, hiyakumu nyeŋumuka kwi-ndo, hiyakumutapola Abisalomi, hiyakumujaha.

¹⁶Yowabi hakwimba mpùŋa, antu hiyakufunta kwayiluwu nakuhaŋa aIsarela; muloŋa Yowabi hakuyilekesha antu.

¹⁷Amunoneni Abisalomi, amuumbilili muwina weneni wadiŋi omu mwihumbu, amulumbikili mulu mba wamalola weneni. AIsarela ejima atemokela nikumatenti awu.

¹⁸Abisalomi hadiŋiyi wamumi watuŋili kaposhi kindi, kekala muchine kineki chamwanta, muloŋa yena welili nindi, Hinikweti mwana wakwanukila ijina damuku. Hakutumba kaposhi ijina dindi yemweni. Nilelu saŋa akatenenawu nawu, Kaposhi kakwanukila Abisalomi.

¹⁹Mwana kaZadoki Ahimayazi hakwila nindi, Nleki niyi lufuchi, nimu tweli mwanta nsaŋu, nakamuleji chanamutendiyi Yehova, chanajahiyi ayilumbu jindi.

²⁰Yowabi hakumwila nindi, Eyi lelu kutwala nsaŋu nehi, wakatwala nsaŋu ifuku dacheŋi, ilaŋa lelu bayi wutwala nsaŋuku, muloŋa mwana kamwanta wafwa dehi.

²¹Yowabi hakumwila Kabwibu, nindi, Eyi yaku, wakamuleji mwanta yuma yiwunamoni. Kabwibu hakumu bandamina Yowabi, hakuya lufuchi.

²²Mwana kaZadoki Ahimayazi hakumwila Yowabi cheŋi, nindi, Hela chochu nleki mwani ninami nawa nimulondeli Kabwibu lufuchi. Yowabi nindi, Wukuyiladi lufuchi eyi mwanami? Ochu kudi nsaŋu yakulumbuluka?

²³Yena nindi, Hela chochu, niyi lufuchi. Hakumwila nindi, Yaku lufuchi. Ahimayazi hakuyila njila yachana lufuchi, hakumupandakana Kabwibu.

²⁴Davidi wadiŋi nakushakama haneli iku chisu champwembu, iku chisu champwembu. Mukwakutalatala wakandamini hewulu dachisu, hakuya hampwembu, hakufumbula mesu indi, hakutala, hakumona muntu wudi nakwenda lufuchi kanka windi.

²⁵Mukwakutalatala hakubidika, haku muleja mwanta. Mwanta nindi, Neyi wudi kanka windi, wudi nansaŋu. Hakwinza lufuchi, hakushika kwakwihi.

²⁶Mukwakutalatala wamweni muntu mukwawu wudi nakwenda lufuchi. Mukwakutalatala hakubidika mukwakuhemba kuchisu, nindi, Namoni muntu wudi nakwenda kanka windi. Mwanta nindi, Niyena nawa nasendi nsaŋu.

²⁷Mukwakutalatala nindi, Namoni kutemuka kwaniwu wudi kumbidi kudi neyi kutemuka kwamwana kaZadoki Ahimayazi. Mwanta nindi, Owu himuntu muwahi, wudi nakwinza nansaŋu yayiwahi.

²⁸Ahimayazi hakubidika, hakumwila mvanta nindi, Kwamwena. Hakubandama kumesu amwanta chamesu hamaseki, nindi, Yehova Nzambi yeyi akisulewi nkisu, yena najahishi antu amwolweleli nkaka yami mwanta makasawu.

²⁹Mwanta nindi, Mukwenzi Abisalomi wudi chachiwahi? Ahimayazi hakwakula nindi, Hatemeshayi Yowabi kambuŋa mwanta, ninami kambuŋeyi, namona luntu lunawuŋi; ami kambuŋeyi kwiluka yanawuŋiluwu nehi.

³⁰Mwanta nindi, Baalukaku, wimani iku. Hakubaa luka hambadi, hakwimana.

³¹Kutala Kabwibu hakwinza. Kabwibu nindi, Tiya nsaŋu, eyi nkaka yami mwanta. Lelu Yehova nakupulwishi dehi kudi antu ejima akunya mukila.

³²Mwanta hakumwihula Kabwibu, nindi, Mukwenzi Abisalomi wudi chachiwahi? Kabwibu hakwakula, nindi, Ayilumbu jankaka yami mwanta, niantu ejima akukunyamukila nakukwila chatama, amoni neyi chanamoniyi ona mukwenzi.

³³Mwanta hakuzaala nankashi, hakuka ndama mwitala dadiŋi hewulu dachisu champwembu, hakudila, iku wudi nakuya, iku wudi nakwila nindi, Eyi mwanami Abisalomi! Mwanami! Mwanami Abisalomi! Mutenowu yami nakufwila! Eyi Abisalomi! Mwanami, mwanami!