Read MUKANDA WANZAMBI 2 Samuele 2 Bible Online

2 Samuele 2 - MUKANDA WANZAMBI bible

2 Samuele 2

¹Kulondela henohu Davidi hakwihula kudi Yehova, nindi, Niyi mumukala waYuda wumu, tahindi? Yehova hakumwila nindi, Yaŋa. Davidi nindi, Nukuya kudihi? Yena nindi, KuHeberoni.

²Davidi hakuya kwenoku, hamu nawaŋodi jindi ayedi, Ahinowami wakuYezereyeli, naAbiŋa yili wadipi iŋoda Nabali wakuKarameli.

³Davidi hakuya nawantu indi adiŋiyi nawu, iyala niakwetala dindi, iyala niakwetala dindi; hiyakushakama kunyikala yakuHeberoni.

⁴Antu amuYuda hiyakwinza hiyakumuwayisha Davidi kwenoku ekali mwanta wakuyula mutaŋa waYuda. Amulejeli Davidi, nawu, EniYabeshi Gileyadi diwu amujiikili Sawulu.

⁵Davidi hakutemesha atupanda kudi eniYabeshi Gileyadi, hakuyila nindi, Ayikiswili nkisu kudi Yehova, nanochu chimunamwili mwanta wenu Sawulu chumochu chachiwahi, chimunamujiiki.

⁶Dichi Yehova ayili ninenu mwamuwahi mwakashinshi; ochu chimuneli mwenomu ninami nawa nakayila mwomwenomu mwamuwahi.

⁷Dichi dinu dikoleshenu mwikali ayilobu, mulopa mwanta wenu Sawulu wafwa dehi, nimutaŋa waYuda anwayisha dehi ami niikali mwanta wawu walukanu.

⁸Abineri mwana kaNeri, wadipi mukulumpi wanjita yaSawulu, wata mbwili Ishibosheti mwana kaSawulu weyala, wamuzambwishili, wamutweli kuMahanayimi,

⁹wamudiishili wanta wakuGileyadi, niwawaAshuri, niwakuYezereyeli, niwaEfweremi, niwaBenjamini, niwawaIsarela ejima.

¹⁰Ishibosheti mwana kaSawulu washikili munyaka makumi awana hata chikiliyi kuyula aIsarela, wayuhli nyaka yiyedi. Hakwila mutaŋa waYuda akumini kudi Davidi.

¹¹Nyaka yadiŋiyi Davidi mwanta wamutaŋa waYuda kuHeberoni yashikili munyaka yitanu nayiyedi natukweji tutanu nakamu.

¹²Abineri mwana kaNeri, nawambuŋa Ishibosheti mwana kaSawulu, hiyakufuma kuMahanayimi, hiyakuya kuGibeyoni.

¹³Yowabi mwana kaZeruwiya ŋiyena, nawambuŋa Davidi, hiyakuya nakuyibulakana kwijiya dakuGibeyoni. Hiyakushakama awa ishinadi dejiya, awa ishinadi dejiya.

¹⁴Abineri hakumwila Yowabi, nindi, Anyikwenzi anyamuki mwani, ahemapa tuyitali.

¹⁵Yowabi nindi, Anyamuki kwawu. Anyamuka nikunyamuka, hiyakuzambuka, kuchinda aBenjamini aIshibosheti mwana kaSawulu, ikumi nayedi, ambuŋa Davidi ikumi nayedi.

¹⁶Wejima wawu hiyakudikwatila kunyitu, hiyakuditapila mumbavu, hiyakudimbukila hamu. Henohu hiyakutumbahu ijina nawu, Hesapa dampoku jatwa, dekala ku Gibeyoni.

¹⁷Denodu ifuku njita yaswejeli nankashi, azeyesheli Abineri nawaIsarela kudi ambuŋa Davidi.

¹⁸Anyana kaZeruwiya mwasatu wawu adiŋi kwoku, aYowabi naAbishayi naAsaheli. Asaheli wadipi wapepela kunyendu neyi mbaala.

¹⁹Asaheli hakumuhapa Abineri; chadipi nakumuhapayi ochu Abineri hasenukili aya hela kuchikasa chachidiilu hela kuchimunswaku.

²⁰Abineri hakutala hanyima, hakwila nindi, Komana yeyi, Asaheli? Nindi, Yami.

²¹Abineri hakumwila nindi, Senukaku wuyi kuchikasa cheyi chachidiilu hela kuchi munswa, wakakwatuhu mukwenzi wumu, wakamubuwi yuma yindi. Asaheli kwonti kwindi kuleka kumuhapa.

²²Abineri hakumwila Asaheli cheŋi, nindi, Lekaku kunhaŋa, nikudimbwishuhu tuhu kweyi hamaseki? Nila ochu tukutwesha kuditala pahi namana kweyi Yowabi?

²³Kumuleka kwonti kwindi, Abineri hakumutaŋa namushika weyopa mwivumu, iyoŋa dimuhanuka zwa nikunyima. Hakudimbuka nikwenoku, hakufwila kwoku. Antu ejima ashikili kwadimbukilili Asaheli, kwafwililiyi, hiyakwimana.

²⁴Yowabi naAbishayi chamuhaŋawu Abineri hohu; chashikiluwu kumpidi yaAma yekala kwakwihi naGiya kwokunjila yakwisapa daGibeyoni, itaŋwa diholoka nikuholoka.

²⁵Anyana kaBenjamini hiyakudipompesha kudi Abineri, ela nichendu chimu, hiyakwimana hewulu dampidi yimu.

²⁶Abineri hakutambika kudi Yowabi, nindi, Mpoku yakabali yiyapa tuhu nakunopesha? Eyi kwiluka kweyi neyi chumichi chikwikala chalula hakukuminina nehi? Mwakanyi iwakalekesha antu kuhapa ana kwawu?

²⁷Yowabi nindi, Chahandayi Nzambi kwaamu, chalala neyi wabula kuho shamu mutenowu kubudidi antu mwa-mwa, hiyakuleka kuhapa ana kwawu.

²⁸Yowabi emba nimpùŋa, antu ejima emana nikwimana, kuyihaŋa nawa cheŋi aIsarela nchi, nikulwa nawu cheji nehi.

²⁹Abineri nawantu indi hiyakwenda wufuku wejima muchana, hiyaku zambuka Yodana, hiyakuhita muBitironi yejima, hiyakushika kuMahana yimi.

³⁰Yowabi hakufunta kwayiliyi nakulondela Abineri. Chapompe sheliyi antu ejima hamu, habulili ambuŋaDavidi ikumi natanu nawana niAsaheli.

³¹Hakwila ambuŋaDavidi atapili antu aAbineri akwaBenjamini chakwila hiyakufwa antu makulakaji asatu namakumi atanu nadimu.

³²Hiyakumunyamuna Asaheli, hiyakumujiika mwŋamu datata yindi dadiŋi kuBetelemi. Yowabi nawantu indi hiyakwenda wufuku wejima, itaŋwa hidikuyichila kuHeberoni.