Read MUKANDA WANZAMBI 2 Samuele 23 Bible Online

2 Samuele 23 - MUKANDA WANZAMBI bible

2 Samuele 23

¹Tiyenu mazu aDavidi akukuminina. Mwana kaJesi Davidi, iyala anyamwinuwu kwiwulu, wawayishewa waNzambi yaYakoba, wembishaŋa tumina twawaIsarela twatuwahi,

²nindi, Spiritu yaYehova wahosheleli mudami, izu dindi dadiŋi kwidimi dami.

³Nzambi yaIsarela wahosheli, Ilola daIsarela wahosheli nanami, nindi, Wayulaŋa antu mwaloŋa, wayulaŋa nawoma waNzambi,

⁴wakekala neyi diyi kucha kwabudidi, hatuntukaŋa itagwa, budidi wakadi mavu; hamenaŋa munyenvu heseki, himwelaŋa munatooki dehi nankashi nvula yinanoki dehi.

⁵Mwalala mutaŋa wami kudi Nzambi hiwekala mweno muku; hela chochu, yena natiyaŋani nanami chitiyaŋenu chahaya nyaka, chakuloŋesha mwahita yuma yejima, chakola ngu; mwenimu dimu muwa mwinu wami wejima, dimu munakeŋa mwejima, hela wabulaŋa kukuli shamu.

⁶Antu amukunkulwayi akekala wejima wawu neyi nyiŋa yashinjikilaŋawu kwakulehi, nanochu chakaŋanyaŋawu kuyikwata nachikasa.

⁷Kuyikwata chiŋa kudi muntu namanyeki yikurilu nimulunda weyoŋa; akayocha mukesi bwii chikupu kwawu kwekalawu.

⁸Tiyenu majina awayilobu adiŋi aDavidi; iwu Yoshebi Bashebeti mukwaTahakemoni, mukulumpi wawakulumpi; diyi Adino wakuEtiseni walwih nawantu makulakaji atanu nasatu atapililuwu hohamu.

⁹Walondeli hadi yena Eleyazari mwana kaDodayi mwana kamukwa Ahowa, diyi wadiŋi wawayilobu asatu adiŋi naDavidi, hadikaŋiluwu nawaFwilistinu, hadipompesheluwu nawu adasi njita, heliluwu amayala akuIsarela anadiyili dehi kwawu.

¹⁰Hakunyamuka, hakutapa aFwilistinu, tapee, nichazeyeli chikasa chindi, chikasa chindi hichikuminina nikumpoku yakabali chau! Denodu ifuku Yehova wayimikishili mushindu weneni nankashi; antu hiyakufunta kwanakupupa hohu.

¹¹Hadi yena halondeli Shama mwana kaAge wakuHarari. AFwilistinu adipompesheli chendu, kwadiŋi chibalu cheha chakudima dehi kambolokonyi chejima; antu hiyakutemoka aFwilistinu.

¹²Yena hakwimana mukachi keha, hakulwila iha odu, hakuyijaha aFwilistinu. Yehova wemiki shili mushindu weneni nankashi.

¹³Asatu amakumi asatu adiŋi abadika akunkumukili, ashikili kudi Davidi hachilaaka chakwaŋula yakudya kwiyeŋu dakuAdulami. Chendu chawaFwilistinu chatuŋili chilombu muchinekineki chawaRefwa.

¹⁴Henohu Davidi wadiŋi mumpwembu, henohu asha dehi mashidika awaFwilistinu muBetelemi.

¹⁵Davidi hakufwila nankashi meji, nindi, Hinyi wukunyinka meji akwishima dakuBetelemi dekala kuchisu chamukala?

¹⁶Wenawa ayilobu asatu hiyakubalula njita yawaFwilistinu, hiyakuhanukamu, hiya kutaha meji mwishima dakuBetelemi, dadiŋi kuchisu chamukala, hiyakunona, hiyakutwala kudi Davidi. Yena kuyinwa kwonti kwindi, hakuyimwaŋila kumesu aYehova.

¹⁷Nindi, Eyi Yehova, ami kwila mwenimu kwakulehi nankashi. Ninwi mashi awantu aditwala kukufwa? Dichi kuyinwa kwonti kwindi. Diyi yuma yeliluwu awa ayilobu asatu.

¹⁸Abishayi mana kwaYowabi, mwana kaZemwiya diyi wadiŋi mukulumpi wanawa asatu. Wayinyamwinini antu makulakaji asatu iyoŋa dindi, hakuyijaha, hakutiyakana ijina hadi awa asatu.

¹⁹Awa asatu hidiyi wadiŋi wabadikamu kulemaku? Amwilisha nimukulumpi wawu. Hela chochu hashikili mudi asatu akusambilaku.

²⁰Benaya mwana kaYehoyada, Yehoyada mwana keyala womika wakuKabezeyeli, wakoŋeli dehi nyidimu yaŋovu, niyena wajahili anyana kaAriyeli akuMowabi ayedi. Weŋilili nawa muwina ifuku danvula yachishika yitooka, hakujaha mutupa.

²¹Wajahili nikaEjipitu, iyala dadeni. KaEjipitu wadiŋi neyoŋa kuchikasa. Yena hakukunkumuka kwadiŋiyi namutondu, hakumuhukula kaEjipitu iyoŋa muchikasa chindi, hakumujaha neyoŋa dindi yomwenindi.

²²Diyi yuma yeliliyi Benaya mwana kaYehoyada, hakutiyakana hadawa ayilobu asatu.

²³Wabadikili owu makumi asatu kulema ilaŋa kushika mudi awa asatu akusambila nehi. Davidi hakumukunjika kwikala mukulumpi wawakwakumuhemba.

²⁴Mana kwaYowabi Asaheli wadiŋi wanawa makumi asatu, Elehanani mwana kaDodo wakuBetelemi,

²⁵Shama wakuHarodi, Elika wakuHarodi,

²⁶Helezi wakuPeleti, Ira mwana kaIkeshi wakuTekowa,

²⁷Abiyezeri wakuAnatoti, Mebunayi mukwaHusha,

²⁸Zalimoni mukwaAhowa, Maha rayi wakuNetofwati,

²⁹Helebi mwana kaBayana wakuNetofwati, Itayi mwana kaRibayi waku Gibeya wawanyana kaBenjamini,

³⁰Benaya wakuPiratoni, Hidayi wakutuloŋa twanyanya twakuGayashi,

³¹Abiyaliboni wakuAraba, Azimaveti wakuBarahumi,

³²Eliyahaba wakuShayalaboni, wawanyana kaYasheni Jonatani,

³³Shama wakuHarari, Ahiyami mwana kaSharari wakuArari,

³⁴Elifweleti, mwana kaAhasibayi, wakuMayakati, Eliyami mwana kaAhitofweli wakuGilo,

³⁵Hezero wakuKarameli, Payarayi wakuArabi,

³⁶Igali mwana kaNatani wakuZoba, Bani mukwaGadi,

³⁷Zeleki kaAmoni, Naharayi wakuBeyeroti, mukwakusenda yitwa yamwana kaZeruwiya Yowabi,

³⁸Ira wakuYeteri, Garebi wakuYeteri,

³⁹Uriya kaHiti; kuyibomba wejima wawu makumi asatu natanu nayedi.