Read MUKANDA WANZAMBI 2 Samuele 24 Bible Online

2 Samuele 24 - MUKANDA WANZAMBI bible

2 Samuele 24

¹Yehova wayizuwilili cheŋi aIsarela, hakuyisaŋumwina Davidi, nindi, Yaku waka chindi niaIsarela niaYuda.

²Mwantaha kumwila Yowabi mukulumnpi wanjita adiŋiyi nindi, nindi, Yaku mwani nakutambatamba mwahita nyichidi yawaIsarela yejima, kufumisha kuDani ndo nikuBerisheba, mwakachindi antu, kulonda nakeluki mwashikilawu antu.

³Yowabi hakumwila mwanta, nindi, Mwonsu mwanashikiluwu antu Yehova Nzambi yeyi alunjikuku mapampa nkulakaji, ninkaka yami mwanta achimonu hunamesu indi; indi nkaka yami mwanta natiyilidi kuwaha nachumichi?

⁴Izu damwanta dafwomweni Yowabi, niakulumpi anjita. AYowabi nawawakulumpi anjita hiyakufuma mwadiŋiyi mwanta, hiyakuya nakuchinda antu akuIsarela.

⁵Hiyakuzambuka Yodana, hiyakutuŋa chilombu kuArowenai, mutamba wamukala wachidiilu wekala mukachi kachinekineki chaGadi, nikuYazeri.

⁶Ashikani kuGileyadi, nikwituŋa daTahiti miHodishi; ashikani kuDani yayani, akotola nikuZidoni.

⁷Hiyakushika nikuchipaka chakuTira mwadikaŋililuwu nikunyikala yawaHivi nawaKenani yejima; hiyakwidikila kukabeta kakuchidiilu kakuYuda, kwokuBerisheba.

⁸Chatambata mbiluwu mwahita ituŋa dejima, hiyakushika kuYerusalema munahiti dehi tukweji tutanu natuwana, namafuku makumi ayedi.

⁹Yowabi hakumwinka mwanta kuchinda kwachindilililuwu antu; muIsarela mwadiŋi amayala omika akwatilaŋa kumpoku yakabali makombakaji makulakaji atanu nasatu; amayala amuYuda adiŋi mayala makombakaji makulakaji atanu.

¹⁰Heliliyi nachindi dehi antu, muchima waDavidi hiwukumutaŋa. Davidi hakumwila Yehova, nindi, Imu muneli navulumuni nankashi; ichi dinu, eyi Yehova, nakulembeleli, fumisha kuluwa kwamami kambuŋeyi, muloŋa ami nasupi nankashi.

¹¹Chahindukiliyi Davidi budidi, izu daYehova hidikwinza kudi kaprofwetu Gadi, mukwakumona waDavidi,

¹²nindi, Yaku wakahoshi naDavidi, neyi, Yehova nahoshi, nindi, Naku chindili yuma yisatu; tondakuhucheyi chimu, nikwilili.

¹³Gadi hakwinza kudi Davidi, hakumuleja, hakumwila nindi, Wumoni nyaka yanzala yitanu nayiyedi mwituŋa deyi, tahindi wutemuki tukweji tusatu kumesu awakwa nkunyi neyi iku adi nakukuhaŋa, tahindi wumoni chipupu chamafuku asatu mwituŋa deyi? Toŋojokaku chakashinshi mwiluki munakamwakwila wantemesha.

¹⁴Davidi hakumwila Gadi, nindi, Chinankalili nankashi. Tukumini dakuholokela mwani muchikasa chaYehova, muloŋa wushona windi wawuvulu; bayi niholokela kwami muchikasa chamuntuku.

¹⁵Yehova hakutemesha chipupu hadi aIsarela kufumisha kubudidi kushika nihafuukwililiyi; kufumisha kuDani nakushika kuBerisheba kwafwili amayala makombakaji makumi atanu nayedi.

¹⁶Cholweliyi kaŋelu chikasa chindi haYerusalema nindi awujilumuni, kumuchima waYehova hikukubalumuka nachumochu chatama, hakumwila kaŋelu waji lumwini antu, nindi, Kunahu. Lekaku. Kaŋelu kaYehova wadiŋi kuwuhulilu waArawuna kaYebusi.

¹⁷Davidi chamweniyi kaŋelu wudi nakutapa antu, hakuhosha naYehova, nindi, Ami navulumuni; mwalala neli chakuluwa, indi awa anyikoku, aneli chumanyi? Nakulembeli, chikasa cheyi chimbabeshi ami namutaŋa watata yami.

¹⁸Denodu ifuku Gadi hakwinza kudi Davidi, hakumwila nindi, Kandu kaku, wakanamutuŋili Yehova kameŋa kuwuhulilu waArawuna kaYebusi.

¹⁹Davidi hakukanduka mwomwamwililuwu kudi Gadi, mwamulejeluwu kudi Yehova.

²⁰Arawuna nindi atali, hakumona mwanta nawambuŋindi hiyakwinza kudi yena. Arawuna hakwidika hanzi, hakubandama kumesu amwanta chamesu indi hamaseki.

²¹Arawuna nindi, Nkaka yami mwanta nenjilidi kudi kambuŋindi? Davidi nindi, Nenzi nakulanda kudeyi hawu hulilu, kulonda nakanamutuŋili Yehova kameŋa, kulonda chipupu chifumi kudi antu.

²²Arawuna hakumwila Davidi, nindi, Nkaka yami mwanta atambuli yonsu yanakeŋiyi akashiti. Tala aŋombi ahimulambu wakushita awa, niyuma yakuhula nachu niyuma yakalakalaŋawu nachu aŋombi yiikali nchawa.

²³Arawuna hakuhana yuma yejimiyi neyi chiyadinkaŋawu anyanta. Arawuna hakumwila mwanta nindi, Yehova Nzambi yeyi akwitŋi.

²⁴Mwanta hakumwila Arawuna, nindi, Nchi, chiŋa nilanda chakulanda. Hinukutwesha kuhimulambu la Yehova Nzambi yami nyilambu yakushita yakadi wuseyaku. Davidi hakulanda nihawuhulilu niŋombi najishekeli jasiliva makumi atanu.

²⁵Davidi hakunamutuŋila Yehova kameŋa kwenoku, hakushita ninyilambu yakushita ninyilambu yakuwunda. Dichi Yehova wetiyili mwamulembeleluwu nansaŋu yetuŋa, chipupu chifuma nikudi aIsarela.