Read MUKANDA WANZAMBI 2 Samuele 3 Bible Online

2 Samuele 3 - MUKANDA WANZAMBI bible

2 Samuele 3

¹Mutaŋa waSawulu aasili njita namutaŋa waDavidi haleheli. Ŋovu jaDavidi hijikuyaŋa kumbidi, kwinza mutaŋa waSawulu hiwukuyaŋa nakuzeya.

²Anyana kaDavidi amayala avwalikilili kuHeberoni; wedi windi Aminoni, mwana kaAhinowami mumbanda wakuYezereyeli;

³chilondawedi Chile yabi, mwana kaAbigayili, wadiŋi iŋoda Nabali wakuKarameli; wamuchisatu Abisalomi, mwana kaMayaka, wadiŋi mwana kaTalimayi mwanta waku Geshuri;

⁴wamuchiwana Adoniya, mwana kaHagiti; wamuchitanu Shefwatiya, mwana kaAbitali;

⁵wamuchitanu nawumu Itereyami, mwana kaEgela iŋoda Davidi. Diwu anyana kaDavidi avwalikilili kuHeberoni.

⁶Chelili mutaŋa waSawulu hiwukwasa njita namutaŋa waDavidi, Abineri hakudikolesha kumutaŋa waSawulu.

⁷Sawulu wadiŋilaŋa nantombu yindi ijina dindi Rizipa, mwana kaAya. Ishibosheti wamwilili Abineri nindi, Wuneŋililidi mwitala dantombu yatata yami?

⁸Abineri hakuzuwa nankashi namazu amuhosheliyi Ishibosheti, nindi, Ami ninamutu wakawa kawaYuda komana? Ami nidi nakwila chachiwahi mutaŋa watata yeyi Sawulu, niana kwindi, niamabwambu jindi, kukwinka muchikasa chaDavidi nehi, eyi lelu wunyinki muloŋa wansaŋu yamumbandiwu?

⁹Neyi nuku bula kumwila Davidi mwamusanyikililuwu kudi Yehova,

¹⁰nifumishi wanta kumutaŋa waSawulu, nikoleshi wanta waDavidi ayuli naIsarela na Yuda kufumisha kuDani ndo nikuBerisheba, Nzambi amukoŋi Abineri mwomumu nichakubadikamu.

¹¹Hatwesheli kumwakula Abineri izu nidimuku, muloŋa wamutiyili woma.

¹²Abineri hakutemesha antemesha indi kudi Davidi kwadiŋiyi, nindi, Ituŋa danyi? Nindi, Neyi wukutiyaŋana nanami, ami nukukuma kudeyi, nukukufumbila aIsarela ejima.

¹³Yena nindi, Chachiwahi, nukutiyaŋana naneyi. Ilaŋa kudi chuma chimu chinakeŋi kudeyi, nami eyi kwinza naku ntalami, chiŋa wakasambila kuleta mwana kaSawulu Mikali hiwakenza nakuntala dinu.

¹⁴Davidi hakutemesha atuŋanda kudi Ishibosheti mwana kaSawulu, nindi, Nyinki iŋodami Mikali nasumbwili nanyivumbu yawa Fwilistinu nkulakaji.

¹⁵Ishibosheti hakutemesha antu nakumutambula kudi nfumwindi Palitiyeli mwana kaLayishi.

¹⁶Nfumwindi hakuya nindi, hakumulondela nakudila hoo nikuBahurimi. Abineri hakumwila nindi, Yaku, funtaku. Hakufunta.

¹⁷Abineri hakuhosha nawawakulumpi awaIsarela, nindi, Hanyaka mwake ŋelaŋa Davidi nenu ekali mwanta wakuyiyula.

¹⁸Ichi dinu ilenumu; muloŋa Yehova wamuteneni Davidi, nindi, Chikasa chakambuŋami Davidi dichi nakaamwina nachu antu ami aIsarela kudi awaFwilistinu, nikudi ayilumbu jawu ejima.

¹⁹Abineri hakuhosha nikumatu awakwaBenjamini. Abineri hakuya kuHeberoni nakuhosha nikumatu aDavidi nawa, mwonsu mwamwenuwu aIsarela niakwa mutaŋa waBenjamini ejima kuwaha.

²⁰Abineri hakushika kuHeberoni kudi Davidi niantu indi makumi ayedi. Davidi hakutelekela Abineri nawantu indi chawija.

²¹Abineri hakumwila Davidi, nindi, Nukunyamuka niyi nakupompesha aIsarela ejima enzi kudi nkaka yami mwanta kulonda akatiyaŋa ninaneyi, wakayuli ejima iwunakeŋi mumuchima weyi. Davidi hakumwila Abineri nindi, Yaŋa kweyi. Hakuya nichamwena.

²²Kutala ambuŋa Davidi niYowabi hiyakufuma kunjita, hiyakuleta yuma yayivulu yapupiluwu kunjita. Abineri hadiŋi hamu naDavidi kuHeberonuku, muloŋa henohu wamwila dehi nindi, Yaŋa kweyi, waya dehi nicha mwena.

²³Helili Yowabi nashiki dehi nanjita yejima yadiŋiyi nayu, hiya kumuleja Yowabi, nawu, Mwana kaNeri Abineri, wenza dehi kudi mwanta, mwanta wamwila dehi nindi, Yaŋa kweyi, yena nayi dehi nichamwena.

²⁴Yowabi hakuya kudi mwanta, hakwila nindi, Wuneli ŋahi? Abineri wenza kudeyi? Wunamwililidi neyi, Yaŋa kweyi, hanayi dehi nichikupu?

²⁵Eyi wamwiluka dehi mwana kaNeri Abineri, wenza nakukudimba nindi eluki nimuwayaŋa nimuwenzaŋa, eluki nimuwelaŋa mwejima.

²⁶Chafuminiyi Yowabi kudi Davidi, hakutemesha antemesha akumu londela Abineri, hiyakumufuntishila kwishima daSira; Davidi kuchiluka kwindi nehi.

²⁷Chafuntiliyi Abineri kuHeberoni, Yowabi hakumutwala kumbadi muchisu champwembu nindi ahoshi nindi chamumesu mwatula, hakumutaŋa mwivumu kwokwenoku, hakufwa, namuloŋa wajahiliyi mana kwindi Asaheli.

²⁸Nkumininaku chaneli Davidi nachitiyi dehi, hakwila nindi, Ninami niantu ami amuwanta wami muloŋa wakujaha Abineri mwana kaNeri hituwukweti kwetu kumesu aYehovaku chahaya nyaka.

²⁹Awu kooli kudi Yowabi, nikudi akwamutaŋa watata yindi ejima; kumutaŋa waYowabi bayi kwakabula wukweti kaseli, hela mbumba, hela wendelaŋa hamukombu, hela wakufwa kumpoku yakabali, hela wákubula yakudyaku.

³⁰AYowabi namana kwindi Abishayi amujahilili Abineri muloŋa wajahiliyi mana kwawu Asaheli kuGibeyoni kunjita.

³¹Davidi hakuyila aYowabi nawantu ejima adiŋiyi nawu, nindi, Tabo lenu yuma yenu yakuvwala, muvwali yikeleyi, mumudili Abineri. Mwanta Davidi hakulondela mutembu.

³²Hiyakumujiika Abineri kuHeberoni. Mwanta hakudila ikumbu kwŋamu daAbineri; niantu ejima hiyakudila.

³³Mwanta wamwimbilili Abineri mukeŋa wakudila, nindi, Abineri afwi neyi chafwaŋa chisupi?

³⁴Makaseyi kuyikasa nehi, nyendu yeyi kuyisha mumpompa nehi, wudimbuki tuhu neyi chadimbukaŋa muntu kudi antu atama. Antu ejima asweja nikumudila.

³⁵Antu ejima hiyakuya kudi Davidi nawu, Dyaku yakudya hikuchidi mwaana. Davidi hakusanyika nindi, Neyi nukusuma hela kuyakudya hela kuyuma yacheŋi chakadi itaŋwa diholoka, Nzambi aŋili mwomumu nichakubadikamu.

³⁶Chachimwenuwu antu ejima atiyili kuwaha, neyi chatiyilaŋawu antu ejima kuwaha mwelilaŋayi mwanta mwejima.

³⁷Niantu ejima niaIsarela ejima hiyakwiluka nawu chanajahuwu mwana kaNeri Abineri, komana hichinafumi kudi mwantaku.

³⁸Mwanta hakuyila ambuŋindi nindi, Enu komana kwiluka nenu muIsarela munadimbuki kalamba muneni lelu, nehi?

³⁹Ami lelu nazeyi kutoŋa yami awayishawu kwikala mwanta; awa antu anyana kaZeruwiya anasweji kunkalila; Yehova amufweti mukwakukoŋa chatama wufwetu wakweseka nachanako ŋiyi chatama.