Read MUKANDA WANZAMBI 2 Samuele 4 Bible Online

2 Samuele 4 - MUKANDA WANZAMBI bible

2 Samuele 4

¹Mwana kaSawulu chanatiyiyi nawu Abineri nafwi kuHeberoni, azeya nikuzeya, aIsarela ejima azaaza nikuzaaza.

²Mwana kaSawulu wadiŋi nawantu ayedi adiŋi awakulumpi ayendu, wumu ijina dindi Bayana, mukwawu ijina dindi Rekabi, anyana kaRimoni wakuBeyeroti, wakudi anyana kaBenjamini; muloŋa Beyeroti nawa amufuukula dehi nawu waBenjamini,

³akwaBeyeroti atemukilili kuGitayimi, kwokwashakamawu nikulelu.

⁴Jonatani mwana kaSawulu wadiŋi namwanindi weyala wadiŋi chifwayi chanyendu. Hatiyiluwu nsaŋu jaSawulu naJonatani jafumini kuYezereyeli wadiŋi wanyaka yitanu, mukwakumulela hakumunyamuna, hakutemuka; mumbanda chanaswejiyi kutemuka lufuchi, mwana hakuholoka, hakwikala chifwayi. Ijina dindi Mefwibosheti.

⁵Anyana kaRimoni wakuBeyeroti, aRekabi naBayana, hatatili nkanza hiyakuya, hiyakushika kwitala daIshibosheti hadiŋi nakunookayi hachayili.

⁶Hiyakwijila mukachi ketala neyi akukeŋa kunona tidiku, hiyakumutaŋa mwivumu; aRekabi namana kwindi Bayana hiyakupuluka.

⁷Muloŋa chashikiluwu mwitala amuweni nakami hakadidi kindi mwitala dindi dakukama, hiyakumutaŋa, hiyakumujaha, amuketula ninamutu, hiyakusenda namutu windi, hiyakwenda wufuku wejima njila yachana.

⁸Hiyakutwala namutu waIshibosheti kudi Davidi kuHeberoni, hiyakumwila mwanta, nawu, Tala namutu waIshibosheti mwana kachilumbu cheyi Sawulu iwu wakeŋeli kukujaha; Yehova namutendi dehi nkaka yami mwanta lelu kudi Sawulu nawanyanindi.

⁹Davidi hakwakula aRekabi namana kwindi Bayana, anyana kaRimoni wakuBeyeroti, hakuyila nindi, Chahandayi Yehova kwaamu, nakuuli wumi wami mukukala kwejima,

¹⁰chanlejeliyi muntulo inindi, Tiya, Sawulu wafwa dehi, yena watoŋojokeli nindi nanleteli nsaŋu yayiwahi, ami hinimukwata, hinimujahila kuZikilaŋi, wowu wufwetu namwinkeli nansaŋu yindi;

¹¹winzi wakamoni antu atama anajahi muntu waloŋa mwitala dindi yomweni hakadidi kindi, nibuli kwihula mashi indi kudenu, niyifumisha hanu hamaseki?

¹²Davidi hakuleja anyikwenzi indi, hiyakuyijaha, hiyakuyiteta makasa nanyendu, hiyakuyikudika kwakwihi nejiya dakuHeberoni. Mutu waIshibosheti awutweli nakuwujiika mwŋamu daAbineri kwokuHeberoni.