Read MUKANDA WANZAMBI 2 Samuele 7 Bible Online

2 Samuele 7 - MUKANDA WANZAMBI bible

2 Samuele 7

¹Helili mwanta nashakami dehi mwitala dindi, henohu Yehova namunookeshi dehi kudi ayilumbu jindi amunyeŋumukili ejima,

²mwanta hakumwila kaprofwetu Natani, nindi, Tiya dinu, ami nashakama mwitala danyisida, kwinza chimbaŋu chaNzambi chashakama mumahina.

³Natani hakumwila mwanta, nindi, Yaku wakeli chejima chidi mumuchima weyi, muloŋa Yehova wudi naneyi.

⁴Wowena wufuku owu izu daYehova hidikwinza kudi Natani,

⁵nindi, Yaku wakaleji kambuŋami Davidi, neyi, Yehova nahoshi nindi, Eyi wutuŋi itala dakushakamami?

⁶Kufumisha kwifuku dinafumishili anyana kaIsarela muEjipitu kushika nikwifuku dalelu hinashakami hoku mwitalaku, nendi kwami mwitenti nimutabanaka.

⁷Munendeli nawanyana kaIsarela mwejima, nahoshahu dehi izu namuchidi wawaIsarela wumu wunalejeli kudiisha antu ami aIsarela, niyila nami, Munabulilidi kuntuŋila itala danyisida?

⁸Dichi dinu tiya chiwakamwila kambuŋami Davidi, kamwili neyi, Yehova wamazaza nahoshi nindi, Naku fumishili kwiyinda danyikoku, kumudimu wakulondela nyikoku, kulonda nikukunjiki kwikala nlomboli yawantu ami, aIsarela.

⁹Mwejima muwayi laŋa nadiŋi neyi, nakufumishili ayilumbu jeyi ejima kumesu eyi; ninodu nakakutoheshela ijina deyi neyi chatohaŋa majina awamaneni ekala hamaseki.

¹⁰Nukushila antu ami aIsarela chipela chawu, nukuyitiimba chakutumba, kulonda akashakami mwawu awenawu, akabuli kufumamu cheŋi. Antu atama hiyakayikabisha nawa cheŋi neyi chayikabishiluwu hakusambila,

¹¹kufumisha kunyaka yinalejelaŋa ansompeshi kusompesha antu ami aIsarelaku; nakakunookesha kudi ayilumbu jeyi ejima. Ninodu Yehova nakuleji nindi, Yehova wakakwilila mutaŋa.

¹²Chamba kawana mafuku eyi, chiwamba kakama hamu nawankakulula jeyi, nakakunyamwina mwaneyi wamba kakulondela, wakafuma mwivumu deyi, nakamukoleshela wanta windi.

¹³Diyi wakatuŋila ijina dami itala, nakamukoleshela itanda dawanta windi haya nyaka.

¹⁴Nakekala tata yindi, niyena wakekala mwanami. Neyi wakaluwa nakamubabesha namutondu wababeshaŋawu nachu antu, nanyinkakambu yamonaŋawu anyana kawantu;

¹⁵hakwila luwi lwami hilwakamufuma yena neyi chinalufumishili kudi Sawulu inafumishili kumesu eyuku.

¹⁶Nimutaŋa weyi niwanta weyi wakakola ngu chikupu kumesu eyi haya nyaka; itanda deyi dakakola ngu haya nyaka.

¹⁷Natani wahosheli naDavidi mwaya mazu awa ejima, mwaya nichimwenu ichi chejima.

¹⁸Mwanta Davidi hakwijila, hakushakama kumesu aYehova, hakwila nindi, Ochu yaminyi eyi Mwanta Yehova, nimutaŋa wami himutaŋanyi mwaka wunshikŋi mwejimimu?

¹⁹Mwenimu munakehi dehi kumesu eyi, eyi Mwanta Yehova, winzi wuteni nawa cheŋi mutaŋa wakambuŋeyi wakunyaka yakenza kumbidi? Eyi Mwanta Yehova mwenimu dimu mwatenenaŋawu antu?

²⁰Indi Davidi wukuhosha nawa mwekwawu mudihi? Eyi Mwanta Yehova, eyi yeyi wuneluki kambuŋeyi.

²¹Imu mweneni mwejima muwunakoŋi wunalondi izu deyi, wili mwaya muchima weyeyi aweni, kulonda kambuŋeyi akelukumu.

²²Dichi eyi Mwanta Yehova wamuneni; hikudi wakufwanaku, hikwekala Nzambi wacheŋuku, yeyi hohu, mwejima namutunatiyi namatu etu.

²³Ochu hamaseki hadi muza wudi neyi antu eyi aIsarela, ayili nakukuulayi Nzambi kulonda akekali antu indi, aditiyakeshi ijina, ayilili yuma yamaneni, niituŋa deyi adili yuma yikweti niwoma, kumesu awantu eyi iwakúulili muEjipitu kulonda ekali antu eyi nimunyuza nikudi akishi awu?

²⁴Hiwukudikoleshela antu eyi aIsarela ekali antu eyi haya nyaka; nineyi Yehova wunekali dehi Nzambi yawu.

²⁵Ichi dinu eyi Yehova Nzambi, koleshaku chahaya nyaka izu diwunahoshi dakutena kambuŋeyi, dakutena nimutaŋa wami, wakeli muwunahoshi.

²⁶Ijina deyi dakatoni haya nyaka, dakwila nawu Yehova wamazaza diyi Nzambi yawaIsarela; nimutaŋa wakambuŋeyi Davidi wakakola haya nyaka kumesu eyi.

²⁷Muloŋa eyi Yehova wamazaza, Nzambi yaIsarela, wuna muleji kambuŋeyi neyi, Nakakutuŋisha mutaŋa; dichi chanamoniyi kambu ŋeyi jakulomba mumuchima windi kulomba iku kudeyi.

²⁸Ichi dinu eyi Mwanta Yehova, eyi yeyi Nzambi, mazu eyi alala, wunamukani kambuŋeyi chumichi chachiwahi.

²⁹Ichi dinu itŋaku kukiswila mutaŋa wakambuŋeyi nkisu kulonda wakashakami kumesu eyi haya nyaka, muloŋa eyi Mwanta Yehova, yeyi wunachihoshi, kiswilaku mutaŋa wakambuŋeyi nkisu yahaya nyaka.