Read MUKANDA WANZAMBI 2 Samuele 8 Bible Online

2 Samuele 8 - MUKANDA WANZAMBI bible

2 Samuele 8

¹Kulondela henahana Davidi watapili aFwilistinu, wayifwomweni; Davidi watambwili lukanu lwaŋanda yawu kudi aFwilistinu.

²Watapili aMowabi, wayikamikili hamaseki, hakuyeseka namwonji; wesekeli nyonji yiyedi nindi yakujaha, mwonji wamana wumu nindi waku handisha. AMowabi ela niambuŋaDavidi, hiyakuleta nyilambu.

³Davidi watapili nawa niaHadadezeri, mwana kaRehobi, mwanta waku Zoba, hayilaŋayi nindi akatambuli cheŋi wanta windi kuKaloŋa.

⁴Davidi wamutambwili akwatuwalu ikombakaji namakulakaji atanu nayedi, akwa kwenda hamaseki makombakaji makumi ayedi; Davidi waketwili nyijila yatuwalu twamakálu twejima, hakwambulaku makálu indi nkulakaji.

⁵ASiriya akuDamakasa chayiluwu nawu akakwashi Hadadezeri, mwanta wakuZoba, Davidi watapili aSiriya makombakaji makumi ayedi namakomba kaji ayedi.

⁶Davidi washili mashidika muSiriya yakuDamakasa, aSiriya ela niambuŋaDavidi, hiyakuleta nyilambu. Yehova wemikishili Davidi mushindu kwayilaŋayi kwejima.

⁷Davidi watambwili nkebu jawuru jadiŋi kudi ambuŋaHadadezeri, wayileteli kuYerusalema.

⁸Kunyikala yaHadadezeri, iwu Beta, iwu Berotayi, mwanta Davidi watambwiluku wuneŋu wawuvulu nankashi.

⁹Mwanta wakuHamati Toyi, chatiyiliyi nawu Davidi natapi dehi njita yaHadadezeri yejima,

¹⁰Toyi hakutemesha mwanindi Yorami kudi mwanta Davidi nakumwimwisha, nakumukiswila nkisu nanochu chalwiliyi naHadadezeri, hakumutaŋa; mulopa Hadadezeri wadasilaŋa naToyi. Yorami hakusenda yuma yasiliva, niyuma yawuru, niyuma yawuneŋu.

¹¹Niyeniyi nawa Davidi wamujilikililiyi Yehova, hamu nasiliva nawuru yamujilikililiyi yakunyuza yejima yafwomeniyi;

¹²niyakuSiriya, niyaku Mowabi, niyakudi anyana kaAmoni, niyakudi aFwilistinu, niya kuAmaleki, niyakuyuma yapupiluwu kudi Hadadezeri, mwana kaRehobi, mwanta wakuZoba.

¹³Davidi watiyakesheli ijina dindi hafuntiliyi kwayiliyi nakutapa aSiriya muChinekineki Chamugwa, kwatapiliyi antu makombakaji ikumi natanu nasatu.

¹⁴Asha nimashidika muEdomi; washili mashidika mwahita Edomi yejima, aEdomi ejima ela niambuŋaDavidi. Yehova wemikishili Davidi mushindu kwayilaŋayi kwejima.

¹⁵Davidi wehli mwanta wawaIsarela ejima. Davidi welili antu indi ejima nimuwuŋaji nimwaloŋa.

¹⁶Mwana kaZeruwiya Yowabi diyi wadiŋi mwanta wanjita; mwana kaAhiludi Yehoshafwati diyi wadiŋi mukwakuso neka nsaŋu;

¹⁷mwana kaAhitubi Zadoki, nimwana kaAbiyatari Ahimeleki, diwu adiŋi atupristu; Seraya diyi wadiŋi mukwakusoneka nyikanda;

¹⁸mwana kaYehova daBenaya diyi wadiŋi mukulumpi wawaKereti nawa Peleti; anyana kaDavidi diwu adiŋi aŋambela.