Read MUKANDA WANZAMBI 2 Samuele 9 Bible Online

2 Samuele 9 - MUKANDA WANZAMBI bible

2 Samuele 9

¹Davidi welili nindi, Kumutaŋa waSawulu hikwashala hoku muntukutahindi, kulonda nimwili luwi hamujimba waJonatani?

²Kumutaŋa waSawulu kwadiŋi ŋamba wumu ijina dindi Ziba. Hiyakumutambika ayi kudi Davidi. Mwanta hakumwila nindi, Yeyi Ziba tahindi? Yena nindi, Yami kambuŋeyi.

³Mwanta nindi, Kumutaŋa waSawulu kuduhu muntu wumu nihanu tahindi, kulonda nimwili luwi lwaNzambi? Ziba hakumwila mwanta, nindi, Kuchidi mwana kaJonatani, hichifwayi chanyendu.

⁴Mwantaha kumwila nindi, Wudikudihi? Ziba hakumwi amwantanindi, Wudi kwitala damwana kaAmiyeli Makiri muLodebari.

⁵Mwanta Davidi hakutemesha antu nakumuleta, amufumishi kwitala daMakiri mwana kaAmiyeli, kuLodebari.

⁶Mefwibosheti, mwana kaJonatani, Jonatani mwana kaSawulu, hakwinza kudi Davidi hakudimbuka chamesu hamaseki, hakudifukula. Davidi nindi, Eyi Mefwibosheti. Nindi, Yamonu kambuŋeyi.

⁷Davidi hakumwila nindi, Bayi wutiya womaku; chalala nukukwila luwi hamujimba watata yeyi Jonatani, nukuku funtishila cheŋi mpata yankaka yeyi Sawulu yejima; wukudyaŋa yakudya kumesa yami mafuku ejima.

⁸Hakudifukula, hakwila nindi, Kambuŋeyi hikachumanyi mwaka wutali ami mufu wakawa?

⁹Mwanta hakutambika Ziba, ŋamba yaSawulu, hakumwila nindi, Yuma yadiŋi yaSawulu yejima niyadiŋi yawantaŋa lindi nayinki dehi mwana kamwanta weyi.

¹⁰Yeyi wakamudiminaŋa mpata yindi hamu nawa nyaneyi nawaŋamba jeyi; wakamuletelaŋa yakudya kulonda mwana kamwanta weyi amonaŋa yakudya; kwinza mwana kamwanta weyi Mefwibosheti, wukudyaŋa yakudya mafuku ejima kumesa yami. Ziba wadiŋi nawanyanindi amayala ikumi natanu, niaŋamba makumi ayedi.

¹¹Ziba hakumwila mwanta nindi, Mwejima mwanalejiyi nkaka yami mwanta ami kambuŋindi, dimu mwakela kambuŋeyi. Mwanta nindi, Kwinza Mefwibosheti wukudyaŋa kumesa yami neyi mwana kamwanta.

¹²Mefwi bosheti wadiŋi namwana wanyanya ijina dindi Mika. Antu ejima ashakamini mwitala daZiba elili aŋamba jaMefwibosheti.

¹³Mefwibosheti hakushakama muYerusalema, muloŋa wadiilaŋa kumesa yamwanta mafuku ejima. Wadiŋi chifwayi chanyendu yonsu yiyedi.