Read MUKANDA WANZAMBI 1 Malena 13 Bible Online

1 Malena 13 - MUKANDA WANZAMBI bible

1 Malena 13

¹Kutala hikukwinza muntu waNzambi, hakufuma kuYuda chakumunyamuna nezu dakudi Yehova, dakumwila nindi yaŋa kuBeteli. Yerobowami wadiŋi wemana kukameŋa nakwocha insensi.

²Muntu owuhakubidika kameŋa nezu dakudi Yehova, nindi, Eyi kameŋa! Eyi kameŋi Tiya chanahoshiyi Yehova. Nindi, Tiya, mwana wakavwalika kumutaŋi waDavidi, ijina dindi Yosiya; hadeyi wakaketwilahu atupristu ayinaŋanaŋa ochelaŋa insensi hadeyi, akocha nimafwaha awantu hadeyi.

³Denodu ifukuwayilejeli chinjikijilu, nindi, Tiyenu chinjikijilu chanahoshiyi Yehova, nindi, Tiyenu, kameŋi kakubaluka, nimawuti aduhu akumwaŋa.

⁴Mwanta chatiyiliyi mwahosheliyi muntu waNzambi, chabidikiliyi kameŋi kamuBeteli, Yerobowami hakwolola chikasa chindi oku kukameŋi kwadiŋiyi, nindi, Mukwatenu. Chikasa chindi chamwolweleleliyi chuma nichau, kutwesha kuchivuŋa cheŋi nehi.

⁵Nikameŋi kabaluka nikubaluka, nimawuti amwajila nihakameŋi ndu-ndu, mwomu muchinjikijilu chayi leje liyi muntu waNzambi chakumuhoshesha nezu dakudi Yehova.

⁶Mwanta hakwakula, hakumwila muntu waNzambi, nindi, Nlembelelu kumwani kudi Yehova Nzambi yeyi antoŋuhu, nlombeli kulonda chikasa chamichikoli cheŋi. Muntu waNzambi hakumulembelela Yehova, chikasa chamwanta chikola nicheŋi, hichikwikala neyi mwomu chadiŋi.

⁷Mwanta hakumwila muntu waNzambi, nindi, Tuyi neyi kwitala damiwuhizu mukuhu, nikwinkuhu chamukunkulu cheyi.

⁸Muntu waNzambi hakumwila mwanta, nindi, Hela neyi wukunyinka chibalu chetala deyihinukuya kwami naneyuku, kudya yakudya kunu, hela kunwa meji, kwontikwami.

⁹Muloŋa dimu mwanlejeluwu kwizu daYehova, nindi, Eyi kudya yakudya, hela kunwa meji, hela kufunta njila yiwenjili chinjila.

¹⁰Hakuyakwindi njila yacheŋi, kufunta njila yenjiliyi kuBeteli nehi.

¹¹MuBeteli mwashakamini kaprofwetu wakashinakaji. Mwanindi wenjili nakumuleja yuma yejima yeliliyi muntu waNzambi denodu ifuku muBeteli. Hiya kumuleja tata yawu nimazu ahosheliyi namwanta.

¹²Tatayawu hakuyila nindi, Nayi njila yidihi? Anya nindi amweni njila yayiliyi muntu waNzambi wafumini kuYuda.

¹³Hakuyila anyanindi, nindi, Nlemenenu sadi hachimbulu. Amulemena nichimbulu. Hakwendelahu.

¹⁴Haku mulondela muntu waNzambi, haku muwana nashakami mwishinadi mukula, hakumwila nindi, Yeyi muntu waNzambi wafuma kuYuda, tahindi? Nindi, Yami.

¹⁵Hakumwila nindi, Tuyi neyi kwitala dami, wakadyi yakudya.

¹⁶Yena nindi, Hinukutwesha kufunta neyi hela kwijila mwitala deyuku. Kudya neyi yakudya kunu, hela kunwa meji kwontikwami.

¹⁷Muloŋa aŋilili nezu dakudi Yehova, nindi, Kudya yakudyahela kunwa meji kwenoku, hela kufunta njila yiwenjili chinjila.

¹⁸Yena hakumwila nindi, Ninami nikaprofwetu, neyi chiwudeyi nawa. Kaŋelunahoshi nanami nezu dakudi Yehova, nindi, Mufuntishi winzi nindikwitala deyi, kulonda akadyi yakudya, akanwi meji. Wadiŋi nakutwamba kwindi.

¹⁹Hakufunta nindi, hakudya yakudya mwitala dindi, hakunwani meji.

²⁰Cheliluwu anashakami kumesa, izu daYehova hidikwinza kudi kaprofwetu wamufuntishili.

²¹Hakumubilela muntu waNzambi wafumini kuYuda, nindi, Yehova nahoshi nindi, Ochu chiwu nadi kaŋi nezu damukanwa kaYehova, chiwunabuli kwovwahila mwakulejeliyi Yehova Nzambi yeyi,

²²hiwukufunta nakudya yakudya nakunwa meji kwakulekesheliyi nindi, Bayi wakadya yakudya, hela kunwa mejuku; chibimbi cheyi hichakashikakwijimu dawankakulula jeyuku.

²³Cheliliyi nadyi dehi yakudya, nanwi dehi, yena hakumulemena kaprofwetu afuntishiliyi sadi hachimbulu.

²⁴Hakuya, mutupa hakumu wanamunjila, hakumujaha, hakunata nichibimbi chindi munjila, chimbuluhakwi manaku, nimutupa nawa hakwimana kwakwihi nachibimbi.

²⁵Antuhiyakuhita kwenoku, hiyakumona chibimbi chakunata munjila, nimutupa nemani kwakwihi nachibimbi, hiyakwinza nakuchishimuna mumukalawa shakaminiyi kaprofwetu wakashinakaji.

²⁶Kaprofwetu wamufuntishili munjila chachitiyiliyi, hakwila nindi, Yowu muntu waNzambi wadikaŋili nezu damukanwa kaYehova; dichichanamuhaniniyi Yehova kudi mutupa, namutaboli dehi, namujahi dehi, mwomwizu daYehova dahosheliyi nindi.

²⁷Hakuhosha nawanyanindi, nindi, Nlemenenu sadi hachimbulu. Hiya kulema.

²⁸Hakuya, hakuwana chibimbi chindi anachinati munjila, nichimbulu nimutupa anemani kwakwihina chibimbi. Mutuŋa kudya chibimbi nehi, nikutabula chimbulu nehi.

²⁹Kaprofwetu hakunyamuna chibimbi chamuntu waNzambi, hakuchishaha chimbulu, hakuchifuntisha. Owu kaprofwetu wakashinakaji hakufunta kumukala, hakumudila, hakumuŋika.

³⁰Wakamikili chibimbi chindi mwijamu dindi yomwenindi, wamudilili nindi, Yayo mana kwami!

³¹Chelili namujiiki dehi, hakuyila anyanindi, nindi, China kafwamimwakanji ikaŋa mwijamu namutunajiiki muntu waNzambi. Mwaka kamikaŋa mafwahami hamu namafwahindi.

³²Muloŋa izu dakumuhoshesha nezudakudi Yehova dabidikiliyi kameŋa kamuBeteli, dabidikiliyi nimatala ejima ahayinaŋanaŋa yamunyikala yamuSamariya, dakamwekana chalala.

³³Kufuma henohu Yerobowami kufunta munjila yindi yatama nehi, saŋi elilayi atupristu akuyinaŋanaŋa akufumisha hadi antu, hakukunjikaonsu anakeŋiyi wowu, kulonda akekalaŋa atupristu akuyinaŋanaŋa.

³⁴Chena chumichi chabalumukili hinshidi kudi mutaŋa waYerobowami mwaka amoni kuyifumishaku, hiyakuyijilumuna afumi hewulu deseki.