Read MUKANDA WANZAMBI 1 Malena 20 Bible Online

1 Malena 20 - MUKANDA WANZAMBI bible

1 Malena 20

¹Mwanta wakuSiriya Benihadadi wapompesheli njita yindi yejima. Wadiŋi nawanyanta ankanu makumi asatu nawanyanta ayedi, nituwalu, nimakálu. Hakuya nakukuchika Samariya, hakulwa nawu.

²Hakutemesha atuŋanda mumukala kudi mwanta wa waIsarela Ahabi, hakumwila nindi, Tiya chanahoshiyi Benihadadi,

³nindi, Siliva yeyi niwuru weyiwamami. Niapodi jeyi nawa, nianyaneyi wowu aduku asweja kuwaha, amami.

⁴Mwanta wawaIsarela hakuyakula nindi, Mwomu muwunahoshieyi nkaka yami mwanta. Ami niweyi niyuma yami yejima.

⁵Atuŋandahiya kwinza cheŋi, hiyakwila nawu, Tiya chanahoshiyi Benihadadi, nindi, Mwalala natemesha kudeyi mazu akwila nami, Wakanyinki nisiliva yeyi, niwuru weyi, ni aŋodi jeyi, nianyaneyi;

⁶ichi dinu nakatemesha ambuŋa mikumadiki kudeyi neyi aha hanashiki itaŋwa, akaboloŋonza mwitala deyi, nimumatala awambuŋeyi; chonsu chiwamona eyi kuwaha akanona, akatwala.

⁷Mwanta wawaIsarela hakutambika awakulumpi ejima amwituŋa, nindi, Tiyenu mwani, muntu iwu chakukeŋayi yatama; muloŋa yena watemesha dehi kudami nindi atambuli niapodi jami, ni anyanami, nisiliva yami, niwuruwami, ami kumulekesha nehi.

⁸Akulumpi ejima nawantu ejima hiyakumwilanawu, Bayi wutiyilila mwoku, bayi witŋiku.

⁹Hakuyila atuŋanda twaBenihadadi, nindi, Kamwilenu nkaka yami mwanta, nenu, Mwonsumuwatemeshela ami kambuŋeyi hakusambila nukwilamu; ilaŋa chumichi hinukutweshaku. Atuŋanda hiyakuya nakumutwelela cheŋi mazu.

¹⁰Benihadadi hakumutemeshela mazu akwila nindi, Neyi maseki amuSamariya akawanina mumakasa awantu ejima inidi nawu, komana akishi akaŋili mwomumu nichakubadikamu.

¹¹Mwanta wawaIsarela hakuyakulanindi, Kamwilenu nenu, Muntu wukumanyeka bayi adisama neyi muntuwudi nakuvúulaku.

¹²Benihadadi chatiyiliyi mazu awa wadiŋi nakunwawalwa nawanyanta muyisolu, hakuyila ambuŋindi nindi, Tandamenu. Hiyakutandamina mukala.

¹³Kutala kaprofwetu hakukundama kwakwihi namwanta wawaIsarela Ahabi, nindi, Yehova nahoshi nindi, Luntu lwejimilu wunalumoni, tahindi? Nukuluhana kudeyi lelu; nineyi wakeluka neyi yami Yehova.

¹⁴Ahabi nindi, Nanyi? Mukwawu nindi, Yehova nahoshi nindi, Nawanyikwenzi awatulamba twamumawuloŋu. Nindi, Akata chika njita anyi? Hakumwakula nindi, Yeyi.

¹⁵Hakupompesha anyikwenzi awatulamba twamumawuloŋu, ashikili mumakulakaji ayedi namakumi asatu nawatulamba ayedi; hakupompesha munyima yawu antu ejima, wowu anyana kaIsarela ejima ashikili mumakombakaji atanu nayedi.

¹⁶Edi kili hashikili itaŋwa mwiwulu. Benihadadi kwindi wadiŋi nakunwawalwa muyisolu, nakusheta hamu nawanyanta ankanu, wowu anyanta makumi asatu nawanyanta ayedi amukwashilaŋa.

¹⁷Anyikwenzi awatulambahiya kusambilaŋahu dehi kwidika. Benihadadi hakutemeshaku antu, hiyakumuleja nawu, MuSamariya munafumi antu.

¹⁸Nindi, Hela neyianenzi chakumwena, yikwatenu amomi; hela neyi anenzi chanjita, yikwatenu amomi.

¹⁹Anyikwenzi awatulamba twamumawuloŋu hiyakwidika mumukala ninjita yawu munyima.

²⁰Hiyakujaha antu, iwu ojaha windi, iwu ojahawindi. ASiriya atemoka nikutemoka, aIsarela hiyakuyihaŋa. Benihadadi mwanta wakuSiriya hakupulukila hakawalu hamu nawakwatuwalu.

²¹Mwanta wawaIsarela hakwidika, hakutapa atuwalu niakwamakálu, hakujaha aSiriya amavulu nankashi.

²²Kaprofwetu hakukundama kwakwihi namwanta wawaIsarela, hakumwila nindi, Yaku wakadikoleshi wiluki chiwakela, muloŋa chiwakabalumuka mwaka mwanta wakuSiriya wakenza nakulwa neyi.

²³Ambuŋa mwanta wakuSiriya hiyakumwila nawu, Nzambi yawu hiNzambi wakumapidi, dichi chatubadikililuwu Ŋovu. Neyi twakalwilanawu muchana, hitwakayibadika Ŋovuku?

²⁴Ilaku mwenimu, awa anyanta ankanu kayifumishumu wejima wawu, wuhiŋishumu awakulumpi;

²⁵kachindinjita yidi neyi njita yinanoŋi, kawalu nakawalu, ikalu nekalu; twakalwilinawu muchana. Hitwakayibadika Ŋovuku? Hakutiyilila mwizu dawu, hakwila nimwenomu.

²⁶Mwaka chiwabalumukili Benihadadi hakupompesha aSiriya, hakuya kuAfweki, akadasi njita nawaIsarela.

²⁷Anyana kawaIsarela niwena, hiyakupompa, hiyakuloŋesha yakudya yawu, hiyakuya nakulwa nawu. Anyana kaIsarela hiyakushakama muchilombu kumesu awu neyi tunyikankatuyedi twawanyana kampembi. Kwinza aSiriya ituŋa dejima diwu hohunihasheli hosi.

²⁸Muntu waNzambi hakukundama kwakwihi, hakuhosha namwantawa waIsarela, nindi, Ochu chanahoshuwu aSiriya nawu, Yehova hiNzambi wakumapidi kwindi, hiNzambi wakuyinekinekuku; dichi dinu luntu lwejimilunukuluhana kudeyi, mwakeluki nenu yami Yehova.

²⁹Ashakamini muyilombu yawu chakutalaŋana mafuku atanu nayedi. Ifuku damu chitanu nachiyedi akwata nikunjita. Anyana kaIsarela hiyakujaha aSiriya makombakaji nkulakaji awakwakwenda hamaseki ifuku dawudimu.

³⁰Anashali hiyakutemukila kuAfweki, lwe nimumukala; mpwembu hiyi kukundukila antu asheluku, makombakaji makumi ayedi namakombakaji atanu nayedi. Benihadadi hakutemuka, hakwijila mumukala, lwe nimukapeka kamukachiketala.

³¹Ambuŋindi hiyakumwila nawu, Tunatiyi nawu anyanta akumutaŋa wawaIsarela hiyanyanta akweti luwi. Atwitiji mwani tuvwaliyikeleyi mumbunda jetu, tushi ninyonji hanyitu yetu, twidiki kudi mwantawa waIsarela. Hadaha wakakuhandisha.

³²Hiyakuvwala niyikeleyi mumbunda jawu, hiyakusha ninyonji hanyitu yawu, hiyakwinza kudi mwanta wa waIsarela, nawu, Kambuŋeyi Benihadadi nindi, Nalembi, nihandi. Yena nindi, Komana wuchidi wamumi? Himana kwami.

³³Owu mayala hiyakutiyilila nankashi, kulonda amutiyi kwizu dindi, eluki muchima windi; hiyakwila nawu, Mana kweyi Benihadadi. Hakuyilanindi, Yenu mwakamuleti. Benihadadi hakwidika, hakwinza kudi yena. Yena hakumukanjika mwikalu dindi.

³⁴Benihadadi hakumwila nindi, Nyikala yatambwili tata yami kudi tata yeyi nukuyifuntisha; eyi wakelanyikwakwa yeyi muDamakasa neyi cheliliyi tata yami muSamariya. Ahabi nindi, Nukukúumbaku nachitiyaŋenu ichi. Hakutiyaŋana nindi chitiyaŋenu, hakumúumba.

³⁵Muntu wakudi anyana kawatuprofwetu hakumwila mukwawu chakumulejakudi Yehova, nindi, ŋeti mwani. Mukwawu kwonti kwindikumweta.

³⁶Hakumwila nindi, Ichi chiwunaleki kwovwahila izu daYehova, chiwukwila wunafumi dehi kudami akakujaha kudi mutupa. Cheliliyi nafumi dehi kudi yena, mutupa hakumuwana, hakumujaha.

³⁷Hakuwana muntu mukwawu, hakumwila nindi, ŋeti mwani. Owu muntu hakumweta, chamweteliyi hakumukatisha.

³⁸Kaprofwetu hakufumaku, hakuya naku muchiŋilila mwanta kunjila; hakudifwikŋi neyi muntu wacheŋi, hakukasaihina kumesu indi.

³⁹Cheliliyi mwanta hakuhita, hakumubidika mwanta, nindi, Ami kambuŋeyi naya mukachi kanjita; kutala muntu hakubalumuka, hakunletela muntu nindi, Muhembi iwu muntu; neyi wakatemuka, wumiwindi wakawufuta nawumi weyi, hela kufuta ntalenta yasiliva.

⁴⁰Amikambuŋeyi chinela nami nilabajali niniku niniku, kumu kasumuka kwosi. Mwanta wawaIsarela hakumwila nindi, Wunadibayishi eyi aweni, yeyi aweniwunahoshumu.

⁴¹Hakunyakala kufumisha ihina kumesu indi. Mwantawa waIsarela hakumwiluka nindi, Komana wawatuprofwetu.

⁴²Hakumwila nindi, Yehova nahoshi nindi, Ochu chiwunamu umbuku muntu inafu ukwilili kujilumuka, wumi weyi wunati nawumi windi, antu eyi anati nawantu indi.

⁴³Mwanta wawaIsarela hakuya kwitala dindi namuchima walema, natiyi dehi kutama, hakushika kuSamariya.