Read MUKANDA WANZAMBI 2 Malena 14 Bible Online

2 Malena 14 - MUKANDA WANZAMBI bible

2 Malena 14

¹Mumwaka wamuchiyedi waYehowashi mwana kaYehowahazi mwanta wawaIsarela, Amaziya mwana kaYowashi mwanta wawaYuda watachikili kuyula.

²Hatachikiliyi kuyula wadiŋi wanyaka makumi ayedi nayitanu. Wayulili muYerusalema nyaka makumi ayedi nayitanu nayiwana. Mama yindi ijina dindi Yehowadina wakuYerusalema.

³Welilichaŋa kumesu aYehova, hela chochu, helili neyi cheliliyi nkakulula yindi Daviduku; welili mweliliyi tata yindi Yowashi mwejima.

⁴Hela chochu, yinaŋanaŋa hiyayifumishiluku. Antu saŋa aketwilawu yimuna, saŋa ochelawu insensi hayinaŋanaŋa.

⁵Chelili wanta windi wunakoii dehi, hakujaha ambuŋindi ajahili tata yindi wadiŋi mwanta.

⁶Hajahili anyana kawenowu ambanjuku; mwomwana soneku wu mumukanda wanshimbi jaMosi, mwayilejeliyi Yehova, nindi, Kujahila atata jawantu hanshidi jawanyana nehi, nianyana kuyijihila hanshidi jiwatata jawu nehi, ilaŋa antu ejima akayijihila hanshidi jawu awenawuhohu.

⁷MuChinekineki Chamuŋwa wajahililumu aEdomi makombakaji ikumi, watambwili mukala waSela nanjita, wawutumbili ijina, nindi Yoketeli, nikulelu.

⁸Amaziya hakutemesha atuŋanda kudi Yehowashi mwana kaYehowahazi, Yehowahazi mwana kaYehu, mwanta wawaIsarela, nindi, Twaya tumonaŋani.

⁹Mwanta wawaIsarela Yehowashi hakutemesha mazu kudi mwantawa waYuda Amaziya, nindi, Kachiputa kanyiŋa kadiŋi muLebanoni katemesheli mazu kudi musida wadiŋi muLebanoni, nindi, Letaku mwaneyi wamumbanda amusumbuli kudi mwanami; kanyama wamwisaŋa wadiŋi muLebanoni hakuhitaku, hakukadata kenoku kachiputa.

¹⁰Chalala eyiwunatapi dehi aEdomi, hiwukudivwimba nimumuchima; dishakaminikweyi kwitala deyi, wudisaminaŋaku, indi wudimweshi tuhu kweyi jakala, winzi wudimbuki tuhu kumu nawaYuda?

¹¹Ilaŋa Amaziya kutiya nehi. Dichi mwanta wawaIsarela Yehowashihakuya kwenoku. Hakumonaŋana namwanta wawaYuda Amaziya kuBetishemeshi wawaYuda.

¹²AYuda ayitapili kudi aIsarela, wejima wawuhiyakutemokela kunyikala yawu.

¹³Mwanta wawaIsarela Yehowashi, hakukwata Amaziya mwanta wawaYuda mwana kaYowashi, mwana kaAhaziya, kuBetishemeshi; hakwinza kuYerusalema, haku humunampwembu yaYerusalema kufumisha kuchisu chakuEfweremi, ndo nikuchisucha kwiwombu, munkotweli jachikasa makulakaji awana.

¹⁴Hakutambula wuru wejima nisiliva yejima, niyuma yejima yawenuwu nimwitala daYehova, nimuyuma yalema yamwitala damwanta, niantombu nawa, hakufunta kuSamariya.

¹⁵Nsaŋu jaYehowashi jayuma yeliliyi jinashaluku, niŋovu jindi, nichalwiliyina mwanta wawaYuda Amaziya; hiyanajisoneki mumukanda wawanyanta awaIsarela wakushindululaku?

¹⁶Yehowashi wakamini hamu nawankakulula jindi, amujiikili muSamariya hamu nawanyanta awaIsarela. Mwanindi Yerobowami hakumuswana.

¹⁷Amaziya mwana kaYowashi mwanta wawaYuda, wahandili nyakaikumi nayitanu kufumisha hafwiliyi Yehowashi mwana kaYehowa hazimwanta wawaIsarela.

¹⁸Nsaŋu jaAmaziya jinashaluku hiyanaji sonekimu mukanda wawanyanta awaYuda wakushindululaku?

¹⁹Amukwatilili chikuchi muYerusalema, hakutemukila kuLakishi. Ilaŋa wena hiyakumulondeshela antu kuLakishi, hiyakumujahila kwenoku.

²⁰Hiyakumuleta cheŋi hatuwalu, hiyakumujiika kuYerusalema hamu nawankakulula jindi mumukala waDavidi.

²¹Antu ejima amuYuda hiyakutambula Azariya wadiŋi wanyaka ikumi nayitanu nawumu, hiyakumuswanisha mwadiŋi tata yindi Amaziya.

²²Hakutuŋa mukala waElati, hakuwufuntisha cheŋi kudi aYuda, henohu mwanta nakami dehi hamu nawankakulula jindi.

²³Mumwaka wekumi nakatanu waAmaziya mwana kaYowashi mwantawa waYuda, Yerobowami mwana kaYehowashi mwanta wawaIsarela watachikilikuyula muSamariya, wayulili nyaka makumi awana namwaka wumu.

²⁴Welili chatama kumesu aYehova; halekeli munshidi jejima jamwana kaNebati Yerobowami javulumwishiliyi nachu aIsarelaku.

²⁵Wafuntishili cheŋi ŋinza yawaIsarela kufumisha kuwiŋililu wakuHamati ndo nikwijiyadakuchana, mwomwaya izu daYehova Nzambi yaIsarela, dahosheliyi kukanwa kakambuŋindi kaprofwetu Yona mwana kaAmitayi, wadiŋi waku-Gati Hefwenai.

²⁶Muloŋa Yehova wamweni ikabi dadiŋi nakukabawu aIsarela, dadiŋi dalula nankashi, hikwasheli hela nduŋu hela mwana wahamukala, hela tuhu nkwashi wakukwasha aIsarelaku.

²⁷Yehova hahoshelinindi nŋimaŋeshi ijina daIsarela mwishina dewuluku, ilaŋa waya mwinini nachikasa chamwana kaYehowashi Yerobowami.

²⁸Nsaŋu jaYerobowami ijina shaluku, niyuma yeliliyi yejima, niŋovu jindi, nichalwila ŋayi, nichatambwiliyi cheŋi Damakasa naHamati yadiŋi yawaYuda, yiikali cheŋi yawaIsarela, hiyanajisoneki mumukanda wawanyanta awaIsarela wakushindululaku?

²⁹Yerobowami wakamini hamu nawankakulula jindi anyanta awaIsarela, mwanindi Zekariya hakumuswana.