Read MUKANDA WANZAMBI 2 Malena 16 Bible Online

2 Malena 16 - MUKANDA WANZAMBI bible

2 Malena 16

¹Mumwaka wamwana kaRemaliya Peka wekumi nakatanu nakayedi Ahazi mwana kaYotami mwanta wawaYuda watachikili kuyula.

²Hatachikiliyi kuyula Ahazi wadiŋi wanyaka makumi ayedi. Wayulili muYerusalema nyaka ikumi nayitanu nawumu. Helili chaloŋa kumesu aYehova Nzambi yindi neyinkakulula yindi Daviduku.

³Wendeli mwendelelaŋa anyanta awaIsarela, hakuhanwisha nawa nimwanindi mukesi, mwomwadiŋi nakushimana nyuza yina yatemwiniyi Yehova kumesu awanyana kaIsarela.

⁴Waketwili yimuna, wocheli insensi hayinaŋanaŋa, nihamapidi, nimumashina anyitondu yituuta yejima.

⁵Henohu mwanta wawaSiriya Rezini, naPeka mwana kaRemaliya mwantawa waIsarela, hiyakwinza kuYerusalema nakudasa njita. Amukuchikili Ahazi, ilaŋa kutwesha kumwimika mushindu nehi.

⁶Wena mafuku owumwanta wakuSiriya Rezini wafuŋunwini mukala waElati, hiwukwikala cheŋi wawaSiriya, hakutemuna aYudeya muElati. ASiriya hiyakwinza kuElati, hiyakushakamamu nikulelu.

⁷Ahazi hakutemesha atupanda kudi mwantawa kuAshuri Tigilati Pileseri, nindi, Ami nikambuŋeyi, nimwaneyi. Twaya wuŋamwini kudi mwanta wakuSiriya, nikudi mwanta wawaIsarela, anannyamukili.

⁸Ahazi hakunona nisiliva niwuru wadiŋi mwitala daYehova, nimuyuma yalema yakwitala damwanta, hakumutemeshelayu mwantawa kuAshuri chamukunkulu.

⁹Mwanta wakuAshuri wamwitŋili. Mwantawa kuAshuri hakuya nakulukuka Damakasa, hakuwutapa, antu adiŋumu hakuyitwala kuKiri muwukoli, yojaha niRezini.

¹⁰Mwanta Ahazi hakuya kuDamakasa nakudimona namwanta waku-Ashuri Tigilati Pileseri, hakumonaku kameŋa kadiŋi kuDamakasa. Mwanta Ahazi hakutemesha kudi kapristu Uriya chifwikija chakamepoku, nimuwutupiluwaku mwejima mwakukatupilawu.

¹¹Dichi kapristu Uriya watuŋili kameŋoku. Mwejima mwamulejeleliyi mwanta Ahazi, namazu amutemesheleliyi kuDamakasa, dimu mwakatupililiyi kapristu Uriya, helili mwanta Ahazi kanda enzi kuDamakasa kwayiliyi.

¹²Chenjiliyi mwanta kwayiliyi kuDamakasa, mwanta hakumona kameŋa. Mwanta hakukundama kwakwihi nakameŋi hakukandamaku,

¹³hakwocha himulambu windi wakushita, nihimulambu windi wawuŋa, hakuhuŋununa himulambu windiwakuhuŋununa, hakusampula mashi hanyilambu yindi yakuwunda hakameŋoku.

¹⁴Kameŋa kawunepu kadiŋi kumesu aYehova, hakukafumisha kumbidi yetala kukadiŋi, kuneli kameŋa kindi iku, itala daYehova iku, hakukasha kumbadi yakameŋa kindi yakukabeta kakuchimunswa.

¹⁵Mwanta Ahazi hakumuleja kapristu Uriya, nindi, Hakameŋa keneni dihuwukwochaŋa himulambu wakushita, nihimulambu wawuŋa wamelela, nihimulambu wamwanta wakushita, nihimulambu windi wawupa, hamu nahimulambu wakushita wawantu ejima amwituŋa, nihimulambu wawu wayakudya, ninyilambuyawu yakuhupununa. Wakasampulaŋa hunimashi ejima ahimulambu wakushita, nimashi ejima achimuna wakuketula. Hakwila kameŋa kawuneŋu kakekali kakwihwilaŋaku ami.

¹⁶Kapristu Uriya welili mwejima mwamulejeliyi mwanta Ahazi.

¹⁷Mwanta Ahazi waketwili nyoweiu yamatentaminu, wafumishiluhumbashila yakuwelela. Hakutulula ŋiya hewulu daŋombi jawuneŋu jadiŋi mwishina, hakuditenteka hachisesa chamalola.

¹⁸Nimutalamu wahasabata watuŋililuwu mwitala, niwiŋililu wamwanta wahanzi, wawubalumwini hiwukwikala wakwitala daYehova, hansaŋu yamwanta wakuAshuri.

¹⁹Nsaŋu jaAhazi jinashaluku hiyanajisoneki mumukanda wawanyanta awaYuda wakushindululaku?

²⁰Ahazi wakamini hamu nawankakulula jindi. Amujiikili hamu nawankakulula jindi mumukala waDavidi. Mwanindi Hezekiya hakumuswana.