Read MUKANDA WANZAMBI 2 Malena 22 Bible Online

2 Malena 22 - MUKANDA WANZAMBI bible

2 Malena 22

¹Hatachikiliyi Yosiya kuyula, wadiŋi wanyaka yitanu nayisatu. Wayulili muYerusalema nyaka makumi asatu nawumu. Mamayindi ijina dindi Yedida, mwana kaAdaya wakuBosikati.

²Welili chaloŋa kumesu aYehova, wendeli munjila yejima yankakulula yindi Davidi, hasenukilumu nakuya hela kuchikasa chachidiilu hela kuchimunswaku.

³Hamwaka wamwanta Yosiya wekumi nakatanu nakasatu mwanta watemesheli nsoneki Shafwani mwana kaAzaliya, Azaliya mwana kaMeshulami, kwitala daYehova,

⁴nindi, Yaku kudi kapristu muneni Hilikiya, akachindi mali analetuwu mwitala daYehova, anapompeshuwu akwakuhemba kuchisu anatambuluwu kudi antu.

⁵Akayinki akwakukoŋa nyidimu atalaŋa itala daYehova; niwena akenki akwakukoŋa nyidimu adi mwitala dayehova, akaloŋeshi nachu itala hidahumoka humoka;

⁶niakalupendelu, niakwakutuŋi, niakwakutuŋa namalola, akalandi nachu ninyitondu, nimalola akusoŋa, kulonda akaloŋeshi itala.

⁷Hela chochu, mali ayinkeluwu hiyayichindililuwuku, muŋa adiŋi nakwila mwakashinshi.

⁸Kapristu muneni Hilikiya hakumwila nsoneki Shafwani, nindi, Nawanimukanda wanshimbi mwitala daYehova. Hilikiya hakumwinka Shafwani mukanda, hakuwutapa.

⁹Nsoneki Shafwani hakwinza kudi mwanta, hakumufuntishila mwanta mazu, nindi, Ambuŋeyi anasukuli dehi mali anawanuwu mwitala, anayinki dehi akwakukoŋa nyidimu atalaŋa itala daYehova.

¹⁰Nsoneki Shafwani hakumuleja mwanta, nindi, Kapristu Hilikiya nanyinki mukanda. Shafwani hakuwutaŋa kumesu amwanta.

¹¹Chatiyiliyi mwanta mazu akumukanda wanshimbi, hakutabola mahinindi.

¹²Mwanta hakuleja kapristu Hilikiya, ni mwana kaShafwani Ahikami, ni mwana kaMikaya Akibori, ninsoneki Shafwani, nikambuŋa mwanta Asaya,

¹³nindi, Yenu mwakatwihwiluku kudi Yehova, ninami, niantu, niaYuda ejima, nsaŋu yamazu amukandiwu wanawanuwu, muloŋa ndombu yaYehova yeneni yinatusaŋumukili dehi, nanocnu chabuliluwu ankakulula jetu kutiyilila mazu amukandiwu, chabuliluwu kwila mwejima mwatusonekeleluwu.

¹⁴Kapristu Hilikiya, niAhikami, niAkibori, niShafwani, niAsaya, hiyakuyakudi kaprofwetu wamumbanda Hulida, iŋoda Shalumi mwana kaTikivwa, Tikivwa mwana kaHarihasi, mukwakuhemba mahina akuvwala. Yena mumbanda washakamini muYerusalema muchibalu chamukala chamuchiyedi. Hiyakuhosha nindi.

¹⁵Yena hakuyila nindi, Yehova Nzambi yaIsarela nahoshi nindi, Kalejenu owu muntu wayitemesha kudami,

¹⁶nenu, Yehova nahoshi nindi, Tiya, mukaliwu niantu ejima ashakamamuna kayiletela katama, wowu mazu ejima anataŋiyi mwanta wawaYuda.

¹⁷Ndombu yami yakasaŋumukila mukaliwu, hiyakamwenaku, nanochuchananlekuwu, nanochu chanocheluwu akishi insensi, kulonda anvulokinizuwi nanyidimu yejima yakumakasawu.

¹⁸Kamwilenu mwanta wawa-Yuda wayitemesha nakwihula kudi Yehova, nenu, Yehova Nzambi yaIsarela nahoshi nindi, Awa mazu iwunatiyi,

¹⁹tiyaku dinu, ochu chiwuna tiyi munahosheli nakutena mukaliwu niantu ashakamamu, nami akashiŋewa akayihayama, nineyi hiwukwikala namuchima wawovu, hiwukudizo zakumesu aYehova, hiwukutabola mahineyi, hiwukudila kumesu ami; Yehova nindi, Nakutiyi dehi.

²⁰Dichi tiya, nukukushikŋa kwaya ankakulula jeyi, akakushikŋa kwijimu deyi nakumwena; hiwakamona namesu eyi katama kejima kinakaletela mukaliwuku. Hiyakufuntisha mazu kudi mwanta.