Read MUKANDA WANZAMBI 1 Makolonika 10 Bible Online

1 Makolonika 10 - MUKANDA WANZAMBI bible

1 Makolonika 10

¹AFwilistinu hiyakulwa nawaIsarela, aIsarela amayala hiyakutemuka aFwilistinu, atapoleluwu hiyakudimbokela kumpidi yaGilibowa.

²AFwilistinu hiyakuyihaŋa aSawulu nawanyanindi nankashi; aFwilistinu hiyakujaha Jonatani, niAbinadabi, niMalikishuwa, wowu anyana kaSawulu.

³Njita hiyikumwila Sawulu mwatama, hiyakumuwana kudi akwamata anyikunji, hiyakumumwesha kukala nankashi kudi akwamata anyikunji.

⁴Sawulu hakumwila mukwakusenda yitwa yindi, nindi Holaku mpoku yeyi yakabali, wuyimpwiki hamujimba wami zwa-a, kuchina kwinza nakunkoŋa chatama kudi awa ayidima. Ilaŋa mukwakusenda yitwa yindi wakolamini, muloŋa watiyili woma nankashi. Dichi Sawulu hakukwata mpoku yindi yakabali, hakudimbukilaku.

⁵Mukwakusenda yitwa yindi chamweniyi Sawulu nafwi dehi, niyena nawa hakudimbukila kumpoku yindi, hakufwa.

⁶Dichi afwili niSawulu nianyanindi amayala asatu; wafwilili hamu nimutaŋa windi wejima.

⁷AIsarela amayala ejima adiŋi muchinekineki, chmwenuwu akwawu hiyakutemoka, niSawulu nawanyanindi anafwi dehi, niwena hiyakufuma munyikala yawu, hiyakutemoka, aFwilistinu shakamamu.

⁸Chikunadu aFwilistinu hiyakwinza nakuvuulavuula afu, hiyakuwana Sawulu nawanyanindi adi heseki kumpidi yaGilibowa.

⁹Hiyakumuvuula, hiyakunona mutu windi, niyuma yindi yanjita, hiyakuyitemesha mwituŋa dawaFwilistinu dejima niniku niniku, nakutwala nsanu nikudi akishi awu akutuŋa nikudi antu.

¹⁰Yuma yindi yanjita ayishili mwitala dawakishi awu, chaaŋu chindi achihatilili mwitala daDagoni.

¹¹EniYabeshi Gileyadi ejima chanatiyuwu mwejima mwanamwiluwu Sawulu kudi aFwilistinu,

¹²ayilobu ejima hiyakunyamuka, hiyakwenda wufuku wejima, hiyakunona nichivuvuna chaSawulu, niyivuvuma yawanyanindi, hiyakuyitwala kuYabeshi, hiyakujiika mafwahawu mwishina damukula muYabeshi, hiyakujiŋa nanzala mafuku atanu nayedi.

¹³Dichi Sawulu wafwili namuloŋa windi waputiliyi kudi Yehova, nichimotokeliyi izu daYehova dabulili kuhembayi; nichehwiliyi kudi muntu wazakukana mukishi, hakwihwilaku nindi amuleji maana;

¹⁴abuli kwihula kudi Yehova; dichi chamujahililiyi hakubalumuna wanta hiwukwikala wamwana kaJesi Davidi.