Read MUKANDA WANZAMBI 1 Makolonika 13 Bible Online

1 Makolonika 13 - MUKANDA WANZAMBI bible

1 Makolonika 13

¹Davidi wakwatili mpùŋa nawawakulumpi amakombakaji, niamakulakaji, nianlomboli ejima.

²Davidi hakwila chipompelu chawaIsarela chejima, nindi, Neyi munatonojoki nenu chinawahi, neyi chinafumi kudi Yehova Nzambi yetu, tumwaŋalenu nakuleja ana kwetu anashalashali mwituŋa daIsarela dejima, niatupristu, niaLevi ekala munyikala yawuyikweti mpata janyepumukaku, kulonda akapompi kunu kutudi;

³twakafuntishi cheŋi chimbapu chaNzambi kunu kutudi; muloŋa hamafuku aSawulu hitwayilaŋa nakwihwilaku.

⁴Chipompelu chejima hiyakwilanawu, Dimu tukwila, muloŋa chumochu antu ejima achimweni nawuchinawahi.

⁵Davidi hakupompesha aIsarela ejima kufumisha kuShihori kakaloŋaka kuEjipitu, kushika nikuwiŋililu wakuHamati kulonda akaleti chimbaŋu chaNzambi chadiŋi kuKiriyati Yeyarimi.

⁶Davidi hakuya nawaIsarela ejima kuBayala kwoku kuKiriyati Yeyarimi wawaYuda, akafumishuku chimbaŋu chaNzambi Yehova washakama hadi akerubi, chakutenena ijina.

⁷Hiyakusendela chimbaŋu chaNzambi mwitemba dadiha, hiya kuchifumisha mwitala daAbinadabi; aUza naAhiyo hiya kwendesha itemba.

⁸Davidi nawaIsarela ejima hiyakusambilila kumesu aYehova naŋovu jawu jejima; hiyakwimba tumina, nitudada, niyisanji, nindimba, nimachakayi, nimpiŋa.

⁹Chashikiluwu kuwuhulilu waKidoni, Uza hakwolola chikasa chindinindi akwati chimbaŋu, muloŋa aŋombi akeŋeli kudimbuka.

¹⁰Yehova hakumuzuwila Uza, hakumweta nanochu cholweleliyi chikasa chindi akwatiku chimbaŋu, hakufwila kwenoku kumesu aNzambi.

¹¹Davidi hakutiyakutama nanochu chamubabesheluwu Uza kudi Yehova; hakutumbaku ijina, nindi, KuPerezuza, nikulelu.

¹²Denodu ifuku Davidi hakumutiya Nzambi woma, nindi, Chimbaŋu chaNzambi nukuchileta ŋahi kwaami?

¹³Dichi Davidi hafumishili chimbaŋu achileta kumukala waDaviduku, wachiteŋulwilili mwitala daObedi Edomi wakuGati.

¹⁴Chimbaŋu chaNzambi hichikushakama hamu nachisaka chaObedi Edomi mwitala dinditukweji tusatu; Yehova hakukiswila itala daObedi Edomi nkisu, niyumayindi yejima.