Read MUKANDA WANZAMBI 1 Makolonika 15 Bible Online

1 Makolonika 15 - MUKANDA WANZAMBI bible

1 Makolonika 15

¹Davidi watuŋili matalindi mumukala waDavidi. Hakuloŋeshakwakushila chimbaŋu chaNzambi, hakuchilemena itenti.

²Heno huDavidi hakuhosha nindi, Akusenda chimbaŋu chaNzambi chiŋa aLevi hohu, muloŋa diwu anatondiyi Yehova kusenda chimbaŋu chaNzambi, nikumukalakelaŋa haya nyaka.

³Davidi hakupompesha aIsarela ejima kuYerusalema kulonda akaleti chimbaŋu chaYehova mwachu mwanachiloŋesheliyi.

⁴Davidi hakupompesha anyana kaAroni, niaLevi;

⁵akudi anyana kaKohati; mukulumpi wawu Uriyeli, niana kwindi nkulakaji namakumi ayedi;

⁶akudi anyana kaMerari; mukulumpi wawu Asaya, niana kwindi makulakaji ayedi namakumi ayedi;

⁷akudi anyana kaGereshomi; mukulumpi wawu Yoweli, niana kwindi nkulakaji namakumi asatu;

⁸akudi anyana kaElizafwana, mukulumpi wawu Shemaya, niana kwindi makulakaji ayedi;

⁹akudi anyana kaHeberoni; mukulumpi wawu Eliyeli, niana kwindi makumi atanu nasatu,

¹⁰akudi anyana kaUziyeli; mukulumpi wawu Aminadabi, nianakwindi nkulakaji nekumi nayedi.

¹¹Davidi hakutambika atupristu aZadoki naAbiyatari niaLevi, niUriyeli, Asaya, niYoweli, Shemaya, niEliyeli, niAminadabi,

¹²hakuyila nindi, Yenu awakulumpi akumavumu awankakulula jawaLevi; dijilikenu ninenu nianakwenu kulonda mwakaleti chimbaŋu chaYehova Nzambi yaIsarela kunachiloŋeshela dehi.

¹³Chimwabulili kuchisenda hakusambila, dichi chatubabesheleluwu kudi Yehova Nzambi yetu, nachina chitwabulili kumukeŋakeŋa mwaya lushimbi.

¹⁴Atupristu nawaLevi hiyakudijilika kulonda aleti chimbaŋu chaYehova Nzambi yaIsarela.

¹⁵Anyana kawaLevi hiyakusenda chimbaŋu chaNzambi hamafwiji awu ninyikambu yachu, mwayilejeliyi Mosi, mwaya izu daYehova.

¹⁶Davidi hakuhosha nawawakulumpi awaLevi nindi, Kunjikenu ana kwenu akwakwimba nayuma yakwimba nachu, niyisanji, nitudada, nimachakayi, mudimu wakwimba chakola nakutwala izu dawu kwiwulu namuzaŋalu.

¹⁷Dichi aLevi hiyakukunjikaku mwana kaYoweli Hemani; wakudi anakwindi, mwana kaBerekiya Asafwi; wakudi ana kwawu anyana kaMerari, mwana kaKushaya Etani.

¹⁸Niwena adiŋi liamu nawana kwawu amuchiyedi, Zekariya, Beni, niYayaziyeli, niShemiramoti, niYehiyeli, niUni, niEliyabi, niBenaya, niMayaseya, niMatitiya, niElifwelehu, niMikineya, niObedi Edomi, niYeyeli, akwakuhemba kuyisu.

¹⁹Niakwakwimbatumina, Hemani, Asafwi, niEtani, namachakayi awuneŋu kulonda avumishaŋa chakola;

²⁰niZekariya, niAziyeli, niShemiramoti, niYehiyeli, niUni, niEliyabi, niMayaseya, niBenaya, nayisanji yakwimbila muAlamoti;

²¹niMatitiya, niElifwelehu, niMikineya, niObedi Edomi, niYeyeli, niAzaziya, natudada twakwimbila muSheminiti, kulonda atumbulaŋa.

²²Mukulumpiwa waLevi Kenaniya, diyi wadiŋi mukwakwimbisha tumina; diyi wayilejelaŋa muwimbilu watumina, muloŋa wadiŋi weluka.

²³NiBerekiya niElekana adiŋi akwakuhemba kuchisu chakuchimbaŋu.

²⁴NiShebaniya, niYoshafwati, niNetaneli, niAmasayi, niZekariya, niBenaya, niEliyezeri, wowu atupristu, diwu embili mpùŋa akumesu achimbaŋu chaNzambi; niObedi Edomi niYehiya diwu adiŋi akwakuhemba kuchisu chakuchimbaŋu.

²⁵Davidi, niakulumpi awaIsarela, niakulumpi amakombakaji hiyakuyanakufumisha chimbaŋu chachitiyaŋenu chaYehova mwitala daObedi Edomi namuzaŋalu.

²⁶Chelili Nzambi hakukwasha aLevi adiŋi nakusenda chimbaŋu chachitiyaŋenu chaYehova, hiyakuketula aŋombi amayala atanu nayedi niyizamba yanyikoku yitanu nayiyedi.

²⁷Davidi wadiŋi wavwalakanji yehina dadiwahi, niaLevi ejima asendeli chimbaŋu, niakwakwimba tumina, niKenaniya mukwakwimbisha akwakwimba, chochu; Davidi wavweli ifwodi yehina dadiwahi.

²⁸AIsarela ejima hiyakuleta chimbaŋucha chitiyaŋenu chaYehova nakudisamba, nakwimba makoleneti, nimpùŋa, nimachakayi, nakuvumisha chakola yisanji natudada.

²⁹Chelili chimbaŋu chachitiyaŋenu chaYehova hichikwinza kumukala waDavidi, mwana kaSawulu Mikali hakutalila munjanina, hakumona mwanta Davidi wudi nakuhaŋana nakuhema; hakumudiwula mumuchima windi.