Read MUKANDA WANZAMBI 1 Makolonika 26 Bible Online

1 Makolonika 26 - MUKANDA WANZAMBI bible

1 Makolonika 26

¹Ahamazanvu awakwakuhemba kuyisu; kudi aKora; Meshelemiya mwana kaKore, wakudi anyana kaAsafwi.

²Meshelemiya wadiŋi nawanyanindi amayala; wedi Zekariya, chilondawedi Yediyayeli, wamuchisatu Zebadiya, wamuchiwana Yatiniyeli;

³wamu chitanu Elami, wamu chitanu nachimu Yehohanani, wamu chitanu nachiyedi Eliyo wenayi.

⁴Obedi Edomi niyena wadiŋi nawanyanindi; wedi Shemaya, chilonda wedi Yehozabadi, wamuchisatu Yowa, wamuchiwana Sakari, wamuchitanu Netaneli;

⁵wamu chitanu nachimu Amiyeli, wamu chitanu nachiyedi Isakari, wamu chitanu nachisatu Pewuletayi; muloŋa amukoolekesheli kudi Nzambi.

⁶Nimwanindi Shemaya nawa amuvweleleli anyana amayala ayulili mutaŋa watata yawu, muŋa adiŋi ayilobu akwaŋovu.

⁷Anyana kaShemaya; Otini, niRefwayeli, niObedi, niElizabadi wukweti ana kwindi akwaŋovu aElihu naSemakiya.

⁸Awa ejima adiŋi akudi anyana kaObedi Edomi; niwena ni anyanawu niana kwawu ayilobu akwaŋovu jakukalakala; antu aObedi Edomi makumi atanu nadimu nawantu ayedi.

⁹Meshelemiyani yena wadiŋi nawanyanindi niana kwindi ayilobu, ikumi natanu nasatu.

¹⁰Hosanawa wakudi anyana kaMerari wadiŋi nawanyanindi; wamukulumpi Shimiri, hela hadiŋi weduku, tata yindi wamwinkeli wuawakulumpi;

¹¹wamuchiyedi Hilikiya, wamuchisatu Tebaliya, wamuchiwana Zekariya; anyana amayala niana kwaHosa ejima adiŋi ikumi nasatu.

¹²Kudi wenawa kwokwanonenuwu mazanvu awakwakuhemba kuyisuwowu awakulumpi ajikisha, adikombwelaŋa nawana kwawu kumudimu wakukalakala mwitala daYehova.

¹³Adisakwili nayinjikijilu, niwakadikulema niwalema hohamu, mwekalila mavumu awankakulula jawu, hachisuhachisu.

¹⁴Chinjikijilu chakumusela chedikilili Shelemiya. Mwanindi Zekariya mukwakuleja akwawu maana, washinshika, hiyakumusakwila yinjikijilu. Chinjikijilu chindi chedikili chakukabeta kakuchimunswa.

¹⁵Obedi Edomi chakukabeta kakuchidiilu; anyanindi amayala chetaladakusweka yuma.

¹⁶Shupimi naHosa chakumujika, kuchisu chaShaleketi, kwoku kumuhaŋa waya nakukanduka, adikombwelaŋa chakudikombola.

¹⁷Kumusela kwadiŋi aLevi atanu nawumu, kukabeta kakuchimunswa, ifuku dimu awana, kukabeta kakuchidiilu, ifuku dimu awana, kwitala dakuswekela yuma, ayedi ayedi.

¹⁸Chaku Paribari kumujika, awanakumuhaŋa, ayedi kuParibari.

¹⁹Wenowu diwu mazanvu awakwaku hembakuyisu; niakudi anyana kawaKora, niakudi anyana kaMerari.

²⁰Wakudi aLevi, Ahiya watalilaŋa kuwuswekelu wayuma yalema yakwitala daNzambi, watalilaŋa nikuwuswekelu wayuma yajilikiluwu.

²¹Anyana kaLadani amayala; wowu anyana kawaGereshoni akumini kudiLadani, wowu awakulumpi akumavumu awankakulula jakaGereshoni Ladani; Yehiyeli.

²²Anyana kaYehiyeli; Zetami namana kwindi Yoweli, atalilaŋa kuwuswekelu wayuma yalema yakwitala daYehova;

²³niakudi aAmarama, niakudi aIzihari, niakudi aHeberoni, niakudia Uziyeli;

²⁴niShebuweli mwana kaGereshomi, Gereshomi mwana kaMosi, wadiŋi nyuli yakuwuswekelu wayuma yalema.

²⁵Niana kwindi; kudi Eleyezeri kwokwafumini mwanindi Rehabiya, nimwanindi Yeshaya, nimwanindi Yorami, nimwanindi Zikiri, nimwanindi Shelomoti.

²⁶Yeniwu Shelomoti niana kwindi atalilaŋa kuwuswekelu wejima wayuma yajilikiluwu, yoyu yajilikili mwanta. Davidi niakulumpi akumavumu awankakulula, niakulumpi amakombakajini amakulakaji, niakulumpi anjita.

²⁷Ayinoneni kuyuma yapupiluwu kumajita, hiyakuyijilika yakulopesha nachu itala daYehova.

²⁸Niyuma yejima yajilikili nimukwakumona Samweli, ni mwana kaKishi Sawulu, ni mwana kaNeri Abineri, ni mwana kaZeruwiya Yowabi, yonsu nayijilikiyowu, yadiŋi kudi aShelomoti nawana kwindi.

²⁹Akudi aIzihari, Kenaniya nawana kwindi adiŋi namudimu wahanzi wakutala aIsarela, ekali atulala nawansompeshi.

³⁰Akudi aHeberoni, Hashabiya nawana kwindi, ayilobu ikombakaji namakulakaji atanu nayedi, atalilaŋa aIsarela kwishinadi daYodana kumujika, hansaŋu yamudimu waYehova wejima, nikumukalakela mwanta.

³¹Akudi aHeberoni kwadiŋi Yeriya diyi mukulumpi wawaHeberoni, mwavwalikilawu kumavumu awankakulula jawu. Hamwaka wayuliliyi Davidi wamakumi awana hiyakuyikepakeŋa, mukachi kawenawa hiyakuwanamu ayilobu akwaŋovu kuYazeriwa kuGileyadi.

³²Niana kwindi, ayilobu, adiŋi makombakaji ayedi namakulakaji atanu nayedi, awakulumpi akumavumu awankakulula jawu, enkeliyi Davidi mudimu wakutala aRubeni, nawaGadi, namuchidi waManase wachibalu, nihansaŋu jaNzambi jejima, nihansaŋu jamwanta.