Read MUKANDA WANZAMBI 1 Makolonika 5 Bible Online

1 Makolonika 5 - MUKANDA WANZAMBI bible

1 Makolonika 5

¹Anyana kaRubeni wedi waIsarela—muloŋa yena diyi wadiŋi wedi, ilaŋa chatamishiliyi kadidi katata yindi, wuawakulumpi windi awinkeli anyana kaYosefu mwana kaIsarela, nimuyachi hiyawushindululaŋa mwayawuawakulumpi wakusemukaku.

²Yuda chabadikiliyi ana kwindi Ŋovu, kudiyena hikukufuma nlomboli; hela chochu, wuawakulumpi wadiŋi waYosefu—

³Anyana kaRubeni wedi waIsarela amayala; Hanoki, niPalu, Hezeroni, niKarami.

⁴Anyana kaYoweli; Shemaya mwanindi, Gogi mwanindi, Shimeyi mwanindi;

⁵Mika mwanindi, Reyaya mwanindi, Bayali mwanindi;

⁶Beyera mwanindi atweluwu muwukoli kudi mwanta wakuAshuri Tiligati Pilineseri; yena wadiŋi kalamba kawaRubeni.

⁷Chashindulwiluwu makiŋu akumu yachi wawu, ana kwindi kuyisaka yawu adiŋi wakusambila Yeyeli, niZekariya,

⁸ni mwana kaAzazi Bela, Azazi mwana kaShema, Shema mwana kaYoweli, washakamini muArowenai, ndo nikuNebo nikuBayali Meyoni.

⁹Kumbadi yamusela watuŋili nakushika kuwiŋililu wakwisaŋa dafuma kuYufurati; nanochu chasemunwini yimuna yawu mwituŋa daGileyadi.

¹⁰Hamafuku adiŋiyi Sawulu aasili njita nawaHaŋiri, aHagiri hiyakufwaku chikasa chawu; wena hiyakushakama mumatenti awu mwahita ituŋa dejima dakumusela dadikuma naGileyadi.

¹¹Anyana kaGadi amayala ashakamini chatalaŋana nawena mwituŋa daBashani ndo nikuSaleka;

¹²mwanta wawu Yoweli, wamuchiyedi Shafwami, niYanayi, niShafwati wamuBashani;

¹³niana kwawu akumavumu awankakulula jawu; Mikayeli, niMeshulami, niSheba, niYorayi, niYakani, niZiya, niEberu, atanu nayedi.

¹⁴Wenawa diwu anyana kaAbihayili mwana kaHuri, Huri mwana kaYarowa, Yarowa mwana kaGileyadi, mwana kaMikayeli, Mikayeli mwana kaYeshishayi, Yeshishayi mwana kaYado, Yado mwana kaBuzi;

¹⁵Ahi mwana kaAbidiyeli, mwana kaGuni mwanta wakumavumu awankakulula jawu.

¹⁶Ashakamini muGileyadi muBashani, nimunyikala yawu nimumpata jakuSharoni jejima, ndo nikuŋinza jawu.

¹⁷Awa ejima ayishindulwili munyiyachi yawu hamafuku adiŋiyi mwanta wawaYuda Yotami, nihamafuku adiŋiyi mwanta wawaIsarela Yerobowami.

¹⁸Anyana kaRubeni amayala, niAŋadi, nimuchidi waManase wachibalu, ayilobu, amayala atweshelaŋa kusenda nkebu nampoku yakabali, nikwasana wuta wamukunji, akweti maana anjita, ashikili mumakombakaji makumi awana, namakombakaji awana, namakulakaji atanu nayedi nawantu makumi atanu nadimu, atweshelapa kuya kunjita.

¹⁹Hiyakwasa njita nawaHaŋiri, naYeturi, naNafwishi, niNodabi.

²⁰Ayikwashiluku kudasa nawu, aheni aHagiri kudi wena, niantu ejima adiŋuwu nawu; muloŋa abileleli kudi Nzambi mukachi kanjita, yena hakuyitiyilila, nanochu chamukuhweleluwu.

²¹Atweli yimuna yawu; anŋameli makombakaji makumi atanu, nyikokumakombakaji makulakaji ayedi namakombakaji makumi atanu, ayimbulu makombakaji ayedi, antu makombakaji nkulakaji.

²²Muloŋa kwadimbokeli amavulu atapilewi, muloŋa njita yadiŋi yakudi Nzambi. Hiyakuhiŋa mwadiŋuwu nikumwaka wawukoli.

²³Anyana kamuchidi waManase wachibalu ashakamini mwituŋa; hiyakusemunwina kuBashani, hiyakuya nakushika kuBayali Herimoni niku-Seniri nikumpidi yaHerimoni.

²⁴Anyanta akumavumu awankakulula jawu diwu awa; wowaEfwenai, naIshi, naEliyeli, naAziriyeli, naYeremiya, naHodaviya, naYadiyeli, ayilobu akwaŋovu, atiyakana, anyanta akumavumu awankakulula jawu.

²⁵Amotokeli Nzambi yawankakulula jawu, hiyakuyanakwila wuvumbi wakulondela akishi anyuza yamwituŋa, yajilumwiniyi Nzambi kumesu awu.

²⁶Nzambi yaIsarela hakusaŋumuna muchima wamwanta wakuAshuri Puli, nimuchima wamwanta wakuAshuri, Tiligati Pilineseri, hakuyitwala kwacheŋi, hakutwala aRubeni nawaGadi namuchidi waManase wachibalu kuHala, nakuHabori, nakuHara, nakukaloŋa kaku-Gozani, nikulelu.