Read MUKANDA WANZAMBI 2 Makolonika 10 Bible Online

2 Makolonika 10 - MUKANDA WANZAMBI bible

2 Makolonika 10

¹Rehobowami hakuya kuShekemi, muloŋa aIsarela ejima enjili kuShekemi akamudiishi wanta.

²Mwana kaNebati Yerobowami wadiŋi nakushakama muEjipitu, kwokwatemukililiyi mwanta Solomoni; hakuchitiya, Yerobowami hakufunta kuEjipitu kwayiliyi.

³Hiyakutemesha antu nakumutambika. Yerobowami nawaIsarela ejima hiyakwinza nakuhoshana Rehobowami,

⁴nawu, Tata yeyi watukalishilili mpanda yetu, ichidinu tupepesheli nyidimu yatata yeyi yakala, nimpanda yindi yalema yatutwikiliyi, etu twakakukalakelaŋa.

⁵Hakuyila nindi, Kajiŋenu kasatu mwakenzicheŋi kudami. Antu hiyakuya.

⁶Mwanta Rehobowami hakukwata mpùŋa nawawakulumpi emenaŋa kumesu atata yindi Solomoni hadiŋi yi wuchidi wamumi, nindi, Nlejenu chachiwahi munukuyakwila antu awa, nukuyila namidi?

⁷Hiyakumwilanawu, Neyi wukuyila antu awa chachiwahi nakuyikokweja nakuyihoshamazu amawahi akekala ambuŋeyi haya nyaka.

⁸Ilaŋa yena walekeli maanaamulejeluwu awakulumpi, hakukwata mpùŋa nawanyikwenzi akulililiyi nawuhamu, emenaŋa kumesu indi.

⁹Hakuyila nindi, Nlejenu chachiwahi kulonda tuyakuli antu awa anaŋili nawu, Pepeshaku mpanda yatutwikilitata yeyi. Tukuyila netwidi?

¹⁰Anyikwenzi akuliliyi nawu hamu, hiyakumwila nawu, Tiya chiwakayila antu awa anakwili nawu, Tata yeyi watulemesheleli mpanda yetu, eyi tupepesheliyi; kayili neyi, Munu wamiwakanyansa wunabadiki nkuma yatata yami kutoha.

¹¹Tata yami wayitwikilimpanda yalema, kumpanda yenu ami nakalunjikaku. Tata yami wayetelaŋa yikotu, ami nakayeta tunjimbu.

¹²Dichi Yerobowami nawantu ejima hiyakwinza kudi Rehobowami ifuku damuchisatu mwomwayilejeliyi mwanta, nindi, Mwakenzi cheŋi kudami ifuku damu chisatu.

¹³Mwanta hakuyitalumokela antu; mwanta Rehobowami hakuleka maana awawakulumpi,

¹⁴hakuyila mwamulejeluwu anyikwenzi, nindi, Tata yami wayilemesheleli mpanda yenu, ami nakalunjikaku; tata yami wayetelaŋa yikotu, ami nakayetapa tunjimbu.

¹⁵Mwanta hayitiyililili antuku, muloŋa chumochu chafumini kudi Nzambi, kulonda Yehova akoleshi izu dindi dahosheliyi kukanwa kaAhiya wakuShilo kudi mwana kaNebati Yerobowami.

¹⁶AIsarela ejima chamwenuwu mwanta kuyitiyilila nehi, antu hiyakumwakulanawu, Etu twadyaŋa naDavidi? Hitwabomba wuswana namwana kajesuku. Enu aIsarela mwaŋelenu wejima wenu kumatenti enu, eyi Davidi kaditalili itala deyeyi aweni. AIsarela amwaŋela nikumatenti awu.

¹⁷Kwinza anyana kaIsarela ashakamini munyikala yamuYuda, Rehobowami hakwikala mwanta wawu.

¹⁸Mwanta Rehobowami watemesheluku Hadorami wadiŋi mukulumpi wanyilambu. Anyana kaIsarela ejima hiyakumwasa malola, afwa nikufwa. Mwanta Rehobowami hakunyakala kukandama mwikalu dindi kulonda atemukili kuYerusalema.

¹⁹AIsarela adikaŋa namutaŋa waDavidi, nikulelu.