Read MUKANDA WANZAMBI 2 Makolonika 13 Bible Online

2 Makolonika 13 - MUKANDA WANZAMBI bible

2 Makolonika 13

¹Hamwaka wamwanta Yerobowami wekumi nakatanu nakasatu hatachikiliyi Abiya kuyula aYuda.

²Wayulili muYerusalema nyakayisatu. Mama yindi ijina dindi diyi Mikaya mwana kaUriyeli wakuGibeya. Abiya naYerobowami adiŋi nakudasa njita.

³Abiya hakuya kunjita nanjita yindi yawayilobu akwaŋovu makombakaji makulakaji awana, awamayala akutonda chakutonda; Yerobowami hakumutanji kilanjita yawamayala akutonda chakutonda makombakaji makulakaji atanu nasatu, ayilobu akwaŋovu hohu.

⁴Abiya hakwimana hampidi yaZemarayimi yekala mwituŋa daEfweremi damapidi, nindi, Enu aYerobowami nawaIsarela ejima, ntiyenu;

⁵Chidi kudenu kwiluka nenu Yehova Nzambi yawaIsarela wenkeli Davidi wantawa waIsarela chahaya nyaka, hamwinkeli yena nawanyanindi nachitiyaŋe nucha muŋwaku, tahindi?

⁶Mwana kaNebati Yerobowami, kambuŋa mwana kaDavidi Solomoni, wamunyamukilili, wadikaŋili nankaka yindi.

⁷Kudiyena kwapompeli antu amukunkulwayi, anyana kaBeliyali, hiyakuleta Ŋovu namwana kaSolomoni Rehobowami hachidipiyi Rehobowami wuchidi kansi, wuchidi namuchima wawovu, kutwesha kudikolesha nawu nehi.

⁸Dichi dinu munatopojoki nenu mudikaŋi nawanta waYehova wudinanetu anyana kaDavidi; enu muluntu lwalweni, mudi nanyana kaŋombiyawuru yayilililiyi Yerobowami nindi yiikali akishi enu.

⁹Atupristu twaYehova, anyana kaAroni, niaLevi himunayihaŋuku? Himuneli dehi atupristu twenu neyi chelaŋawu antu akumatuŋa acheŋuku? Himukwilawukwinza nakudi kunjikaku neyoŋa daŋombi weyala niyizamba yanyikoku yitanu nayiyedi, diyi wukwi kala kapristu kanawa anabuli kwikala Nzambi.

¹⁰Hakwila etu, Yehova diyi Nzambi yetu, etu kwetu hitunamulekuku; yetu tukweti tupristu twamukalakelapa Yehova, hiyanyana kaAroni, niaLeviadi kumudimu wawu;

¹¹mafuku ejima, nibudidi nimelela, amushitilaŋa Yehova nyilambu yakushita niinsensi yevumba dadiwahi; aloŋeshaŋa chachiwahi hamesa yakoseka mankendi akutenteka kumesu aNzambi, niinopu dawuru namanoyu adu, kulonda abutukaŋa hefuku hefuku namelela; muloŋa yetu twatalaŋa mudimu watushiikiluwu kudi Yehova Nzambi yetu; hakwila enu munamuleki dehi.

¹²Tiyenu, Nzambi tudi nindi, natulomboli, niatupristu twindi awa, adi nampùŋa jakwimbaŋa pu-u-u, ikulonda ayimbilenu pu-u-u. Enu anyana kaIsarela, bayi mulwa naYehova Nzambi yawankakulula jenuku; muloŋa enu himwakamona kuwahaku.

¹³Yerobowami hakuhitisha kunyima yawu akwakuyi bela mina; hiyakwila kumesu aYuda kudi antu, kunyima yawu kudi akwakuyi bela mina.

¹⁴AYuda cheliluwu nawu atali hanyima, hiyakumona komana njita yidi nikumbidi nikunyima. Hiyakubilela kudi Yehova, atupristu niwenahiyakwimba mpuŋa.

¹⁵Amayala aYuda hiyakudikuwa; chakudikuwawu amayala aYuda, Nzambi hakutapa Yerobowami nawaIsarela ejima kwakuya wuAbiya nawaYuda.

¹⁶Anyana kaIsarela atemukili kwakuyawu aYuda; Nzambi wayiheni kudi wena.

¹⁷Abiya nawantu indi ayijahili kwanyilaŋalaŋahohu; kwadimbukili aIsarela akufwa amayala akutonda chakutonda makombakaji makulakaji atanu.

¹⁸Anyana kaIsarela afwomoka nikufwomokahenohu fwo-o, anyana kaYuda emika nimushindu, muloŋa ashindameneni hadi Yehova, Nzambi yawankakulula jawu.

¹⁹Abiya hakukupisha Yerobowami, hakumutambula nyikala, niBeteli ninyikala yawu, niYeshana ninyikala yawu, niEfwenaoni ninyikala yawu.

²⁰Yerobowami hakwatilicheŋi Ŋovu hamafuku adiŋiyi Abiyaku; Yehova wamweteli hakufwa.

²¹Abiya hakusweja Ŋovu, hakusumbula aŋodi jindi ikumi nawana, hakuvwala anyana amayala makumi ayedi nayedi, ambanda ikumi natanu nawumu.

²²Nsaŋu jaAbiya jinashaluku, nimwendeleliyi, nimwahosheliyi, anajisonekimu nsaŋu yakaprofwetu Ido.